ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар Ёвон бинои нави филиали «Спитамен Бонк» ифтитоҳ гардид

ДУШАНБЕ, 10.01.2020. /АМИТ «Ховар»/.   Дар  маркази  шаҳри Ёвон  бинои нави филиали «Спитамен Бонк»  ба кор оғоз кард. Ифтитоҳи филиал дар фазои тантанавӣ бо садои карнаю сурнай сурат гирифт.

Дар маросими тантанавии   ифтитоҳи  ин муассиса    муовини якуми Раиси «Спитамен Бонк»   Умедҷон Ҳикматов, и.в Раиси шаҳри Ёвон Ҷамшед Саидзода, муовини аввали Раиси вилояти Хатлон Амонулло Хайрулло, намояндагони сохторҳои давлатӣ, бахши хусусӣ ва воситаҳои ахбори омма ширкат варзиданд.

Маросими расмии буридани лентаи сурх ба фаъолияти расмии филиал оғоз бахшид. Пас аз қисмати тантанавии ифтитоҳ, иштироккунандагон аз филиал дидан намуда, бо кормандони бонк шинос шуданд, инчунин бо роҳҳои нави хизматрасонии технологӣ ба мизоҷон шинос гардиданд.

Меҳмонони ҳамоиш ба интихоби васеи маҳсулоту хизматрасониҳои бонкӣ ва минтақаи бароҳат барои муштариён мароқ зоҳир намуданд. Ороиши дохилӣ ва берунии филиал комилан ба ҳувияти корпоративии бонк ва меъёрҳои байналмилалии хизматрасонӣ ба мизоҷон мувофиқ мебошад.

Зимни маросим сардори Департаменти маркетинг ва рушди тиҷорати бонки мазкур Ҳусейн Абдураҳмонов иброз намуд, ки «ҳадафи асосии ифтитоҳи бинои нави филиал дар шаҳри Ёвон- ин наздиктар шудан ба мардум, фароҳам овардани номгӯи пурраи маҳсулот ва хизматрасониҳои бонкӣ мебошад. Дафтари нави хизматрасонӣ дар ҷои мувофиқ барои ташриф ҷойгир аст. Мо кӯшиш намудем, ки шароити хизматрасониро барои мизоҷон фароҳам созем. Ғайр аз ин, яке аз самтҳои фаъолияти «Спитамен Бонк» мусоидат дар рушди минтақаҳо мебошад. Инро ба назар гирифта, мо кӯшиш менамоем, ки барои фароҳам овардани шароит ба рушди тиҷорати хурду миёна диққати махсус диҳем ва ба таҳкими бахши молиявӣ дар минтақаҳое, ки дар он ҷо «Спитамен Бонк» мавҷуд аст, саҳм гузорем».