Дар вилояти Суғд Иди Меҳргон дар сатҳи баланд таҷлил гардид

ДУШАНБЕ, 14.10.2019. /АМИТ «Ховар»/. Яке аз идҳои қадимтарини тоҷикон – Меҳргонро сокинони вилояти Суғд низ дар сатҳи баланд таҷлил намуданд. Ин ҷашни аҷдодӣ дар майдони назди Театри мусиқӣ-мазҳакавии ба номи Камоли Хуҷандӣ  ҷашн гирифта шуда, дар намоишгоҳи он намояндагони шаҳру ноҳияҳои вилоят дастранҷи хешро ба маъраз гузоштанд.

Раиси вилояти Суғд Раҷаббой Аҳмадзода зимни иштирок дар намоиши  мазкур иброз дошт, ки Меҳргон муждаи аввалини тирамоҳи зарнисор аст, ки моро ба истиқрори сулҳу ваҳдат, якдигарфаҳмӣ, барафрохтани чароғи дӯстиву рафоқат, ба ҷо овардани амалҳои хайру савоб ва худшиносиву худогоҳӣ ҳидоят менамояд.

Таъкид гардид, ки маҳз бо ташаббусҳои шоистаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ойину ҷашнҳои миллӣ ва арзишҳои фарҳангие, ки ваҳдату ягонагии маънавии мардумро таҳким мебахшанд, дар давраи истиқлолияти давлатӣ аз нав эҳё гардида, бо шукӯҳу шаҳомати хосса таҷлил мегарданд. Ба истиқболи ин рӯзи муборак пахтакорон, ғаллакорон, боғу токпарварон, чорводорон ва механизаторони меҳнатқарин бо ғайрати дучанд заҳмат кашида, баҳри пешрафти иқтисодиёти мамлакат саҳми арзанда мегузоранд.

Рушду пешрафти ин соҳаи афзалиятноки хоҷагии халқ барои инкишофи ояндаи иқтисодиёти ватанамон хеле муҳим аст ва чун таҳкурсии мустаҳкам хизмат мекунад.

Изҳори боварӣ карда шуд, ки таҷлили бошукӯҳи Меҳргон дар марҳилаи сифатан нави ҳаёти сиёсӣ, иҷтимоӣ ва фарҳангӣ ҷиҳати омодагӣ ба ҷашни мубораку муқаддаси 30-солагии Истиқлолияти давлатии Ҷумҳурии Тоҷикистон ва баланд бардоштани нуфузу эътибори давлати азизамон мусоидат хоҳад намуд.