МАРДИ НАКӮНОМ НАМИРАД ҲАРГИЗ. Ангурпарвари маъруфи Тоҷикистон Ҳоҷӣ Камол аз олам даргузашт

Октябрь 4, 2019 11:32

ДУШАНБЕ, 04.10.2019. /АМИТ «Ховар»/. Субҳи имрӯз деҳқони ботаҷриба ва ангурпарвари маъруфи Тоҷикистон Камол МАДУМАРОВ дар синни 80 солагӣ аз олам даргузашт.

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо писари калонии марҳум Камол Мадумаров телефонӣ дар тамос шуда, бо изҳори ҳамдардии амиқ ба аҳли хонадони шодравон ва наздикону пайвандон аз даргоҳи Худованди муттаъол сабри ҷамил хостанд.

Камол Мадумаров 10 феврали соли 1940 дида ба олами ҳастӣ кушода, аз овони хурдӣ нисбат ба замин ва бунёди боғ муҳаббати беандоза дошт.  Аҳли хонаводаи Камол Мадумаров бо назардошти мувофиқи иқлим будани парвариши ангур ва даромаднокии он то соли 1989 дар миқёси замини наздиҳавлигии хеш ангурпарварӣ мекарданд. Баъди соли 1989 панҷ гектар замин ба иҷора гирифта, оҳиста-оҳиста масоҳати боғи ангурро зиёд мекунанд.  Соли 2008 бо ташаббус ва дастгирии бевоситаи Пешвои миллат  муҳтарам Эмомалӣ Раҳмон ба хоҷагии деҳқонии онҳо — «Боғи Сомон», 500 гектар замин ҷудо карда шуд. Дар хоҷагии деҳқонии «Боғи Сомон» ба парвариши навъҳои гуногуни ангур таваҷҷуҳи махсус зоҳир гашта, бештар ангури «Ҳусайнии сафед» парвариш карда мешавад, ки зиёда аз 70%-и масоҳати умумии токзорро ташкил медиҳад. Инчунин онҳо навъҳои «Чиллагӣ»,  «Шоҳона», «Ангушти хонум», «Ғалаба» ва ғайраҳоро парвариш мекунанд.

Дар хоҷагии деҳқонии «Боғи Сомон», ки бо ташаббус ва заҳмати софдилонаи деҳқони асил Камол Мадумаров ташкил шудааст, зиёда аз 1100 нафар саҳмдорон фаъолият мекунанд.

Мавриди зикр аст, ки Камол Мадумаровро на танҳо сокинони шаҳри Турсунзода, балки тамоми ҷумҳурӣ  чун Ҳоҷӣ Камол, деҳқони номдор ва ангурпарвари маъруф мешиносанд. Меҳру муҳаббате, ки вай нисбат ба замин, ба ҳар зарра хоки ганҷбор дорад, ӯро ба сатҳи хеле баланд, яъне ба мартабаи деҳқони асил, ангурпарвари номӣ, пири кор расондааст. Суҳбатҳои гарму самимии Президенти Ҷумҳурии Тоҷикистон муҳтарам Эмомалӣ Раҳмон бо ин ангурпарвари номдор на як бору ду бор ба вуқӯъ пайвастаанд. Заҳматҳои шабонарӯзиаш, дилу нияти некаш, боғдорию боғпарвариаш ӯро соҳибобрӯ ва соҳибэҳтиром кардаанд.

Саҳми ин марди соҳибҳунар ва инсони накӯ дар корҳои созандагию бунёдкорӣ ва хайру сахо низ назаррас аст.

Ҳоҷӣ Камол Мадумаров дар шаҳри Турсунзода мактаби асосии рақами 92-ро аз ҳисоби даромади дастранҷи боғпарварии хеш бунёд кард, ки имрӯз садҳо толибилм дар ин макони маърифат дониш меомӯзанд. Ҳамзамон, пайваста барои Фонди рушди деҳот, Фонди хайриявии ҷумҳурӣ ва дигар корҳои хайр кумаки молиявӣ расонида, дар таъмиру навсозии роҳҳои дорои аҳамияти маҳаллӣ низ саҳм гузоштааст.

Сокинони деҳаи Бобониёз Тошев, ки солҳои зиёд ба оби тозаи ошомиданӣ  ниёз доштанд, бо ташаббуси Ҳоҷӣ Камол аз ҳисоби маблағҳои софи хоҷагӣ бо маблағи 20 ҳазор доллари ИМА чоҳ канда, бо оби тозаи нӯшокӣ таъмин карда шуданд. Ғайр аз ин, бинои як боғчаи вайрона ва аз кор мондаро харида, ба сарбозони Вазорати мудофиаи мамлакат туҳфа намуд.

Бо назардошти ташкили боғоти намунавии ангур ва парвариши навъҳои беҳтарини он меҳмонони сатҳи олӣ ва ҳайатҳои расмии хориҷӣ зимни ташриф ба Ҷумҳурии Тоҷикистон аз токзори хоҷагии деҳқонии Ҳоҷӣ Камол дидан мекунанд. Аз ҷумла, Президенти Ҷумҳурии Ӯзбекистон Шавкат Мирзиёев аз боғҳои ангури хоҷагии деҳқонии «Боғи Сомон» дидан намуда, ба ин хоҷагӣ мошини сабукрав тақдим намуд.

Саъдии бузургвор дуруст фармуда, ки «марди накуном намирад ҳаргиз». Албатта, Соҳибҳунарӣ, инсондӯстӣ, накӯкорӣ ва рафтори намунавии Ҳоҷӣ Камол номи ӯро ба накӯӣ ҷовидона хоҳад дошт.

Октябрь 4, 2019 11:32

Хабарҳои дигари ин бахш

ҲИФЗИ СИРРИ ДАВЛАТӢ ВА ҲИФЗИ ТЕХНИКИИ ИТТИЛООТ. Роҳбарони дастгоҳҳои шаҳру ноҳияҳои тобеи ҷумҳурӣ такмили ихтисос намуданд
35-СОЛАГИИ ИСТИҚЛОЛИ ДАВЛАТӢ. Дар деҳаи Долонаи Ашт мактаб ва бунгоҳи тиббӣ сохта мешавад
Дар Душанбе вобаста ба нақши қонунҳои миллӣ дар таъмини зиндагии шоистаи мардум конференсияи илмӣ — назариявӣ доир гардид
Дар ташкилоти ибтидоии ҳизбии «Заминсоз» маҷлиси ҳисоботӣ-интихоботӣ баргузор шуд
Дар Вазорати тандурустӣ ва ҳифзи иҷтимоии аҳолӣ масъалаи ошкорсозӣ ва бақайдгирии гепатитҳои вирусӣ баррасӣ гардид
Тоҷикистон ва Туркия бо мақсади рушди инфрасохтори соҳаи кор бо ҷавонон ва варзиш ҳамкориро тақвият медиҳанд
Риояи талаботи муқаррароти қонунҳои миллӣ дар Бонки миллии Тоҷикистон шарҳу тавзеҳ дода шуд
Дар Вазорати меҳнат, муҳоҷират ва шуғли аҳолӣ вобаста ба татбиқи Стратегияи давлатии муқовимат бо коррупсия вохӯрӣ доир гардид
Дар Душанбе маҷлиси Раёсати Кумитаи Иҷроияи Марказии Ҳизби Халқии Демократии Тоҷикистон баргузор гардид
Дар Кооперативи тиҷоратии ба номи Латиф Муродови шаҳри Ҳисор дар майдони 210 гектар кишти такрорӣ мегузаронанд
Дар Суғд биноҳои иловагии Маркази клиникавии эндокринологӣ ва Маркази саратоншиносӣ сохта мешавад
Дар оянда мусофирон дар фурудгоҳҳои Тоҷикистон сарҳадро тавассути «дарвозаи электронӣ» убур менамоянд