Бори аввал дар таърихи Тоҷикистон сангҳои ороишӣ ба хориҷи мамлакат содир шуданд

Июль 12, 2019 13:30

ДУШАНБЕ, 12.07.2019. /АМИТ «Ховар»/. Имрӯзҳо бо истифода аз ашёи хоми маҳаллӣ дар доираи ҳадафи чоруми миллӣ эълон кардани саноатикунонии босуръати ҷумҳурӣ даҳҳо корхонаҳои истеҳсолӣ фаъолият карда, иншооти сохтмониро бо масолеҳи зарурӣ таъмин менамоянд. Дар шашмоҳаи якуми соли равон аввалин маротиба дар таърихи Тоҷикистон 356,6 метри мураббаъ сангҳои ороишӣ ба маблағи 86,2 ҳазор сомонӣ аз тарафи ҶДММ «Зиркон»-и шаҳри Душанбе ба давлати Қатар содирот гардид.

Тавре аз Вазорати саноат ва технологияҳои нав ба хабарнигори АМИТ «Ховар» иттилоъ доданд, дар шаш моҳи  соли 2019 ба маблағи 1247,4 миллион сомонӣ масолеҳи сохтмонӣ истеҳсол шудааст, ки нисбат ба ҳамин давраи соли гузашта 168,8 миллион сомонӣ зиёд мебошад.  Ҳиссаи соҳа дар маҷмӯи маҳсулоти саноатӣ дар моҳи июн 12,4 ва дар 6 моҳ 10,5 %-ро ташкил дод.

Истеҳсоли семент ба 1,9 миллион тонна, хишт 51,3 миллион дона, газоблок 14,9 ҳазор метри мукааб, масолеҳи ғайримаъданӣ 674,3 ҳазор метри мукааб, гаҷкартон 605,4 ҳазор дона ва шифер 386,7 ҳазор дона баробар шудааст.

Бино ба маълумоти манбаъ, дар зиёд шудани истеҳсоли семент саҳми ҶДММ «Чунгтсай Моҳир семент»-и ноҳияи Ёвон 31,0 %, «Хуаксин Ғаюр семент»-и ноҳияи Ёвон 28,0 %, «Хуаксин Ғаюр Суғд семент»-и ноҳияи Бобоҷон Ғафуров 27,0 % ва «Сементи Тоҷик» 5,1 % назаррас мебошад.

Ҳаҷми содироти масолеҳ 33,9 миллион доллари ИМА ва ҳаҷми воридот 20,8 миллион долларро ташкил дод, ки содирот 13,1 миллион доллар зиёд мебошад. Зиёдшавии ҳаҷми содирот аз ҳисоби фурӯши семент мебошад, ки маблағи он 33,7 миллион долларро ташкил медиҳад. Қисми зиёди воридотро кошин, шиша, маснуоти санитарӣ ва гаҷкартон ташкил додааст.

Дар ин давра 745,0 ҳазор тонна семент, аз ҷумла ба ҷумҳуриҳои Ӯзбекистон 433,0 ҳазор тонна, Афғонистон 280,0 ҳазор тонна ва Қирғизистон 31,8 ҳазор тонна содир гардидааст.

Содироти гаҷкартон ба ҷумҳуриҳои Ӯзбекистон, Қирғизистон ва Афғонистон 193,8 ҳазор донаро ташкил дод.

Дар шаш моҳи соли 2019 корхонаҳои истеҳсоли семент «Моҳир семент»-и ноҳияи Ҷ. Балхӣ, шифер ҶДММ «Муқим-1» дар ноҳияи Ёвон, корхонаи коркарди сангҳои ороишӣ ҶДММ «Зиркон» дар шаҳри Душанбе, корхонаи хиштбарории ҶДММ «Белтатекс»-и шаҳри Хуҷанд ба фаъолият оғоз намуданд.

Ҳамчунин ҶДММ «Сомоншифер» бо сармоягузории ширкати «Кусто Групп»-и Ҷумҳурии Қазоқистон ба навсозии таҷҳизоти технологӣ бо маблағгузории 300,0 ҳазор доллари ИМА оғоз намуд. Мавриди истифода қарор гирифтани марҳилаи якуми корхона бо иқтидори 400,0 ҳазор дона шифер моҳи октябри соли 2019 пешбинӣ шудааст.

                                                                    Мавҷуда АНВАРӢ,
                                                                   АМИТ «Ховар»

Июль 12, 2019 13:30

Хабарҳои дигари ин бахш

Бозиҳои II кишварҳои ИДМ, шабеҳи Спартакиадаи халқҳои ИҶШС, аз 3 то 15 авусти соли 2023 дар Беларус баргузор мегарданд
КАМ АСТ Ё ЗИЁД? Тоҷикистон дар се моҳи аввали соли равон 600 тонна моҳӣ истеҳсол намудааст
БА ИСТИҚБОЛИ 25-СОЛАГИИ ВАҲДАТИ МИЛЛӢ. Қитъаи роҳи Шкев-Қалъаихум ба истифода дода мешавад
Дар Тоҷикистон барои соҳибкорони инфиродии тибқи патент ё шаҳодатнома фаъолияткунанда тартиби нави андозбандӣ муқаррар гардид
«Моликияти зеҳнӣ ва ҷавонон: Инноватсия барои ояндаи беҳтар». Таҳти чунин унвон дар Душанбе ҳамоиш доир шуд
Татбиқи «Барномаи рушди нақлиёти барқӣ дар Ҷумҳурии Тоҷикистон барои солҳои 2022-2026» истифодаи электромобилҳоро афзоиш медиҳад
ПАНҶСОЛАИ РУШДИ САНОАТ. ҶДММ «Тоҷфилиз» дар се моҳ ба маблағи зиёда аз 2 миллион сомонӣ маҳсулот истеҳсол намуд
ТАЪМИНИ АМНИЯТИ ОЗУҚАВОРӢ. Дар Маркази назорати давлатии санитарию эпидемиологии Суғд бо масъулини соҳаи савдо мулоқот доир шуд
«Somon Air» дар масири Душанбе-Алмато-Душанбе ҳафтае ду маротиба парвоз анҷом медиҳад
Дар Душанбе дурнамои нишондиҳандаҳои рушди соҳаҳои воқеии иқтисоди миллӣ баррасӣ гардид
Дар ноҳияи Ҷалолиддини Балхӣ вобаста ба содироти маҳсулоти кишоварзӣ ҷаласа доир шуд
Дар Душанбе рушди ҳамкории мутақобилан судманди Тоҷикистон ва Дафтари Швейтсария оид ба ҳамкории иқтисодӣ баррасӣ гардид