Дар Суди Олии иқтисодии Тоҷикистон ба муносибати Рӯзи забони давлатӣ ҳамоиш доир гардид

ДУШАНБЕ, 27.09.2019/АМИТ «Ховар»/. Имрӯз дар толори Суди Олии иқтисодии Ҷумҳурии Тоҷикистон ба муносибати Рӯзи забони давлатии Ҷумҳурии Тоҷикистон ва 10-солагии  қабули Қонуни Ҷумҳурии Тоҷикистон  «Дар бораи забони давлатии Ҷумҳурии Тоҷикистон» бо иштироки судяҳои Суди Олии иқтисодӣ ва кормандони дастгоҳи судҳои иқтисодии ҷумҳурӣ ҳамоиш баргузор гардид.

Ҳамоиши мазкур ба хотири арҷгузорӣ ба забони давлатӣ, ки ҳамчун рукни муҳимтарини ҳастии миллат, пойдевори асосии давлатдорӣ ва фарҳангу маънавиёт нақши барҷаста дорад, гузаронида шуд.

Иштирокдорон иброз доштанд, ки дар тӯли 28 соли сиҳибистиқлолии мамлакат забони давлатӣ таҳти сиёсати хирадмандонаи Президенти Тоҷикистон Эмомалӣ Раҳмон сол то сол такмил ёфта истодааст.

Дар ҳамоиш маърӯзаҳо ба забонҳои русӣ, тоҷикӣ, ӯзбекӣ, чинӣ ва англисӣ хонда шуданд.

Судяи Суди Олии иқтисодии вилояти Хатлон Толиб Давлатзода дар ҳамоиш иброз намуд, ки «ҳар шаҳрванди Ҷумҳурии Тоҷикистон ба хотири муқаддасоти миллӣ ба забони давлатӣ  бояд арҷ гузорад. Имрӯзҳо дар тамоми мақомоти давлатӣ  ва ниҳодҳои дигари ҷомеа забони давлатӣ мавриди коргузории сиёсиву иҷтимоӣ ва иқтисодӣ қарор гирифта истодааст». 

Сардори Раёсати таъмини ташкили кори судяҳо ва ҷамъбасти амалияи суди оморӣ ва арзу шикоятҳои Суди Олии иқтисодӣ Зуҳуриддин Асрорзода дар бораи забони тоҷикӣ ва истифодаи он чунин ибрози андеша намуд: «Барои эҳёи забони давлатӣ дар давраи давлатдории навини Тоҷикистон нақши Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон  муҳтарам Эмомалӣ Раҳмон хеле бузург мебошад. Зеро маҳз Президенти мамлакат дар минбари Созмони Милали Муттаҳид бо забони шевои тоҷикӣ сухан кардаанд. Забони тоҷикӣ дар баробари сад забони беҳтарини ҷаҳон шинохта шудааст. Дар тамоми дунё зиёда аз 160 млн нафар инсонҳо бо забони шевои тоҷикӣ ва форсӣ муошират мекунанд».

Зикр гардид, ки Пешвои миллат дар китоби «Забони миллат – ҳастии миллат» дар бораи гузашта ва имрӯзи забони мо чунин суханҳои нек гуфтаанд: «Танҳо забон аст, ки дар ҳама давру замон таърихи воқеӣ ва ростини миллатро дар ҳофизаи худ нигоҳ медорад».

Мояи ифтихор аст, ки ёдгориҳои тамаддуни чандинҳазорсолаи ориёӣ маҳз ба воситаи забони шево ва пурғановати тоҷикӣ ва қаринаҳои бостониву аҳди миёнаи он то замони мо расидаанд. Имрӯз оламиён ба он дастрасӣ пайдо намудаанд, ки ин ҳам сабаби ифтихори ворисони ин тамаддуни қадимӣ ва ҳам масъулияти бузурги онҳо дар назди гузашта ва имрӯзу оянда мебошад.

Инчунин зимни ҳамоиш иштирокдорон маърӯзаҳои пурмазмуни хешро доир ба бақои забони миллӣ баён дошта, гиромӣ доштани забони тоҷикиро вазифаи инсониву виҷдонии ҳар фарди бонангу номуси мамлакат шумориданд.

Таъкид гардид, ки забони давлатӣ, дар ҳақиқат, таҷассуми таърихи пуршебу фарози миллати бостонии тоҷик ва сарвати бебаҳои он ба шумор меравад.

Ёдовар мешавем, ки Қонуни Ҷумҳурии Тоҷикистон  «Дар бораи забони давлатии Ҷумҳурии Тоҷикистон» 5 октябри соли 2009  бо фармони Президенти Ҷумҳурии Тоҷикистон Эмомалӣ Раҳмон қабул гардид.