ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. 80 нафар тарбиятгирандагони ноҳияи Мастчоҳ соҳиби муассисаи нав мешаванд

ДУШАНБЕ, 23.07.2019. /АМИТ «Ховар»/. Ба истиқболи 30-солагии Истиқлолияти давлатии Ҷумҳурии Тоҷикистон дар ноҳияи Мастчоҳ бунёду навсозии беш аз 500 иншоот ба нақша гирифта шуда, дар даҳҳо иншооти дигар корҳои сохтмонӣ ҷараён доранд. Дар нимсолаи якум дар ноҳия бо харҷи 14 миллиону 560 ҳазор сомонӣ  68 иншооти таъйиноти гуногун ба истифода дода шудаанд.

Тавре ба АМИТ «Ховар» аз Мақомоти иҷроияи ҳоимияти давлатии ноҳияи Мастчоҳ иттилоъ доданд,  ба истиқболи ин ҷашни миллӣ дар маҳаллаи 40-солагии Дилварзини Ҷамоати деҳоти Палдорак муассисаи томактабӣ бунёд мешавад.

Муассисаи томактабӣ ҷиҳати иҷрои дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷониби соҳибкори маҳаллӣ Оймаҳмад Шарипов бунёд гардида истодааст.

Тибқи лоиҳа, барои бунёди иншоот 2 миллион сомонӣ пешбинӣ гардида, то имрӯз 80 дарсади корҳои сохтмонӣ  анҷом ёфтаанд. Муассисаи мазкур барои 80 нафар тарбиятгиранда дар як баст сохта шуда,  аз ду ошёна иборат мебошад.