Ҳизбиёни Хатлон ба муносибати 25-умин солгарди таъсиси ҲХДТ 3 китоби нав ба нашр расониданд

Декабрь 13, 2019 16:40

ДУШАНБЕ, 13.12.2019 /АМИТ «Ховар»/. Бахшида ба 25-умин солгарди таъсиси Ҳизби Халқии Демократии Тоҷикистон Кумитаи иҷроияи ҳизб дар вилояти Хатлон се китоби тозанашрро ба табъ расонид. Дар ин бора ба АМИТ«Ховар» аз  шуъбаи таблиғот, иттилоот ва таҳлили Кумитаи  иҷроияи ҲХДТ дар вилояти Хатлон хабар доданд.

Китоби якум, ки «25 соли Ҳизби Ҳалқии Демократии Тоҷикистон дар вилояти Хатлон (марҳилаи бавуҷудоӣ, ташаккул ва рушд)» ном дорад, аз аввали таъсиси сохторҳои ҳизб дар шаҳру навоҳии вилояти Хатлон, марҳилаҳои ташаккул, мустаҳкамшавии мавқеи ҳизб дар ҷомеа, боло рафтани нуфузи ҳизб ва фаъолиятҳои босамари сохторҳои ҳизб дар солҳои охир нақл мекунад. Китоби мазкур зери назари умумии муовини якуми Раиси ҲХДТ Саидмурод Фаттоҳзода ба чоп расидааст.

Муаллифони китоб раиси Кумитаи иҷроияи ҲХДТ дар вилояти Хатлон Абдулло Раҳмонзода ва муовини раиси Кумитаи иҷроияи ҲХДТ дар вилояти Хатлон Неъматулло Иброҳимзода мебошанд. Дар пешгуфтори китоби мазкур муаллифон зикр намудаанд, ки Кумитаи иҷроияи Ҳизби Халқии Демократии Тоҷикистон дар вилояти Хатлон ниҳодест, ки онро ормону хоҳиш ва орзуҳои сокинони вилоят дар пайравӣ аз кулли мардуми мамлакат ба вуҷуд овардаанд. Онҳо аз таҳлили нооромиҳои ҷумҳурӣ ба хулосае омаданд, ки дар давлати мо низоми коммунистӣ мавқеи хешро аз даст дода, идеологияи исломӣ ба манфиатҳои мардуми мо созгор нест. Ин гуна мафкураҳо нақши неруи пешбар ва созандаро иҷро карда наметавонанд. Онҳо дарк намуданд, ки барои Тоҷикистон ва ҷомеаи парешони он андешаву ҳадафҳои умдае лозиманд, ки ғояи миллӣ ва манфиатҳои давлати соҳибистиқлоламонро ҳифз кунанд, муҳимтар аз ҳама, ваҳдати миллиро тақвият бахшанд. Перомуни ин масъалаҳои муҳим афкори умумро ба вуҷуд оварда, дар бунёди ҷомеаи навини Тоҷикистон қувваи бузурги халқро истифода бурда тавонад. Аз ин нуқтаи назар, дар вилояти Хатлон кори бештареро дар муддати хеле кӯтоҳи таърихӣ анҷом додан лозим меомад ва созмоне зарур буд, ки дар ҳалли ин аҳдоф худро масъул шуморад. Ин гуна созмон Ҳизби Халқии Демократии Тоҷикистон буд, ки бо ташаббуси Президенти Ҷумҳурии Тоҷикистон муҳтарам Эмомалӣ Раҳмон рӯи кор омад.

Китоби дуюм «Ҳизби халқ» ном дошта, маҷмӯи мақолаҳои публисистиро дар бораи фаъолияти 25-солаи Ҳизби Халқии Демократии Тоҷикистон ва сохторҳои он дар вилояти Хатлон дар бар гирифтааст. Ин китоб зери назари бевоситаи раиси Кумитаи иҷроияи ҲХДТ дар вилояти Хатлон Абдулло Раҳмонзода ба чоп расид. Мураттибони китоб муовини раиси Кумитаи иҷроияи ҲХДТ дар вилояти Хатлон Неъматулло Иброҳимзода ва мудири шуъбаи таблиғот ва таҳлили Кумитаи иҷроия ҲХДТ дар вилояти Хатлон Шаҳбози Искандар мебошанд.

Тавре Шаҳбози Искандар ба АМИТ Ховар хабар дод, ин асар 29 мақолаи публисистии олимону донишмандон, сиёсатмадорон ва раисони кумитаҳои иҷроияи ҳизбро дар вилоят дар бар гирифтааст.

Китоби сеюм бо номи «Эътимоди халқ кафолати пирӯзии мост» зери назари раиси Кумитаи иҷроияи ҲХДТ дар вилояти Хатлон Абдулло Раҳмонзода ба табъ расидааст. Муаллифи китоб муовини раиси Кумитаи иҷроияи ҲХДТ дар ноҳияи Ёвон Сайёҳат Абдуллоева буда, он фаъолиятҳои таблиғотиву ташвиқотӣ, корҳои амалии ин сохтори ҳизб дар самти кумаку дастгирии табақаҳои ниёзманд, кумак дар таъмири роҳҳои дохилии ноҳия ва таъмири муассисаҳои таълимии ноҳияро дар бар гирифтааст.

Мавриди зикр аст, ки Кумитаи иҷроияи Ҳизби Халқии Демократии Тоҷикистон дар вилояти Хатлон соли 2018  панҷ китоби дигарро низ ба чоп расонида буд. Ин китобҳо бо номҳои «Каъбаи умеди мо халқ асту бас!», «Нақши Эмомалӣ Раҳмон дар татбиқи ғояҳои миллӣ дар мисоли бунёди НБО «Роғун»», «Хатлон — роҳнамо барои сайёҳон бо забонҳои англисӣ ва тоҷикӣ», «Дастурамали корӣ барои ҳизбиён» ва «Тоҷикистон –сарзамини сайёҳӣ ва макони ҳунарҳои мардумӣ» ба чоп расида буданд.

Китобҳои мазкур дар нашриёти ҶДММ «Истиқлол-1» ба чоп расидаанд.

Декабрь 13, 2019 16:40

Хабарҳои дигари ин бахш

ИМРӮЗ-РӮЗИ ҶАҲОНИИ ТЕАТР. Дар давраи соҳибистиқлолӣ дар Тоҷикистон барои пешрафти санъати касбии театрӣ шароити мусоид фароҳам оварда шуд
«САЙРИ ГУЛИ ЛОЛА». Дар Суғд Фестивали вилоятии гулҳо доир мешавад
КОНИ ЛАЗЗАТ ВА ХОНИ НЕЪМАТ. Хабарнигори АМИТ «Ховар» оид ба таомҳои наврӯзӣ дар Бадахшон маълумот ҷамъоварӣ намуд
НАВРӮЗ-МАҲБУБТАРИН ҶАШНИ МИЛЛИИ ТОҶИКОН. Суратгузориш аз таҷлили бошукуҳи ҷашни Наврӯз дар Академияи миллии илмҳои Тоҷикистон
Байни Китобхонаи миллии Тоҷикистон ва Китобхонаи оммавӣ, илмӣ-техникии шуъбаи Академияи илмҳои Русия дар минтақаи Сибир Созишномаи ҳамкорӣ ба имзо расид
Оши бурида дар Наврӯз ҳамчун рамзи умри дароз ва ҳаёти хушбахтона омода мешавад
НАВРӮЗ — ҶАШНИ ЭҲЁ. Ин ҷашни ҷаҳонӣ бунёди маънавии миллати тоҷик мебошад
МАЗМУНҲОИ НАВРӮЗӢ ДАР АШЪОРИ АҲДИ КЛАССИКИИ ФОРСУ ТОҶИК. Андешаҳои адабиётшинос дар хусус
НАВРӮЗ ДАР ЗАРАФШОН. Он бо «тухмҷангак»-и кӯдакон оғоз мегардад
ШАБОҲАТИ ОИНҲОИ НАВРӮЗӢ ДАР ДАВЛАТҲОИ АВРУПО. Наврӯз ҳоло ба ҷузъи тамаддуни башарӣ табдил ёфтааст
«ҲАФТ-СИН» ВА «ҲАФТ-ШИН». Оростани хони наврӯзӣ бо ин рамзҳо нишонаи хайру баракат аст
«САД РАНГИ ЧАКАН». Дар Бӯстон даври шаҳрии озмун баргузор гардид