Барандагони озмуни вилоятии «Ворисони Сино» дар Хатлон муайян шуданд

Сентябрь 2, 2019 10:35

ДУШАНБЕ, 02.09.2019 /АМИТ «Ховар»/. Аввалин барандагони озмуни вилоятии «Ворисони Сино» дар Хатлон   эълон шуданд. Дар ин бора аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба АМИТ «Ховар» хабар доданд.

Бино ба иттилои манбаъ, бо мақсади ҳавасмандкунии кормандони соҳаи тандурустӣ ва баланд бардоштани сатҳу сифати хизматрасонии тиббӣ бо пешниҳоди раиси вилояти Хатлон Қурбон Ҳакимзода  озмуни «Ворисони Сино» дар сатҳи вилоят баргузор гардид.  Мувофиқи низомномаи озмун, ҳамасола шаш нафар кормандони соҳаи тиб барандаи озмун хоҳанд шуд.

Барандагони озмуни «Ворисони Сино» соли 2019  шаш нафар табибон, аз ҷумла директори Маркази бемориҳои дили вилоят Иброҳим Мусоев, мудири шуъбаи ҷарроҳии умумии Беморхонаи вилоятии ба номи «Бурӣ Воҳидов» дар шаҳри Бохтар Шералӣ Ҳодиев, муовини менеҷери Кумаки аввалияи тиббию санитарии (КАТС) шаҳри Бохтар Толибҷон Бекназаров, директори Маркази мубориза бар зидди бемориҳои сили вилоят Шамсулло Олимзода, сардухтури Беморхонаи вилоятии бемориҳои чашм дар шаҳри Кулоб Суҳроб Сайдалиев, сардухтури Беморхонаи вилоятии кӯдакона дар шаҳри Кӯлоб Муҳсиддин Қамаров эълон  гардида, бо диплом ва мукофоти пулӣ дар ҳаҷми панҷ ҳазор сомонӣ аз тарафи Раиси вилояти Хатлон қадрдонӣ шуданд.

Озмуни «Ворисони Сино» дар вилояти Хатлон дар робита ба он баргузор  гардид, ки қаблан раиси вилоят Қурбон Ҳакимзода эълон карда буд, ки ҳар корманди соҳаи тибби вилоят зимни навиштани корҳои илмӣ ва ҳимояи рисолаи номзадӣ соҳиби панҷ ҳазор сомонӣ хоҳад шуд.

Инчунин тибқи гуфтаи раиси вилояти Хатлон, зимни ҳимояи  рисолаи докторӣ ҳар табибе, ки дар ин вилоят фаъолият менамояд, бо даҳ ҳазор сомонӣ қадрдонӣ мешавад.

Бояд гуфт, ки соли 2019 сардухтури Маркази санитарию эпидемиологии шаҳри Бохтар ва собиқ сардухтури Беморхонаи шаҳри Бохтар, яке аз ҷарроҳони номдори вилоят Файзалӣ Назаров, ки рисолаи доктории худро ҳимоя намуд, аз тарафи раиси вилоят бо даҳ ҳазор сомонӣ  қадрдонӣ гардид.

Ба иттилои манбаъ, анъанаи мазкур бо мақсади рушди соҳаи тандурустӣ ва ба корҳои илмӣ ҷалб  намудани табибони вилояти Хатлон минбаъд низ идома хоҳад ёфт. Умед аст, ки тадбири мазкур имкон медиҳад табибони вилоят ба соҳаи илм бештар рӯ оранд.

Ба иттилои Раёсати тандурустии вилояти Хатлон, дар муассисаҳои соҳаи тандурустии вилоят айни замон 3 ҳазору 31 нафар  кормандони соҳаи тиб ба мардум хизмат мерасонанд, ки аз ин се нафар доктор ва  23 нафар номзади илмҳои тиб мебошанд.

Сентябрь 2, 2019 10:35

Хабарҳои дигари ин бахш

ЭҲЁ ВА РУШДИ ЗАБОНИ ДАВЛАТӢ ДАР ПАРТАВИ СИЁСАТИ ФАРҲАНГИИ ПЕШВОИ МИЛЛАТ. Ба Рӯзи забони давлатии Ҷумҳурии Тоҷикистон бахшида мешавад
Маросими ифтитоҳи расмии Бозиҳои XVI Делфӣ дар Театри давлатии академии опера ва балети Тоҷикистон доир мегардад
Бостоншиносон бори нахуст маданияти моддии Панҷакенти замони Сомониёнро таҳқиқ менамоянд
25 сентябр дар Академияи миллии илмҳо Рӯзи дарҳои кушода гузаронида мешавад
Дар ноҳияи Исмоили Сомонии шаҳри Душанбе Маркази хизматрасонии «Сад ранги чакан» ифтитоҳ ёфт
ҲАМЛАИ ТАҶОВУЗКОРОНАИ ҚИРҒИЗИСТОН. Жапаров дар иҷлоси СММ сухан гуфта, гумон кардааст аз минбари Жогорку Кенеши Қирғизистон ҳарф мезанад,- сармуҳаррири рӯзномаи «Ҷаҳони Паём»
Ба шарафи Рӯзи Рӯдакӣ дар Институти илмҳои гуманитарӣ конференсияи илмӣ-амалӣ баргузор шуд
Дар Душанбе бахшида ба Рӯзи Рӯдакӣ ҳамоиш баргузор мешавад
«ТОҶИКИСТОН — КИШВАРИ ДАРЁҲОИ ТИЛЛОӢ». Дар Осорхонаи таърихии вилояти Суғд шакли хурди намоиш ифтитоҳ ёфт
ҲАМЛАИ ТАҶОВУЗКОРОНАИ ҚИРҒИЗИСТОН. Марзбонони қирғиз борҳо санадҳои оташбасро дағалона вайрон намуда, гуноҳро ба сари неруҳои марзбони Тоҷикистон мезананд
ҲАМЛАИ ТАҶОВУЗКОРОНАИ ҚИРҒИЗИСТОН. «Баъзе аз намояндагони ин мардум «хати қирмизӣ»-и ҳамсоядориро кайҳо дағалона убур карда буданд»- муовини Сармуҳаррири рӯзномаи «Садои мардум»
«БИЁЕД, БА ОТАШИ ХОНУМОНСӮЗИ ҶАНГ ДОМАН НАЗАНЕМ!». Муроҷиати Раёсати Иттифоқи нависандагони Тоҷикистон