Туҳфаи Пешвои миллат- «Шоҳнома»-и Ҳаким Фирдавсӣ ба собиқадорони меҳнати ноҳияи Кӯшониён тақдим карда шуд

ДУШАНБЕ, 28.11.2025 /АМИТ «Ховар»/. 27 ноябр дар доираи иқдоми фарҳангпарваронаи Президенти Ҷумҳурии Тоҷикистон муҳтарам Эмомалӣ Раҳмон ба собиқадорони меҳнати ноҳияи Кӯшониён асари безаволи Абулқосим Фирдавсӣ – «Шоҳнома» тақдим карда шуд. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Кӯшониён хабар доданд.

Масъулин ҳангоми тақдими китоб ба сокинони ҷамоату деҳоти ноҳия иброз доштанд, ки чунин ғамхориҳои пайвастаи Пешвои миллат муҳтарам Эмомалӣ Раҳмон ба тарбияи ватандӯстии ҷавонон, эҳёи арзишҳои миллӣ ва таҳкими худшиносии фарҳангии ҷомеа заминаи мустаҳкам мегузорад.

Гуфта шуд, ки тақдими «Шоҳнома» аз ҷониби Сарвари давлат на танҳо рамзи арҷгузорӣ ба таъриху фарҳанги пурғановати халқи тоҷик, балки нишонаи муҳаббати бепоён ба ҳар хонаводаи Ҷумҳурии Тоҷикистон аст. Ин иқдоми арзишманд дар дили ҳар сокини мамлакат эҳсоси ифтихор аз гузашта ва масъулият барои имрӯзро бедор менамояд.

Ёдовар мешавем, ки имрӯзҳо дар ҷамоату деҳоти ноҳияи Кӯшониён тақдими асари безаволи Абулқосим Фирдавсӣ-  «Шоҳнома» идома дорад.

АКС: Мақомоти иҷроияи ҳокимияти давлатии ноҳияи Кӯшониён