ФУТБОЛ: Нуриддин Давронов ва Комрон Турсунов дастаҳояшонро иваз мекунанд

ДУШАНБЕ, 23.08.2019 /АМИТ «Ховар»/. Капитани дастаи   мунтахаби Тоҷикистон ва  дастаи  футболи «Истиқлол»-и шаҳри Душанбе Нуриддин Давронови 28-сола бо дастаи «КФ Оман»-и кишвари Уммон қарордоди яксола ба имзо расонид. Дар ин бора  мухбири АМИТ «Ховар» Меҳрони  ҚУРБОН  бо истинод ба  Федератсияи футболи Тоҷикистон хабар  медиҳад.

Тибқи иттилои манбаъ, ба ғайр аз кишвари Уммон пешниҳодҳо аз давлатҳои Ӯзбекистон, Ҳиндустон ва Индонезия низ буданд, вале Нуриддин  Давронов  кишвари Уммонро интихоб намуд.

Ёдовар мешавем, ки  Нуриддин Давронов фаъолияти варзишии  худро аз дастаи  «Смена»-и кишвари Беларус шурӯъ намуда, инчунин дар бошгоҳҳои «Барқчӣ», «Локомотив-Москва», «Истиқлол»-и Душанбе, «Слобода»-и Сербистон, «Дунав»-и Булғористон, «Мадура Юнайтед»-и Индонезия ҳунарнамоӣ кардааст. Охирин дастае, ки Давронов бозӣ мекард, ин дастаи футболи «Истиқлол»-и шаҳри Душанбе буд.

Ҳамчунин   футболбози ҷавони дигари  тоҷик  Комрон Турсунов,  ки  ба дастаи «Утрехт»-и Голландия даъват шуда  буд,  айни ҳол тамринҳои худро дар ҳайати дастаи мазкур идома дода истодааст. Чуноне ки худи футболбоз   ба  мо   хабар дод, онҳо дар як рӯз ду бор- субҳ ва нисфирӯзӣ машқ мегузаронанд.

Комрон Турсунов дастпарвари бошгоҳи «Регар ТадАЗ» -и Турсунзода   ба ҳисоб рафта, тӯли ду мавсими охир дар дастаи  футболи  «Истиқлол»-и Душанбе  бозӣ мекард. Моҳи гузашта дастаҳои  «Утрехт»- и Голландия ва «Русенборг»-и  Норвегия Комрон Турсуновро барои санҷиш даъват намуданд.