Кумитаи забон ва истилоҳот аз риояи Қонуни Ҷумҳурии Тоҷикистон «Дар бораи забони давлатӣ» дар шаҳри Хоруғ изҳори нигаронӣ кард

Август 23, 2019 10:16

ХОРУҒ, 23.08.2019 /АМИТ «Ховар»/. Дар толори хурди мақомоти иҷроияи ҳокимияти давлатии шаҳри Хоруғи Вилояти Мухтори Кӯҳистони Бадахшон мулоқоти аъзои гурӯҳи корӣ бо роҳбарии Раиси Кумитаи забон ва истилоҳоти назди Ҳукумати Ҷумҳурии Тоҷикистон Гавҳар Шарофзода бо кормандони масъули мақомоти ҳифзи ҳуқуқ, суд, прокуратура, САҲШ, роҳбарони муассисаҳои таълимию тандурустӣ ва фарҳангӣ баргузор гардид. Дар ин бора хабарнигори минтақавии АМИТ «Ховар» аз Бадахшон хабар медиҳад.

«Имрӯз таъсири раванди ҷаҳонишавиро на танҳо дар шаҳрҳои нисбатан калон, балки дар деҳоти дурафтодаи мамлакат низ мушоҳида кардан мумкин аст. Донистани забонҳои хориҷӣ ва истифодаи онҳо дар кору рӯзгор хуб аст, аммо суиистифода аз он манфиатҳои миллиро зери хатар мегузорад. Зеро забони давлатӣ яке аз пояҳои асосии мавҷудияти ҳар як миллат буда, ҳифзи фарҳанг, расму суннат, таъриху адабиёт маҳз аз забони давлатӣ маншаъ мегирад. Аз ин рӯ дар татбиқи бандҳои Қонуни Ҷумҳурии Тоҷикистон «Дар бораи забони давлатӣ» аз хурд то бузург масъул мебошанд ва ба ин қонун бояд эҳтиром гузоранд»,-изҳор дошт Раиси Кумитаи забон ва истилоҳоти ҷумҳурӣ.

Мутаассифона, ҳангоми боздиди гурӯҳи корӣ аз бозори марказии шаҳри Хоруғ маълум гардид, ки на ҳамаи шаҳрвандон  моҳияти қонуни мазкурро дарк намудаанд. Бештари қаҳвахонаву тарабхонаҳо, марказҳои тиҷоратӣ, дӯконҳо бо забонҳои англисию  русӣ ва забонҳои маҳаллӣ номгузорӣ шудаанд, ки хилофи муқаррароти Қонун «Дар бораи забони давлатӣ» мебошад. Дар аксари навиштаҷот бо забони давлатӣ иштибоҳоти услубию имлоӣ ба назар мерасанд. Истифода аз лаҳҷаҳои забони тоҷикӣ қатъиян манъ мебошад. Зеро агар ҳар як минтақа бо лаҳҷаи худ суҳбат кунаду корхона ва ё муассисаи худро бо лаҳҷаи маҳали худ номгузорӣ кунад, пас забони адабии тоҷикӣ, ки таърихи беш аз ҳазорсола дорад, комилан коста мегардад.

Раиси Кумитаи забон ва истилоҳоти ҷумҳурӣ  ба фаъолияти ниҳодҳои назоратӣ, бахусус прокуратураи шаҳри Хоруғ дар мавриди истифодаи забони давлатӣ баҳои ғайриқаноатбахш дода, аз онҳо даъват намуд, ки дар зудтарин фурсат камбудиҳои ҷойдоштаро бартараф намоянд.

Дар ин мулоқот аз фаъолияти Муассисаи давлатии Мактаби Президентӣ ва  Литсеи Оғохон дар самти риояи бандҳои Қонуни Ҷумҳурии Тоҷикистон «Дар бораи забони давлатӣ» изҳори қаноатмандӣ гардид. Гуфта шуд, ки дигар муассисаҳои таълимӣ ва идораву корхонаҳои давлатию хусусии вилоят бояд аз таҷрибаи муассисаҳои номбурда баҳра бардошта, дар рушду тавсеаи  забони давлатӣ нақши бештар гузоранд.

Мудири шуъбаи рушди иҷтимоӣ ва робита бо ҷомеаи дастгоҳи раиси вилоят Арамбегим Маҳтобшозода гуфт, ки гурӯҳи корӣ чанд намуна аз китобҳои «Фарҳанги номҳои миллӣ», «Феҳристи номҳои миллӣ», Фарҳанги номҳои ҷуғрофӣ» ва амсоли инҳоро ба мақомоти иҷроияи ҳокимияти давлатии вилоят тақдим намуд.

Август 23, 2019 10:16

Хабарҳои дигари ин бахш

Дар Институти астрофизика доир ба системаи офтобӣ машварат баргузор шуд
Барои кормандони соҳаи ҳифзи муҳити зист ва ҳифзи ҳуқуқ машғулияти омӯзишӣ баргузор гардид
Китоби «Рустами Эмомалӣ – дастпарвари Мактаби давлатдории Пешвои миллат» роҳнамо барои ҷавонони Тоҷикистон аст
«ШОҲНОМА» — БУЗУРГТАРИН ҲАМОСАИ МИЛЛӢ. Ин асар шоҳкории беназири сатҳи ҷаҳонӣ эътироф гардидааст
Аз қалъаи Бибихонуми шаҳри Бохтар бозёфтҳои давраҳои таърихӣ кашф карда шуданд
Оид ба тадбирҳои инноватсионӣ дар соҳаҳои молия, таҳсил ва иқтисод конференсияи байналмилалӣ доир шуд
Озмуни ҷумҳуриявии «Донандаи беҳтарини асарҳои Пешвои миллат» ҷамъбаст мегардад
Бозёфтҳои Осорхонаи таърихии асри санги Ховалинг 1 миллион сол умр доранд
ШАҲОМАТИ ДУШАНБЕ. Китоби «Рустами Эмомалӣ-дастпарвари Мактаби давлатдории Пешвои миллат» ин мавзуъро фаро гирифтааст
Дар ноҳияи Айнӣ бахшида ба 80-солагии муаллифи Суруди миллии Ҷумҳурии Тоҷикистон конференсияи ҷумҳуриявӣ доир мешавад
СОҲИБҚИРОНИ ШОИРӢ УСТОД РӮДАКИСТ. Бахшида ба Рӯзи Рӯдакӣ ҳамоиши адабӣ доир шуд
Ба ифтихори 700-солагии Ҳофизи Шерозӣ дар Осорхонаи миллӣ намоиши ҷашнӣ ифтитоҳ ёфт