Дар Душанбе ҷаласаи 32-юми Шӯрои Ассотсиатсияи байналмилалии Академияи илмҳо баргузор гардид

Сентябрь 19, 2019 15:07

ДУШАНБЕ, 19.09.2019 /АМИТ «Ховар»/. Имрӯз дар шаҳри Душанбе ҷаласаи 32-юми Шӯрои Ассотсиатсияи байналмилалии Академияи илмҳо таҳти раисии Ҷумҳурии Тоҷикистон доир гардид.

Ҷаласаро роҳбари Ассотсиатсияи байналмилалии Академияи илмҳо, Раиси президиуми Академияи миллии илмҳои Беларус, академик Владимир Гусаков ва президенти Академияи илмҳои Ҷумҳурии Тоҷикистон, академик Фарҳод Раҳимӣ ифтитоҳ бахшиданд.

Зикр шуд, ки дар ҷаласаи бонуфузи байналмилалии илмӣ намояндагони Академияи илмҳои кишварҳои собиқ Иттиҳоди шӯравӣ, аз ҷумла  Тоҷикистон, Россия, Озарбойҷон, Беларус, Қазоқистон, Қирғизистон, Молдова, Украина ва кишварҳои дур- Муғулистон, Покистон, Ветнам, Чин, Полша ва муассисаҳои илмии ҷаҳонӣ иштирок доранд.

Дар ҷаласа миёни иштирокдорон оид ба масъалаҳои қабули Эъломия оид ба рушди Ассотсиатсия дар давраи то соли 2030, ба узвияти Ассотсиатсия қабул намудани Академияи илмҳои Муғулистон, қабули Академияи илмҳои минтақавии Ҷумҳурии Мардумии Чин ба сифати нозир, таҳия ва тасвиби шӯроҳои илмӣ, тасдиқи самтҳои асосии рушди ҳамкории Академияи илмҳои Ҷумҳурии Тоҷикистон бо  Ассотсиатсияи байналмилалии Академияи илмҳо ва дигар масоили марбут ба рушди илми ҷаҳонӣ музокирот доир гардид.

Яке аз масъалаҳое, ки таваҷҷуҳи махсус ба он дода шуд, ин омода кардани мутахассисони баландихтисос дар соҳаҳои илмҳои тадқиқотӣ-бунёдӣ мебошад.  Аъзои Ассотсиатсия ба хулоса омаданд, ки дар самти илмҳои  физика, химия, техника, генетика ва гуманитариву ҷамъиятшиносӣ бояд мутахассисони баландихтисоси илми ҷаҳонӣ омода карда шаванд. Зеро асри 21 асри рушди илму техника ба шумор меравад ва илм ҳам босуръат рушд карда истодааст. Бояд мутахассисон ҳам ҳамқадами илми муосир бошанд.

Мавриди зикр аст, ки ҷаласаи 31-уми Шӯрои Ассотсиатсияи байналмилалии Академияи илмҳо соли 2018 дар шаҳри Минск гузаронида шуда буд. Шӯро қарор қабул кард, ки ҷаласаи навбатии Шӯрои Ассотсиатсияи байналмилалии Академияи илмҳо соли 2020 дар кишвари Озарбойҷон доир карда шавад.

Тибқи нақша меҳмонон аз мавзеъҳои таърихиву фарҳангии Тоҷикистон, аз ҷумла Китобхонаи миллии Тоҷикистон, Осорхонаи миллии Тоҷикистон, Осорхонаи мардумшиносии Академияи илмҳо ва Қалъаи Ҳисор дидан менамоянд.

Мавриди зикр аст, ки Ассотсиатсияи байналмилалии Академияи илмҳо соли 1993 дар шаҳри Киев таъсис шуда, бори аввал дар Ҷумҳурии Тоҷикистон баргузор гардид.

Баргузор гаштани чунин чорабинии сатҳи байналмилалии илмӣ аз он шаҳодат медиҳад, ки имрӯз дар арсаи байналмилалӣ дастовардҳои олимони тоҷик аз ҷониби олимони ҷаҳон пазируфта шудааст ва Академияи илмҳои   Ҷумҳурии Тоҷикистон нуфузи баланди худро пайдо намудааст.

Сентябрь 19, 2019 15:07

Хабарҳои дигари ин бахш

Намояндагони Тоҷикистон дар Форуми байналмилалии фарҳангии Санкт-Петербург сухан гуфтанд
АМИТ «Ховар» бо Агентии давлатии иттилоотии Шоҳигарии Арабистони Саудӣ ҳамкориро тақвият мебахшанд
Дар Кохи фарҳанги ноҳияи Темурмалик кинотеатри «Тоҷи Сомон» таъсис дода шуд
Дар Осорхонаи миллии Тоҷикистон намоиши ҳунарҳои қадимии миллии халқи тоҷик баргузор гардид
Агентиҳои иттилоотии Иттиҳоди Давлатҳои Мустақил рушди ҳамкориро баррасӣ намуданд
Дар Панҷакент Боғи Абулқосим Фирдавсӣ сохта мешавад
Дар Тоҷикистон беш аз 2 ҳазор муассисаи фарҳангӣ фаъолият менамояд
РУШДИ САЙЁҲӢ. Дар шаҳри Бӯстон барои ҳунармандони истеҳсолкунандаи армуғон озмун эълон гардид
Нақши тоҷикон дар ташаккул ва рушди Роҳи бузурги Абрешим дар Душанбе баррасӣ шуд
«ДУРАХШИ АХТАРОН: ҶОМӢ ВА НАВОӢ». «Тоҷикфилм» ва «Узбекфилм» санҷиши видеоии ҳунарпешаҳоро барои ин филм оғоз намуданд
«ТОҶИКИСТОН-ВАТАНИ АЗИЗИ МАН». Аз 25 то 30 сентябр даври сеюми озмуни ҷумҳуриявӣ баргузор мегардад
Дар Осорхонаи миллии Тоҷикистон доир ба ҳунарҳои мардумӣ намоиш баргузор мегардад