ПУРСЕД, ҶАВОБ МЕДИҲЕМ. Боз дар бораи симкортҳо, корти идентификатсионӣ, ҳуқуқу уҳдадориҳои шабакаҳои алоқаи барқӣ ва муштариёни онҳо

Июль 17, 2019 15:46

ДУШАНБЕ,  17.07.2019. /АМИТ «Ховар»/. Додани симкорте, ки ба номи як шахс сабт шудааст, барои истифода ба шахси дигар қатъиян манъ мебошад. Тавре қаблан хабар додем, дар ин бора  15 июл зимни нишасти матбуотӣ дар Маркази матбуоти ҷумҳуриявии «Ховар» муовини сардори Хадамоти алоқаи назди Ҳукумати Ҷумҳурии Тоҷикистон Илҳомҷон Атоев таъкид намуд. 

Атоев изҳор дошт, ки  бар асоси қарори Ҳукумат аз 30 апрели соли 2016 №207-7 «Дар бораи тартиб ва талаботи пайвастшавӣ ба шабакаи алоқаи барқӣ ва хизматрасониҳои вобаста ба он»   азнавбақайдгирии симкортҳои алоқаи мобилӣ аз ҷониби истифодабарандагон дар асоси шиносномаи шаҳрванди Тоҷикистон – «корти ID» ё худ корти идентификатсионӣ  гузаронда мешавад. Тибқи ин қарор Хадамоти алоқа вазифадор шудааст, ки то 15 августи соли равон ба номи ҳар шахс ба расмият даровардани на зиёда аз ду симкортро бо шиносномаҳои нав — корти ID анҷом диҳад.

Вобаста ба ин хонандагон ба мо занг зада ё нома навишта, хоҳиш мекунанд, ки дар бораи тарзи ба расмият даровардани симкортҳо муфассалтар ва пурратар маълумот диҳем.

Бо мақсади иҷрои хоҳиши онҳо дар зер матни пурраи «Тартиб ва талаботи пайвастшавӣ ба шабакаи алоқаи барқӣ ва хизматрасониҳои вобаста ба он»-ро, ки бо қарори Ҳукумати Ҷумҳурии Тоҷикистон  аз 30 апрели соли 2016 таҳти №207-7 ба тасвиб расидааст, пешниҳод менамоем. Хотиррасон мешавем, ки  дар  ин қарор  ба Хадамоти алоқаи назди Ҳукумати Ҷумҳурии Тоҷикистон супориш дода шудааст, ки санадҳои меъёрии ҳуқуқии худро ба қарори мазкур мутобиқ намуда, иҷрои Тартиби номбурдаро аз ҷониби мақомоти давлат ва истифодабарандагони хизмати алоқаи барқ таъмин намояд. Тибқи банди сеюми ин қарор  азнавбақайдгирии симкортҳо бояд дар давоми 1 (як) сол баъд аз мавриди амал қарор гирифтани қарори мазкур гузаронида шавад. 

                              Бо қарори Ҳукумати  Ҷумҳурии Тоҷикистон
аз «30» апрели соли 2016, № 207-7  тасдиқ шудааст

 

ТАРТИБ ВА ТАЛАБОТИ
пайвастшавӣ ба шабакаи алоқаи барқӣ
ва
хизматрасониҳои вобаста ба он

I. Муқаррароти умумӣ

1. Тартиб ва талаботи пайвастшавӣ ба шабакаи алоқаи барқӣ ва хизматрасониҳои вобаста ба он (минбаъд-Тартиб) мутобиқи моддаи 6 Қонуни Ҷумҳурии Тоҷикистон «Дар бораи алоқаи барқӣ» бо мақсади танзими пайвастшавӣ ба шабакаи алоқаи барқӣ таҳия гардидааст.

2. Риояи талаботи Тартиби мазкур аз ҷониби мақомоти давлатӣ, шахсони мансабдор, шахсони воқеӣ ва шахсони ҳуқуқӣ, новобаста аз шакли ташкилию ҳуқуқӣ ва моликияташон ҳатмӣ мебошад.

II. Пайвастшавӣ ба шабакаи алоқаи барқӣ

3. Тартиби омода намудани симкортҳо:
— симкортҳо мувофиқи рақамгузории ҷудокардашуда, аз ҷониби дорандаи иҷозати истифодабарии рақамгузорӣ омода карда мешаванд;
— рақамгузории симкортҳо ва истифодабарии захираҳои рақамгузорӣ бо иҷозати мақоми ваколатдори давлатӣ дар соҳаи алоқаи барқӣ ба роҳ монда мешавад.

4. Фаъолияти нуқтаҳои хариду фурӯши симкортҳо мувофиқи иҷозати мақоми ваколатдори давлатӣ дар соҳаи алоқаи барқӣ ба роҳ монда мешавад.

5. Талаботи асосӣ вобаста ба хариду фурӯши симкортҳо ва пайвасткунии муштариён ба шабакаи алоқаи барқӣ:
— фурӯши симкортҳо аз ҷониби операторони хизмати алоқаи барқӣ бевосита ва ё якҷоя бо дигар шахсони ҳуқуқӣ ва воқеӣ, ки бо тартиби муқарраршуда ба қайди давлатӣ гирифта шудаанд, мувофиқи шартномаҳои ба имзо расонидашуда амалӣ карда мешавад;
— пайвасткунии муштариён танҳо дар объекту иншоотҳои алоқаи барқӣ, ки ба талаботи муқарраршуда ҷавобгӯ мебошанд, бо пешниҳоди шиносномаи шаҳрванди Ҷумҳурии Тоҷикистон (корти идентификатсионӣ) ё ҳуҷҷатҳои таъсисии шахси ҳуқуқӣ анҷом дода шавад.

6. Пайвасткунии симкортҳои корпоративӣ танҳо бо пешниҳоди шиносномаи шаҳрванди Ҷумҳурии Тоҷикистон (корти идентификатсионӣ) ва ҳуҷҷатҳои таъсисии шахси ҳуқуқӣ бо дарназардошти талаботи банди 5 Тартиби мазкур ва иштир оки бевоситаи ҳар як корманди шахси ҳуқуқӣ, новобаста аз шакли таш килию ҳуқуқӣ, ба расмият дароварда мешавад.

7. Пайвасткунии муштариён ба шабакаи алоқаи барқӣ ҳангоми пешниҳоди хизматрасонии алоқаи мобилии бидуни симкорт, пайвасткунии муштариён ба шабакаи алоқаи маҳаллӣ ва хизматрасонии интернет бо риояи талаботи банди 5 Тартиби мазкур амалӣ карда мешавад.

8. Бо шиносномаи шаҳрванди Ҷумҳурии Тоҷикистон (корти идентификатсионӣ) ё ҳуҷҷатҳои таъсисии шахси ҳуқуқӣ, ки беэътиборанд, ё бидуни қайди маҳалли зисти шахси воқеӣ ё маҳалли будубоши шахси ҳуқуқӣ мебошанд, хариду фурӯши симкортҳо вa пайвасткунии муштариён ба шабакаи алоқаи барқӣ манъ аст.

9. Пайвасткунии шаҳрвандони хориҷӣ, шахсони бешаҳрвандӣ, ки маҳалли истиқомати доимиашон Ҷумҳурии Тоҷикистон намебошад, вобаста ба мӯҳлати иҷозати буду боши онҳо дар қаламрави Ҷумҳурии Тоҷикистон амалӣ карда мешавад.

10. Мақоми ваколатдори давлатӣ дар соҳаи алоқаи барқӣ махзани ягонаи симкортҳоро ташкил намуда, маълумоти дахлдорро дар бораи муштарӣ дар махзани мазкур нигоҳ медорад.

III. Азнавбақайдгирии симкортҳо

11. Азнавбақайдгирии симкортҳо расмиёти бақайдгирии иловагии симкортҳо буда, бо мақсади таъмини пайвастшавии дуруст, санҷиш ва назорати дурусти истифодабарии онҳо ба роҳ монда мешавад.

12. Азнавбақайдгирии симкортҳое, ки то мавриди амал қарор гирифтани Тартиби мазкур ба муштариён барои истифода дода шудаанд, аз ҷониби операторони хизмати алоқаи барқӣ гузаронида шуда, назорати давлатии онро мақоми ваколатдори давлатӣ дар соҳаи алоқаи барқӣ таъмин менамояд.

13. Бо мақсади гузаронидани азнавбақайдгирии симкортҳо:
а) мақоми ваколатдори давлатӣ дар соҳаи алоқаи барқӣ вазифадор аст:
— назорати таъмини иҷрои талаботи Тартиби мазкурро амалӣ намояд;
— раванди иҷрои азнавбақайдгириро назорат кунад;
— ҳисоботҳои пешниҳоднамудаи операторони хизмати алоқаи барқиро таҳлил намояд;
— ба Ҳукумати Ҷумҳурии Тоҷикистон ҳисобот пешниҳод кунад;
— корхона, муассисаву ташкилотҳои давлатӣ ва шаҳрвандонро 1 моҳ пеш аз оғози азнавбақайдгирӣ тавассути воситаҳои ахбори oмма хабардор намояд;
б) операторони хизмати алоқаи барқӣ ӯҳдадоранд:
— хизматрасонии симкортҳоеро, ки бе риояи талаботи Тартиби мазкур мавриди истифодабарӣ карор доранд, дар рафти азнавбақайдгирӣ қатъ намоянд;
— азнавбақайдгирии симкортҳоро бо иштироки бевоситаи хар як муштарӣ бо пешниҳоди шиносномаи шаҳрванди Ҷумҳурии Тоҷикистон (корти идентификатсионӣ) бо қайди маҳалли зисти шаҳрванд ё ҳуҷҷатҳои таъсисии шахси ҳуқуқӣ бо зикри махалли бақайдгирии шахси ҳуқуқӣ ба таври ройгон гузаронанд;
— азнавбақайдгирии симкортҳоро танҳо дар марказҳои хизматрасонии расмии худ гузаронанд;
— истифодабарандагони симкортҳоро тавассути имкониятхои техникии худ (смс, занги телефонӣ, сомона) 1 моҳ, пеш аз оғози азнавбақайдгирӣ хабардор намоянд;
— аз натиҷаи гузаронидани азнавбақайдгирӣ ба мақоми ваколатдори давлатӣ дар соҳаи алоқаи барқӣ ҳисоботи дахлдорро пешниход намоянд.

IV. Гузаронидани маблағ ба тавозуни истифодабарандагони симкортҳо (муштариён)

14. Тартиби ба тавозуни истифодабарандагони симкортҳо (муштарӣ) гузаронидани маблағ бояд ба талаботи зерин ҷавобгӯ бошад:
— гузаронидани маблағ танҳо тавассути кортҳо, терминалҳои хурд ва калон (таҷҳизоти дигар), ки ҳамчун воситаҳои алоқаи барқӣ тибқи талаботи моддаи 17 Қонуни Ҷумҳурии Тоҷикистон «Дар бораи алоқаи барқӣ» мавриди сертификатсия қарор мегиранд, сурат мегирад;
— маблағи супоридашуда бояд фавран ба тавозуни истифодабаранда гузаронида шавад;
— фоиз барои қабули пардохт набояд ситонида шавад.

15. Пешниҳодкунандагони хизматрасонӣ вазифадоранд:
— шартномаи оммавиро байни худ ва муштариён дар нуқтаҳои хизматрасонӣ ва ё дар дохили терминал ҷойгир намоянд;
— ҳар семоҳа ҳисоботи шакли муқарраршударо ба мақоми ваколатдори давлатӣ дар соҳаи алоқаи барқӣ на дертар аз санаи даҳуми моҳи баъдина пешниҳод намоянд.

16. Шакли ҳисобот бо пешниҳоди мақоми ваколатдори давлатӣ дар соҳаи алоқаи барқӣ аз ҷониби мақомоти омори давлатӣ тасдиқ карда мешавад.

V. Ҳуқуқ ва уҳдадориҳои операторони хизмати алоқаи барқӣ, дигар шахсони ҳуқуқӣ ва воқеӣ, ки хизматрасонии хариду фурӯши симкортҳоро амалӣ менамоянд

17. Ҳуқуқ ва ӯҳдадориҳои операторони хизмати алоқаи барқӣ ҳангоми пайвасткунии муштариён ба шабакаи алоқаи барқӣ:
— бо дигар шахсони ҳуқуқӣ ва воқеӣ барои пешниҳоди хизматрасонии хариду фурӯши симкортҳо ва ба шабакаи алоқаи барқӣ пайваст намудани муштариён шартномаи дахлдор ба имзо расонанд;
— назорати дохилии риояи талаботи Тартиби мазкурро мунтазам ба роҳ монанд;
— пайвасткунии муштариёнро ба шабакаи худ танҳо бо талаби шиносномаи шаҳрванди Ҷумҳурии Тоҷикистон (корти идентификатсионӣ) ё ҳуҷҷатҳои таъсисии шахси ҳуқуқӣ, иштироки бевоситаи соҳибони онҳо ва баъди ба расмият даровардани фурӯши симкортҳо ба амал бароранд;
— хариду фурӯши симкортҳоро танҳо дар объекту иншоотҳои соҳаи алоқа ба роҳ монанд;
— маълумоти дахлдорро дар бораи муштарӣ дар махзани маълумот нигоҳ доранд;
— маълумоти дахлдорро дар бораи муштарӣ ба мақоми ваколатдори давлатӣ дар соҳаи алоқаи барқӣ пешниҳод намояд;
— ҳангоми аз ҷониби дигар шахсони ҳуқуқӣ ва воқеӣ, хизматрасонии хариду фурӯши симкортҳоро ба амал мебароранд, риоя нашудани талаботи Тартиби мазкур, шартномаи бо онҳо ба иҷро расонидашударо бекор намоянд;
— ҳангоми муроҷиати муштарӣ (дар ҳолати гум ё корношоям шудани симкорт) хизматрасонии симкортро фавран қатъ намояд;
— ҳангоми ошкоркунии ҳолатҳои риоя нашудани талаботи Тартиби мазкур, ба мақоми ваколатдори давлатӣ дар соҳаи алоқаи барқӣ мақомоти амнияти миллӣ маълумоти дахлдор пешниҳод намоянд;
— дар ҳолати ба итмом расидани мӯҳлати иҷозати будубоши шаҳрвандони хориҷӣ (шахсони бешаҳрвандӣ, ки маҳалли истиқомати доимиашон Ҷумҳурии Тоҷикистон намебошад), хизматрасониҳо симкортҳои ҷудошударо қатъ намоянд;
— ба мақоми ваколатдори давлатӣ дар соҳаи алоқаи барқӣ ҳисоботи шакли муқарраршударо пешниҳод намоянд.

18. Ӯҳдадориҳои дигар шахсони ҳуқуқӣ ва воқеӣ, ки хизматрасонии хариду фурӯши симкортҳоро амалӣ менамоянд:
— хариду фурӯши симкортҳоро бо риояи талаботи сархатҳои якум ва дуюми банди 5 Тартиби мазкур ба роҳ монанд;
— дар нуқтаҳои фурӯши симкорт навиштаҷотҳои огоҳкунандаро ба пешниҳоди шиносномаи шаҳрванди Ҷумҳурии Тоҷикистон (корти идентификатсионӣ) ё ҳуҷҷатҳои таъсисии шахси ҳуқуқӣ ҷойгир намоянд;
— маълумот ва ҳуҷҷатҳои дар натиҷаи фурӯши симкорт ҷамъовардашударо ба операторони хизмати алоқаи барқӣ ҷиҳати ворид намудан ба махзани маълумот пешниҳод намоянд;
— ба мақоми ваколатдори давлатӣ дар соҳаи алоқаи барқӣ хисоботи шакли муқарраршударо пешниҳод намоянд.

VI. Ҳуқуқ ва ӯҳдадориҳои истифодабарандагони симкортҳо

19. Истифодабарандагони симкорҳо дорои ҳуқуқ ва ӯҳдадориҳои зерин мебошанд:
— бо операторони алоқаи барқӣ шартнома ба имзо рисонанд;
— симкортро бо пешниҳоди шиносномаи Ҷумҳурии Тоҷикистон (корти идентифакатсионӣ) ё ҳуҷҷатҳои таъсисии шахси ҳуқуқӣ соҳиб шаванд;
— дар ҳолати гум кардан ё кормошоям шудани симкорт фавран оператори алоқаи барқии дахлдорро хабардор намоянд;
— симкортро ба дигар шахс барои истифода надиҳанд;

20. Падару модар ва шахсоне, ки падару модарро иваз мекунанд, ки метавонанд симкортро барои истифодабарии фарзандони ноболиғ дастрас намоянд. Падару модар ва шахсоне, ки падару модарро иваз мекунанд истифодаи симкортро аз ҷониби фарзандони ноболиғ назорат мебаранд. Ба шахсони маъюб ва шахсони маҳдудияти фаъолияти ҳаётидошта, намояндагони қонунии онҳо симкортро барои истифодабарии онҳо назорат менамоянд.

VI. Муқаррароти хотимавӣ

21. Дигар талаботе, ки дар Тартиби мазкур муқаррар нагардидааст, ба шартномае, ки байни операторони хизмати алоқаи барқӣ ва пешниҳодкунандаи хизматрасониҳои зикргардида ба имзо расонида мешаванд, ба танзим дароварда мешавад.

22. Барои риоя накардани Тартиби мазкур шахсони воқеӣ ва ҳуқуқӣ мувофиқи қонунгузории Ҷумҳурии Тоҷикистон ба ҷавобгарӣ кашида шаванд.

 

Июль 17, 2019 15:46

Хабарҳои дигари ин бахш

ПУРСЕД, ҶАВОБ МЕДИҲЕМ! Даври нимниҳоии «Евровидение-2021»-ро бо иштироки Манижа дар куҷо ва кай метавон тамошо кард?
ПУРСЕД, ҶАВОБ МЕДИҲЕМ. Минбаъд насаб, ном ва номи падар бо кадом тарз дигар карда мешавад, бақайдгирии давлатии он чи тавр сурат мегирад ва умуман ин кор чӣ аҳамият дорад?
ПУРСЕД, ҶАВОБ МЕДИҲЕМ. Интиқол надодани ҷасади майит дар ҳолати ногувори пешомада: ҳукми шаръии ин ҳолат чӣ гуна аст?
ПУРСЕД, ҶАВОБ МЕДИҲЕМ. Маблағгузории сарикасӣ: ҳадафи ҷорӣ намудани механизми мазкур дар чист?
ПУРСЕД, ҶАВОБ МЕДИҲЕМ. Ёдгориҳои бостонӣ, монументалӣ ва меъмории шаҳри Душанбе кадомҳоянд?
ПУРСЕД, ҶАВОБ МЕДИҲЕМ. Re-Export чист ва зери мафҳуми «реэкспорти мол» чиро бояд фаҳмид?
ПУРСЕД, ҶАВОБ МЕДИҲЕМ. Соҳиби шаҳодатномаи аккредитатсияи байналмилалӣ шудан ба донишгоҳҳо чӣ афзалият медиҳад?
ПУРСЕД, ҶАВОБ МЕДИҲЕМ. Дар ҷаҳон чанд мамлакат мавҷуд аст?
ПУРСЕД, ҶАВОБ МЕДИҲЕМ. Дар ҳолати ошкор кардани молу маҳсулоти пастсифат ва муҳлати истифодаашон гузашта ба куҷо бояд муроҷиат кард?
ПУРСЕД, ҶАВОБ МЕДИҲЕМ. Ҳисоббаробаркунии ғайринақдӣ чист ва бо кадом мақсад роҳандозӣ карда мешавад?
ПУРСЕД, ҶАВОБ МЕДИҲЕМ. Барои табобати диабети қанд чӣ гуна ғизо бояд истеъмол кард?
ШУМО ПУРСИДЕД…Хурофот чист ва чӣ маънӣ дорад? Оё он бо дин тавъам аст?