Дар Хуҷанд Бизнес — форуми сайёҳии Тоҷикистону Қирғизистон доир мегардад

ДУШАНБЕ, 02.10.2019. /АМИТ «Ховар»/. Дар партави дастуру ҳидоятҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо ташаббуси Кумитаи рушди сайёҳӣ 5 октябр дар шаҳри Хуҷанди вилояти Суғд Бизнес-форуми ширкатҳои сайёҳии Тоҷикистону Қирғизистон доир мегардад, хабар медиҳад АМИТ «Ховар».

Бино ба иттилои Кумитаи рушди сайёҳии назди Ҳукумати Ҷумҳурии Тоҷикистон, мақсад аз гузаронидани Бизнес — форум истифодаи самараноки таҷрибаи кишварҳои якдигар, муҳайё намудани шароит барои рушди соҳибкорию тиҷорати сайёҳӣ, ташкили курсҳои кӯтоҳмудати омӯзишӣ барои кормандони субъектҳои хоҷагидори соҳаи сайёҳӣ, тарабхонаҳо, меҳмонхонаҳо, осоишгоҳҳо, марказҳои дилхушӣ, дарёфти роҳҳои муосири тарғибу ташвиқи имкониятҳои сайёҳии кишварҳои ҳамдигар тавассути воситаҳои имконпазири иттилоотӣ мебошад.

Ҳамчунин дар ҷараёни Бизнес — форум ширкатҳои сайёҳии ватанӣ бо ҳамтоёни худ созишномаҳои ҳамкорӣ ва ёддошти тафоҳум ба имзо мерасонанд.

Бояд зикр намуд, ки бо назардошти рушди соҳаи сайёҳӣ ва зарфияту имкониятҳои фаровони давлатҳо дар ин самт, фаъол намудани ҳамкорӣ дар бахшҳои сайёҳии солимгардонӣ, таърихӣ ва варзишӣ муҳим арзёбӣ мегардад.

Ҳукумати Тоҷикистон ба масъалаи рушду тавсеаи бештари ҳамкории дуҷонибаи Тоҷикистон ва Қирғизистон дар заминаи дӯстию ҳамсоягии нек доир ба рафтуомади шаҳрвандони ду давлат ба қаламрави ҳамдигар, сафарҳои сайёҳӣ, инчунин ҳалли масъалаҳои марбут ба онҳо таваҷҷуҳи хоса зоҳир менамояд.

Дар Тоҷикистон низоми мусоиди воридшавӣ ва будубоши сайёҳон амал карда, ислоҳоти муҳим роҳандозӣ гардида истодааст.

Имрӯзҳо ҳамкории байни ширкатҳои сайёҳии Тоҷикистону Қирғизистон дар сатҳи зарурӣ ба роҳ монда шуда, хатсайрҳои минтақавӣ амалӣ шуда истодаанд.

Ин омил имконият медиҳад, ки сайёҳон зимни саёҳати худ якбора аз се давлат- Тоҷикистон, Қирғизистон ва Ӯзбекистон дидан намоянд.