«Тоҷикистон-2019» — муаррифи дастовардҳои тавлидотии мамлакат

ДУШАНБЕ, 14.08.2019/АМИТ «Ховар»/. Маҳсулоти тавлидотии Ҷумҳурии Тоҷикистон охири моҳи октябр дар Намоишгоҳ-ярмаркаи универсиалии «Тоҷикистон-2019», ки дар Маҷмааи давлатии «Кохи Борбад»-и пойтахт доир мегардад, дар масоҳати 600 метри мураббаъ ба намоиш гузошта мешавад.

Намоишгоҳ  бо ибтикори Палатаи савдо ва саноати мамлакат ва дастгирии Ҳукумати Ҷумҳурии Тоҷикистон гузаронида шуда, ҳадафи он муаррифии молу маҳсулоти  корхонаю ширкатҳои тавлидотии ватанӣ ва хориҷӣ мебошад.

Аз Палатаи савдо ва саноати ҷумҳурӣ ба АМИТ «Ховар» иттилоъ доданд, ки дар намоишгоҳ корхонаю ширкатҳои тавлидотии ватанию хориҷӣ маҳсулоти худро дар бахшҳои  энергетика, нақлиёт, логистика, саноати кӯҳӣ, мошинсозӣ,  саноати вазнин ва сабук, сайёҳӣ, сармоягузорӣ,  молия ва бонкдорӣ,  кишоварзӣ, тандурустӣ, дорусозӣ ва технологияҳои муосир ба намоиш мегузоранд.