ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар ҷамоатҳои шаҳраку деҳоти ноҳияи Фархор аз ҷониби соҳибкорон 64 иншооти хурд бунёд мешаванд

ФАРХОР, 14.08.2019 /АМИТ «Ховар»/. Дар ноҳияи Фархор  бахшида ба ҷашни  30- солагии  Истиқлолияти  давлатии  Ҷумҳурии Тоҷикистон  324 адад  бинову иншоот ба истифода дода мешаванд. Ҳоло дар   аксари иншоот корҳои сохтмонӣ ҷараён дошта, бинокорон талош доранд то  таҷлили ҷашни миллӣ онҳоро мавриди истифода қарор  диҳанд.  Дар  ин бора раиси ноҳияи  Фархор Рустам Раҳматзода иттилоъ  дод.

Ба гуфти номбурда,  тибқи   нақшаи чорабиниҳои  мақомоти   иҷроияи ҳокимияти давлатии ноҳия то соли 2021 аз ҳисоби  ҳамаи манбаъҳои  маблағгузорӣ сохтмону навсозии 324 адад  бинову иншоот, аз ҷумла соли 2019 -158 адад, соли 2020 – 79 адад ва соли 2021 36 адад  дар назар дошта шудааст. Соли 2018 дар ноҳия 51 иншоот бунёду навсозӣ шуданд.

Дар айни замон дар 64 иншооти хурди 10 ҷамоати шаҳраку деҳоти ноҳия корҳои сохтмонӣ идома дошта, аз ҷониби соҳибкорон  ба итмом расонида мешаванд.

Гуфта мешавад, ки то соли 2021 дар ноҳия   сохтмони 11 мактаби нав  барои 7480  хонанда, 56  синфхонаи иловагӣ   барои 1400 ҷои нишаст,  таъмири асосии 2 мактаб ва 2 муассисаи томактабии хусусӣ, 5 майдончаи варзишӣ, 9 адад бунгоҳи тиббӣ, 15 адад коргоҳи дӯзандагӣ, 3 бинои кошонаи ҳусн, 76 мағоза ва марказҳои савдо, навсозии боғи фарҳангӣ, корхонаи коркарди меваю сабзават, 5 чоҳи амудӣ, сохтмону навсозии 2 бозор, 34  сартарошхона, 2 нонвойхона, бунёди 115 гектар боғҳои нав, 2 фермаи парандапарварӣ ва сохтмони  дигар  иншооти  хурду бузург  дар назар дошта шудааст.