Шукурҷон Зуҳуров бо Нуридин Исмоилов мулоқот намуд

Октябрь 8, 2019 10:22

ДУШАНБЕ, 08.10.2019. /АМИТ «Ховар»/. 7 октябр ҳайати парлумонии Маҷлиси намояндагони Маҷлиси Олии Ҷумҳурии Тоҷикистон  таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров бо даъвати Раиси палатаи қонунбарори Олий Маҷлиси Ҷумҳурии Ӯзбекистон Нуридин Исмоилов аз Ҷумҳурии Ӯзбекистон дидан намуд.

Дар доираи ин сафар Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров бо ҳамтои худ — Раиси палатаи қонунбарори Олий Маҷлиси Ҷумҳурии Ӯзбекистон Нуридин Исмоилов мулоқот намуд.

Зимни мулоқоти судманду самимӣ Шукурҷон Зуҳуров ба  ҳамтои худ барои даъвати боздид аз Ҷумҳурии Ӯзбекистон ва истиқболи гарму самимӣ изҳори сипос кард.

Бешубҳа, омили муҳими робитаҳои дуҷонибаи парлумонӣ сафарҳои ҳайатҳои парлумонӣ ба шумор мераванд.

“Мо шодем, ки Шумо барои мо ин имконеро фароҳам овардед, ки расман аз Ҷумҳурии Ӯзбекистон боздид ба амал орем. Сафари Шумо ба Тоҷикистон ва боздиди мо аз Ӯзбекистон —  ин боз як нишондиҳандаи муносибатҳо дар сатҳи олӣ миёни ду давлат аст, ки ба он на танҳо муносибатҳои байнидавлатӣ ва байниҳукуматӣ, балки робитаҳои парлумонӣ низ мусоидат мекунанд.

Мо бояд кӯшиш намоем, ки робитаҳои байнипарлумонии Тоҷикистон ва Ӯзбекистон ба сатҳи сифатан нав боло рафта, ҳам дар қолаби дуҷониба ва ҳам чаҳорчӯби созмонҳои байналмилалии парламонӣ рушд кунанд. Онҳо дар оянда низ дар тақвияти муносибатҳои иқтисодӣ, башардӯстӣ ва фарҳангӣ, густариши робитаҳои байниминтақавӣ нақши муҳим хоҳанд бозид”,-иброз дошт Шукурҷон Зуҳуров.

Зимни мулоқот зикр шуд, ки Ӯзбекистон ва Тоҷикистонро таърих ва фарҳанги муштарак, ягонагии арзишҳои маънавӣ ба ҳам мепайванданд. Халқҳои мо аз қадимулайём паҳлӯ ба паҳлӯи ҳам зиндагонӣ мекарданд. Ва ин анъанаҳои ҳамсоягиву муносибатҳои дуҷониба имрӯз бояд ба унвони як пояи маҳкаму устувор барои ҳамкорӣ бошанд.        Тоҷикистон ва Ӯзбекистон дар қолаби СММ, ИДМ, СҲШ ва дигар ташкилотҳои калидии байналмилаливу минтақавӣ дидгоҳҳои худро дар ҳалли масъалаҳои муҳими минтақавӣ ва байналмилалӣ ҳамоҳанг мекунанд.

Мо ба ин назарем, -гуфт Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров, ки Ӯзбекистон шарики стратегии Тоҷикистон аст ва ба мо лозим аст ин муносибатҳоро аз тариқи робитаҳои парлумонӣ тақвият бахшем. Мо аз тарафи худ барои робитаҳои ҳамаҷониба бо ҳамкорони бародари ӯзбек омодаем.

Дар мулоқот ҳамчунин ҷонибҳо таъкид намуданд, ки ҷараёни инкишофи ҳамкории тиҷоратию иқтисодӣ ва гуманитарии байни Тоҷикистону Ӯзбекистон бо назардошти манфиатҳои мутақобилан муфид ба роҳ монда шуда, муносибатҳои дуҷонибаи сиёсӣ мустаҳкам мегарданд.

Пас аз мулоқот миёни Маҷлиси намояндагон ва Палатаи  қонунгузории Олий Маҷлиси Ҷумҳурии Ӯзбекистон «Созишнома байни Маҷлиси намояндагони Маҷлиси Олии Ҷумҳурии Тоҷикистон ва Палатаи қонунгузори Олий Маҷлиси Ҷумҳурии Ӯзбекистон оид ба ҳамкории байнипарламентӣ» аз ҷониби Раиси Маҷлиси намояндагон Шукурҷон Зуҳуров ва Раиси Палатаи қонунгузори Олий Маҷлиси Ҷумҳурии Ӯзбекистон Нуридинҷон Исмоилов ба имзо расид.

Ёдовар мешавем, ки дар мулоқот ҳайати парлумонии Маҷлиси намояндагон – роҳбари дастгоҳи Маҷлиси намояндагон Мизроб Кабиров, вакилони Маҷлиси намояндагон Зуфар Исмоилзода, Ориф Ҳакимов, Мавзуна Шамсиддинзода ва Сафири Фавқулода ва Мухтори Ҷумҳурии Тоҷикистон дар Ҷумҳурии Ӯзбекистон Содиқ Эмомӣ иштирок намуданд.

Октябрь 8, 2019 10:22

Хабарҳои дигари ин бахш

Тадбирҳои мубориза бо муҳоҷирати ғайриқонунӣ дар давлатҳои аъзои Созмони Аҳдномаи амнияти дастҷамъӣ пешниҳод гардиданд
Дар Душанбе вазъ ва дурнамои ҳамкории байнипарлумонии Тоҷикистон ва Гурҷистон баррасӣ шуд
Рустами Эмомалӣ ба Валентина Матвиенко ва Вячеслав Володин барқияи изҳори тасаллӣ ирсол намуданд
БАР ЗИДДИ ИФРОТГАРОИВУ ТЕРРОРИЗМ САРҶАМЪОНА МУБОРИЗА БАРЕМ. Андешаҳо дар ҳошияи мулоқоти Президенти Тоҷикистон бо намояндагони ҷомеа ва ходимони дин
Дар Маҷлиси намояндагони Маҷлиси Олии Ҷумҳурии Тоҷикистон созишномаҳо ба тасвиб расиданд
САРМОЯИ ИНСОНӢ. Рушд ва самаранокии истифодаи сармояи инсонӣ барои давлату Ҳукумат аҳамияти аввалиндараҷа дорад
Дар Маҷлиси намояндагони Маҷлиси Олии Ҷумҳурии Тоҷикистон Рӯзи Модар пуршукуҳ таҷлил гардид
НАҚШИ ЗАНОН ДАР ПАРЛУМОНИ ТОҶИКИСТОН. 8 зан аъзои Маҷлиси миллӣ ва 16 нафар вакили Маҷлиси намояндагон мебошанд
Дар Душанбе бахшида ба Соли маърифати ҳуқуқӣ ҳамоиш баргузор гардид
Имрӯз дар шаҳри Душанбе иҷлосияи ҳабдаҳуми Маҷлиси миллии Маҷлиси Олии Ҷумҳурии Тоҷикистон, даъвати шашум баргузор гардид
Дар Маҷлиси намояндагони Маҷлиси Олии Ҷумҳурии Тоҷикистон созишномаҳо ба тасвиб расиданд
Дар Душанбе ҷаласаи Шурои Маҷлиси миллии Маҷлиси Олии Ҷумҳурии Тоҷикистон баргузор гардид