«Мавлоно — тараннумгари ваҳдат»-таҳти чунин унвон дар ноҳияи Данғара конференсияи ҷумҳуриявӣ доир мегардад

Сентябрь 26, 2019 10:31

ДУШАНБЕ, 26.09.2019 /АМИТ «Ховар»/. Пагоҳ, 27 сентябр дар Муассисаи таҳсилоти миёнаи умумии №-9-и Ҷамоати деҳоти Сангтӯдаи ноҳияи Данғара бахшида ба бузургдошти Мавлоно Ҷалолиддини Балхӣ таҳти унвони «Мавлоно- тараннумгари ваҳдат» конференсияи ҷумҳуриявӣ доир мегардад.

Дар ҳамоиши илмии ҷумҳуриявӣ олимону донишмандон, мавлоношиносони маъруф ва шоирону нависандагон иштирок намуда, дар мавзӯъҳои «Чанд андешае перомуни Донои Вахш», «Устод Садриддин Айнӣ ва Ҷалолиддини Балхӣ», «Масъалаи инсон аз дидгоҳи Мавлоно», «Мавлоно Ҷалолиддини Балхӣ ба зодбуми худ бармегардад», «Муҳри каломи Мавлоно ишқ аст», «Мавлоно-шоири андеша ва афкори миллӣ», «Ашъори Мавлоно дар барномаи ҳунарии Аҳмад Зоҳир», «Бозтоби Офтоб» ва «Сангтӯда-ватани бозёфтҳои нодири таърихӣ» маърӯза хоҳанд кард.

Мавриди зикр аст, ки аз соли 2009 инҷониб бо Фармони Президенти Ҷумҳурии Тоҷикистон муҳтарам Эмомалӣ Раҳмон ҳамасола 30 сентябр зодрӯзи ин мутафаккир ҷашн гирифта мешавад. Соли 2007 аз ҷониби ЮНЕСКО 800-солагии Мавлоно эълон гардид ва он на танҳо дар Ҷумҳурии Тоҷикистон, балки дар як зумра кишварҳои ҷаҳон дар сатҳи баланд ҷашн гирифта шуд.

Ҷалолиддини Балхӣ яке аз сермаҳсултарин адибони тоҷик аст, ки бо мероси адабии худ ҷаҳониёнро дар ҳайрат гузоштааст. Асарҳои офаридаи ӯ «Девони Шамс», «Маҷолиси саъба», «Мактубот», «Маснавии Маънавӣ» мебошанд, ки хонандагонро ба дунёи маърифату заковат ворид мекунанд. «Маснавии Маънавӣ»-ро бори нахуст олими англис Р. А. Николсон тӯли солҳои 1925-1937 аз форсӣ ба англисӣ баргардонидааст, ки аз 25 ҳазору 632 байт иборат аст.

Ин аст, ки бо гузашти беш аз 8 қарн бузургию  асолати  мероси адабии  шоир ва мутафаккири барҷастаи  машриқзамин-  Мавлоно Ҷалолиддини Балхӣ оламшумул ва побарҷо буда, дар қарни 21 «Маснавии маънавӣ»-и Мавлоно серхаридортарин китоб дар Амрико эътироф гардид.

Тибқи тадқиқоти анҷомдодаи муҳаққиқони тоҷик, зодгоҳи аслии  Мавлоно водии Вахш (он замон  Вахш аз музофоти Балх маҳсуб меёфт)  аст. Ҳатто як донишманди амрикоӣ дастнависи падари Мавлоноро дарёфт карда,  собит сохтааст, ки  зодгоҳи Мавлоно мавзеи  Сангтӯдаи имрӯза мебошад. Мавлоно дар  овони наврасӣ бо волидайн ва ҳудуди 700 нафар муридони падараш ҳамроҳ бо аҳли  адаб аз Балх сафари Маккаро ихтиёр намуда,  баъди бозгашт  Қунияро ватан баргузид ва ҳоло осори зиндагии  шоир ва мадфани Мавлоно он ҷо боқист.

 

Сентябрь 26, 2019 10:31

Хабарҳои дигари ин бахш

Бо ташаббуси Агентии ҳифзи мероси таърихию фарҳангӣ дар ноҳияи Ховалинг Рӯзи Ваҳдати миллӣ ҷашн гирифта шуд
Шоири халқии Тоҷикистон Камол Насрулло: «Ҳақиқат ин аст, ки Пешвои миллат ваҳдатро бунёд гузошту таҳким доду қавӣ сохт»
Дар Осорхонаи миллӣ гӯшаи доимоамалкунандаи «Ваҳдати миллӣ» ташкил гардидааст
Тамоми комёбиҳои миллат ва саодати рӯзгори мардум аз иттиҳоди миллӣ ибтидо мегирад
«ЭМОМАЛӢ РАҲМОН – МЕЪМОРИ СУЛҲУ ВАҲДАТ». Дар Вазорати фарҳанг ҳамоиши илмӣ доир гардид
Таҳти унвони «Қисса ва ҳикояҳо» китоби Абдурофеъ Рабизода нашр гардид
«ДАР МЕҲМОНИИ ДУШАНБЕ». Фестивали байналмилалии эҷодиёти бадеии кӯдакон ва наврасони ИДМ оғоз гардид
Дар Агентии ҳифзи мероси таърихию фарҳангӣ таҳти унвони «Ваҳдати миллат — бақои миллат!» ҳамоиш баргузор шуд
Дар ёдгории Ҳалқаҷари ноҳияи Хуросон бозёфти нодири таърихӣ — «обкӯзаи хонуми Сагкин» кашф гардид
«Душанбе — нусхае аз биҳишт». Таҳти ин унвон дар васфи пойтахти Тоҷикистон китоб ба нашр расид
Донишҷӯдухтарони Донишгоҳи давлатии Кӯлоб ба меҳмонони хориҷӣ либосҳои миллиро намоиш доданд
Дар Институти биологии Помир озмоишгоҳи биотехнологӣ ба истифода дода шуд