Дар Душанбе озмуни «Нон шудам, шоистаи ҳар хон шудам» баргузор мегардад

ДУШАНБЕ, 16.10.2019./АМИТ «Ховар»/.  Дар шаҳри Душанбе  озмуни нон ва маҳсулоти нонӣ таҳти унвони «Нон шудам, шоистаи ҳар хон шудам»  баргузор мегардад. Бо қарори Раиси шаҳри Душанбе Рустами Эмомалӣ аз 15 октябри соли 2019  ҳайати аъзои гурӯҳи корӣ ва нақшаи чорабиниҳо оид ба омодагӣ ва  баргузории озмуни мазкур  тасдиқ гардид.

Дар ин бора аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд.

«Иқдоми мазкур  бо мақсади иҷрои банди 27 «Ҷадвали баргузории фестивал, намоиш, ид ва озмунҳои анъана ва ҳунарҳои мардумӣ дар Ҷумҳурии Тоҷикистон барои солҳои 2019-2021, ки бо амри Президенти Ҷумҳурии Тоҷикистон аз 13 декабри соли 2018 тасдиқ гардидааст, роҳандозӣ мегардад», — илова намуд манбаъ.

Раиси шаҳр   масъулини соҳаро вазифадор намудааст, ки ҷиҳати дар сатҳи баланди фарҳангию ташкилӣ доир намудани озмуни мазкур дар даврҳои ноҳиявию шаҳрӣ тадбирҳои дахлдор андешанд.

Даврҳои якум ва дуюми озмун тибқи муқаррароти Низомномаи озмуни ҷумҳуриявии нон ва маҳсулоти нонӣ таҳти унвони «Нон шудам, шоистаи ҳар хон шудам» дар Ҷумҳурии Тоҷикистон барои соли 2019, ки бо фармоиши Роҳбари Дастгоҳи иҷроияи Президенти Ҷумҳурии Тоҷикистон аз 10 июни соли 2019  тасдиқ шудааст, ташкилу баргузор карда  мешаванд.

Барои муайян кардани ғолиби озмун синни аз 18 боло муқаррар гардида, иштироки мардону занон маҳдуд карда намешавад. Зимни муайян кардани ғолибон ба сифати нон ва маҳсулоти нони миллӣ ва ороиши он бо маҳсулоти гуногун ва дигар шартҳо диқкати махсус дода мешавад.

Бояд ёдовар шуд, ки ҳадафи асосии баргузории ин озмун аз эҳёи анъанаҳои миллӣ ва оммавӣ гардонидани суннатҳои беҳтарини нонпазии ниёгон, тарғиби эҳтиром ба нон ва ҳунари нонпазӣ, намоиши пухтани навъҳои гуногуни нони минтақаҳои мамлакат, ҳавасмандкунии шаҳрвандон барои сарфакорона ва моҳирона пухтани навъҳои гуногуни нони минтақаҳои ҷумҳурӣ, ба наслҳои оянда мерос гузоштани тарзу усули пухтани он, ҳарчӣ бештар эҳё ва тарғибу ташвиқ кардани намудҳои нон ва маҳсулоти нонии парҳезӣ дар вилоят, шаҳру ноҳия, ҷамоатҳои шаҳраку деҳот, деҳа ва маҳаллаҳо иборат мебошад.

Ёдовар мешавем, ки чанд сол аст, ки  дар пойтахт Озмуни  маҳсулоти нонӣ таҳти унвони «Нон шудам, шоистаи ҳар хон шудам» бо шукӯҳи хосса баргузор  мегардад.

Дар озмуни  мазкур нонпазҳо ба сокинону меҳмонони пойтахт тарзи тайёр кардани нони  тоҷикӣ, аз қабили чаппотӣ, сатрӣ, кулчаи хурду калон, фатир, таҳмол, орзуқ, фатири қад-қад, қалама, ҳалвои сурху сафед ва дигар маҳсулоти аз орди гандум тайёршавандаро пешниҳод намуданд.

Иштирокдорони озмунҳои маҳсулоти нонӣ ҳамчунин  ороиши дастурхони намояндагони   ноҳияҳои пойтахтро  тамошо карда, ба ҳунари волои кадбонувони тоҷик баҳои баланд  дода, аз хӯрдани  нони тоҷикӣ лаззат мебаранд.

Хотиррасон мешавем, ки  2 августи соли равон  дар Боғи фарҳангу фароғати ба номи Абулқосими Фирдавсӣ бо ташаббуси мақомоти иҷроияи ҳокимияти давлатии шаҳри Душанбе даври шаҳрии озмуни нон ва маҳсулоти нонӣ таҳти унвони «Нон шудам, шоистаи ҳар хон шудам» баргузор гардид.

Дар ҷамъбасти озмун мақомоти иҷроияи ҳокимияти давлатии ноҳияи Сино бо 306 хол соҳиби ҷои аввал, ноҳияи Фирдавсӣ бо 288 хол сазовори мақоми дуюм ва ноҳияи Исмоили Сомонӣ бо ба даст овардани 283 хол ба дарёфти ҷои сеюм мушарраф гардиданд.