Шукурҷон Зуҳуров ва Вячеслав Володин масъалаи рушди ҳамкории байнипарлумонии Тоҷикистон ва Россияро баррасӣ намуданд

Октябрь 19, 2019 13:12

ДУШАНБЕ, 19.10.2019. /АМИТ «Ховар»/. Дар шаҳри Душанбе масъалаи рушди ҳамкории байнипарлумонии Ҷумҳурии Тоҷикистон ва Федератсияи Россия баррасӣ гардид.

Тавре мухбири АМИТ «Ховар» иттилоъ медиҳад, масъалаи мазкур имрӯз зимни мулоқоти Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров ва Раиси Думаи давлатии Федератсияи Руссия Вячеслав Володин муҳокима шуд.

Шукурҷон Зуҳуров зикр намуд, ки сатҳи баланди ҳамкории мутақобила ва шарикии стратегии Тоҷикистону Россияро заминаи мустаҳками ҳуқуқӣ ва доираи васеи масъалаҳое, ки дар назди парлумонҳои ду ҷониб қарор доранд, тасдиқ мекунанд.

«Давоми 27 соли барқарор гардидани муносибатҳои дипломатӣ давлатҳои мо тавонистанд низоми қавӣ ва ҳамаҷонибаи шарикии стратегии дуҷонибаро дар асоси шаффофият, эътимод ва ҳамкории баробар бунёд кунанд», — афзуд мавсуф.

Зикр шуд, ки миёни ҳарду давлат дар соҳаҳои сиёсӣ, тиҷоративу иқтисодӣ, гуманитарӣ, низомӣ ва ҳарбӣ-техникӣ ҳамкории судманд ба роҳ монда шудаанд. «Ин ҳамкорӣ асосан аз принсипҳо ва уҳдадориҳои Шартномаи дӯстӣ, ҳамкорӣ ва кумаки мутақобилаи Россияву Тоҷикистон ва дигар ҳуҷҷатҳои дуҷониба сарчашма мегиранд», — гуфта шуд дар мулоқот.

Ҷонибҳо омодагии худро ҷиҳати рушди ҳамкории байнипарлумонӣ, афзудани муколамаи сиёсӣ ва густариши  ҳамгироӣ дар масъалаҳои муҳимтарини рӯзномаи байналмилалӣ баён доштанд.

Шукурҷон Зуҳуров афзуд, ки «мо  ҷонибдори таҳким ва рушди минбаъдаи ҳамкорӣ дар соҳаи маориф, аз ҷумла тавассути ташкили муассисаҳои таълимӣ ва мактабҳои таҳсилоти ҳамагонӣ бо забони таълимии русӣ ҳастем».

Дар фарҷоми мулоқот мусоҳибон бо дахли он, ки Тоҷикистону Россия дар доираи созмонҳои байналмилалӣ ва минтақавӣ ҳамкории зич доранд, хоҳони густариши ин робитаҳо дар соҳаҳои илму маориф, фарҳангу санъат, тандурустӣ, варзиш ва саӣёҳӣ гардиданд.

Мавриди зикр аст, ки Раиси Думаи давлатии Федератсияи Россия Вячеслав Володин инчунин ба Донишгоҳи славянии Россияву Тоҷикистон ташриф оварда, бо устодону донишҷӯёни он мулоқот анҷом дод.

Зимнан, гуфтанист, ки субҳи имрӯз дар Қасри миллат Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Раиси Думаи давлатии Федератсияи Россия Вячеслав Володинро, ки бо сафари расмӣ дар Тоҷикистон қарор дорад, ба ҳузур пазируфтанд.

Ёдовар мешавем, ки ҳайати Думаи давлатии Федератсияи Россия  аз Осорхонаи миллии Тоҷикистон ва «Кохи Наврӯз» низ дидан менамояд.

Октябрь 19, 2019 13:12

Хабарҳои дигари ин бахш

Дар Душанбе бахшида ба Рӯзи Маҷлиси Олӣ — Парламенти Ҷумҳурии Тоҷикистон маҷлиси тантанавӣ баргузор гардид
Вакили Маҷлиси намояндагон дар Ню-Йорк дар иҷлосияи сатҳи баланди СММ оид ба бемории сил иштирок намуд
26 сентябр Рӯзи Маҷлиси Олӣ — парламенти Ҷумҳурии Тоҷикистон эълон гардидааст
Дар Сеул ҳамкории байнипарлумонии Тоҷикистон ва Ҷумҳурии Корея муҳокима гардид
Раиси Маҷлиси намояндагон дар ҷаласаи махсус оид ба ҳамкории иқтисодии Осиёи Марказӣ ва Ҷумҳурии Корея иштирок намуд
Маҳмадтоир Зокирзода: «Тоҷикистон ба ҷалби имконоти сармоягузории Корея ба бахшҳои гуногуни иқтисодӣ манфиатдор мебошад»
Маҳмадтоир Зокирзода дар Конфронси якуми раисони парлумонҳои давлатҳои «Осиёи Марказӣ-Ҷумҳурии Корея» иштирок менамояд
Робитаҳои байнипарлумонии Тоҷикистон ва Туркманистон рушд меёбанд
Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо Раиси Сенати Олий Мажлиси Ҷумҳурии Узбекистон муҳтарам Танзила Нарбаева мулоқот намуданд
Дар ноҳияи Кӯшониён вакили мардумӣ бо интихобкунандагон мулоқот намуд
Дар Маҷлиси намояндагон ҷашни Истиқлолияти давлатӣ ботантана таҷлил гардид
Вакилони Маҷлиси намояндагон бо кормандони неругоҳи «Бойғозӣ» оид ба 32-солагии Истиқлолияти давлатӣ суҳбат намуданд