Ҷаласаи 34-уми Шӯрои ҳамкории фарҳангии кишварҳои узви ИДМ анҷом ёфт

ДУШАНБЕ, 20.09.2019. /АМИТ «Ховар»/. Иштирокчиёни ҷаласаи 34-уми Шӯрои ҳамкории фарҳангии кишварҳои узви ИДМ 19 сентябр аз Боғи ангури шаҳри Турсунзода ва Қалъаи шаҳри Ҳисор  дидан намуданд.

Меҳмононро зимни сафар Вазири фарҳанги Ҷумҳурии Тоҷикистон Шамсиддин Орумбекзода ҳамроҳӣ намуд.

Иштирокдорони ҷаласаро раиси шаҳри Турсунзода  Абдуқодири Вализода, аҳли фарҳанг ва ҷавонони санъатдӯст бо шукӯҳу шаҳомати хоссаи миллӣ  пешвоз гирифтанд. Онҳо ба меҳмонон барномаи ҷолиби ҳунарӣ бо иҷрои оҳанг ва сурудҳои тоҷикӣ, ӯзбекӣ, озарӣ, қазоқӣ, қирғизӣ, русӣ, беларусӣ, арманӣ пешниҳод намудаанд.

Сипас меҳмонон аз Боғи ангур дидан намуда, аз ин  зебоию  тамъи нотакрор, хӯшаҳои навъҳои гуногуни ангур ва ҳосилхезии замини Тоҷикистон ба ҳайрат афтоданд.

«Мо имрӯз бо чашми худ дидем, ки меҳнати аз таҳти дил иҷро кардаи деҳқон чунин хӯшаҳои зебо ва бузург ба бор меоварад», — ба ваҷд омада, иброз намуд муовини аввали вазири фарҳанги Ҷумҳурии Беларус Наталя Карчевская.

Барномаи консертии хотирмон, ки аз ҷониби ҷавонони боистеъдод ва ҳунарпешаҳои шинохтаи шаҳри Турсунзода ташкил гардид, ба меҳмонон хеле писанд омад.

Хусусан рақси ду писарчаи хурдсол меҳмононро чунон мафтун сохт, ки Вазири фарҳанги Ҷумҳурии Ӯзбекистон Бахтиёр Сайфуллоев ва муовини вазири фарҳанг ва варзиши Ҷумҳурии Қазоқистон Нуркиса Дауешов соатҳои дастии швейтсарии худро ба раққосони хурдсол туҳфа карданд.

Аз ин барномаи фарҳангӣ иштирокчиёни ҷаласаи 34-уми Шӯрои ҳамкории фарҳангии кишварҳои узви ИДМ хушнуд гардида, ба ҳунару истеъдоди мардуми шаҳр ва меҳмоннавозию самимияти онҳо баҳои баланд доданд.

Дар ин рӯз меҳмонон ба тамошои Қалъаи Ҳисор рафта, бо ин мавзеи таърихии номдори Тоҷикистон шинос шуданд. Тамошои Қалъаи Ҳисор низ барои меҳмонон хеле хотирмон буд.

Иштирокчиёни ҷаласаи 34-уми Шӯрои ҳамкории фарҳангии кишварҳои узви ИДМ аз ташкили ҷаласа дар Китобхонаи миллӣ, омодагии баланди ҷониби Тоҷикистон барои баргузории ин ҷаласа, зебогии табиати нотакрори Тоҷикистон, хӯрокҳои лазизи миллии точикӣ ва меҳмоннавозии мардуми мо мафтун гардида, сафар ба Тоҷикистонро барояшон нотакрору фаромӯшнопазир номиданд.