Ғолиби озмуни «Беҳтарин хонандаи китоб» бо 50 000 сомонӣ қадрдонӣ мешавад

Сентябрь 27, 2019 11:45

ДУШАНБЕ, 27.09.2019 /АМИТ «Ховар»/. Дар Муассисаи давлатии  «Китобхонаи миллии Тоҷикистон» озмуни «Беҳтарин хонандаи китоб» ҷараён дорад.

Он дар доираи Озмуни ҷумҳуриявии «Фурӯғи субҳи доноӣ», ки соли равон бо Амри Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон эълон гардидааст, сурат мегирад. Мақсад аз баргузории Озмуни ҷумҳуриявии «Фурӯғи субҳи доноӣ» ҷалби мардум ба китобу китобхонӣ мебошад.

Тавре сардори шуъбаи хизматрасонӣ ба муштариёни Китобхонаи миллии Тоҷикистон Шавкат Аминов  ба хабарнигори АМИТ «Ховар» иттилоъ дод, озмуни мазкур аз рӯи 4 номинатсия гузаронида мешавад: хондану аз ёд кардани осори адабии адибони классики тоҷик, хондану аз ёд кардани осори адибони муосири тоҷик, хондану аз ёд кардани ашъори бачагона, хондану аз ёд кардани асарҳои адабиёти ҷаҳон, ки ба забони тоҷикӣ тарҷума шудаанд.

Тибқи озмуни мазкур, иштирокчиён бояд на кам аз 100 ғазал, 120 рубоӣ, 200 шеър ва 300 хат аз ашъори нависандагони классик ва имрӯзаро донанд.

«Барои ғолибони ҳар як номинатсия маблағҳои калон муайян гардидаанд. Барои ғолиби ҷойи якум 30 000 сомонӣ, ҷойи дуюм 20 000 сомонӣ ва ҷойи сеюм 15 000 сомонӣ маблағ муайян шудааст. Маблағи Шоҳҷоиза 50 000 сомониро ташкил медиҳад, ки он  дар ҷамъбасти озмун ба нафаре, ки зиёда аз 70 фоизи номинатсияҳои номбаршударо донад, тақдим карда мешавад»,-иброз намуд Шавкат Аминов.

Тавре ҳамсуҳбати мо зикр намуд, дар назди китобхона вазифа гузошта шудааст, ки хизматрасонӣ ба муштариён бояд ба сатҳи олӣ ҷавобгӯ бошад. Аз ин рӯ дар ошёнаи аввали Китобхонаи миллӣ котибот бо шахсони  масъул ҷой дорад, ки онҳо бо роҳи фаҳмондадиҳӣ ба шахсоне, ки мехоҳанд дар номинатсия иштирок кунанд, хизмат мерасонанд. Инчунин дар даромадгоҳи китобхона овезаҳо оид ба  озмуни мазкур ҷой дода шудаанд.

«Дар баробари ин дар ошёнаи дуюми китобхона, дар назди шуъбаи хизматрасонӣ бо муштариён толори «Фурӯғи субҳи доноӣ» ташкил шудааст, ки дар он зиёда аз 120 ҷои нишаст ва теъдоди зиёди китобҳо оид ба 4 номинатсия, аниқтараш 300 китоб барои дархости хонандагон мавҷуданд. Он нафароне, ки дар ноҳияву вилоятҳо аз даврҳои ин озмун гузаштаанд, айни ҳол ба ҷамъбасти озмун омодагӣ дида истодаанд. Даври ҷамъбастии озмун моҳи декабр дар Китобхонаи миллӣ гузаронида мешавад», -мегӯяд Ш. Аминов

Дар Китобхонаи миллӣ барои мизоҷон тамоми хизматрасонӣ ройгон аст ва барои осону беҳтар намудани сифати кор зиёда аз 200 нусха китоб ба шакли электронӣ (PDF) гардонида шудаанд, ки хонанда метавонад аз онҳо озодона истифода намояд.

Китоб муаррифи халқу миллатҳо дар арсаи олам мебошад.  Китобхонаи миллии Тоҷикистон яке аз дастовардҳои бузурги даврони истиқлолият мебошад, ки бевосита ба баланд бардоштани маърифати наврасону ҷавонон таъсири мусбати худро мерасонад.

Мақсад аз баргузории озмуни мазкур боз ҳам санҷидану баланд бардоштани савияи дониши наврасону ҷавонон ва дӯстдорони китоб мебошад. Инчунин рӯ овардан ба адабиёти ҷаҳонӣ дар баробари хондану аз бар кардани асарҳои адибони тоҷик ғояи тарбиявӣ дошта, донишу маърифати хонандагонро баланд мебардорад ва ба  ҷавонони мо  таъсири мусбат мерасонад.

Мавриди зикр аст, ки дар асоси Амри Президенти мамлакат муҳтарам Эмомалӣ Раҳмон вобаста ба баргузории Озмуни ҷумҳуриявии «Фурӯғи субҳи доноӣ» дар тамоми китобхонаҳои мамлакат ситоди ҷумҳуриявӣ ташкил гардидааст. Мақсади ин ситодҳо  аҳолиро бо китоб таъмин намудан мебошад. Дар радифи ин аз ҷониби Вазорати фарҳанг ва Китобхонаи миллӣ ҳамаи номгӯи китобҳое, ки дар рӯйхати озмун оварда шудаанд, дар шакли электронӣ омода ва ба тамоми китобхонаҳои ҷумҳурӣ ирсол карда шудаанд.

София ШОИК,
АМИТ «Ховар»

Сентябрь 27, 2019 11:45

Хабарҳои дигари ин бахш

«ЗАБОНИ САЪДИЮ ҲОФИЗ, ЗАБОНИ РӮДАКӢ ҲАСТӢ…». Ба нобиғаҳои адабиёт арҷ гузорем, ки дар нигоҳдории забони тоҷикӣ нақши муҳим доранд
«ЗАБОНИ МИЛЛАТ-ҲАСТИИ МИЛЛАТ». Китоби Президенти Тоҷикистон ба забонҳои маъруфи ҷаҳон-русӣ, англисӣ ва чинӣ тарҷума гардид
«АЗ ҚАСРИ АРБОБ ТО МАЙДОНИ ИСТИҚЛОЛ». Шумораи идонаи рӯзномаи «Ҷумҳурият» дар ҳаҷми 70 саҳифа нашр шуд
Доир ба нақши Президенти Тоҷикистон дар танзими масоили Афғонистон китоби нави Муҳаммадӣ Сафолзода ба нашр расид
ЗАБОНИ ТОҶИКӢ-ЗАБОНИ СИЁСАТУ ҚОНУНГУЗОРӢ ВА КОРГУЗОРИВУ МУОШИРАТ. Ба ифтихори он дар Хадамоти гумрук маҷлиси тантанавӣ доир шуд
Нақши Пешвои миллат дар рушду густариши забони тоҷикӣ ба ҳайси забони давлатӣ беназир аст
Дар Теҳрон Рӯзҳои фарҳанги Тоҷикистон дар Эрон ифтитоҳ гардиданд
Дар Хадамоти иҷро ба муносибати Рӯзи забони давлатӣ ҳамоиш доир гардид
«ЗАБОН ВА ИСТИҚЛОЛ». Таҳти чунин унвон Конференсияи илмию амалии ҷумҳуриявӣ доир шуд
Сафири Тоҷикистон дар Россия бо донишҷӯёни тоҷик ва аъзои Шӯрои ҷамъиятии назди сафорат мулоқот намуд
Доир ба рушди забони давлатӣ дар солҳои соҳибистиқлолии Тоҷикистон конференсияи илмӣ барпо шуд
«…Забони тоҷикӣ-каломи Рӯдакиву Фирдавсӣ, Саъдиву Ҳофиз…,- бардошт аз конфронси ҲХДТ дар Осорхонаи миллии Тоҷикистон