Дар Мусобиқаи байналмилалии «Ҷоми рушд-2020» дастаи Тоҷикистон (U-16) ҷои дуюмро ишғол намуд

Январь 27, 2020 10:10

ДУШАНБЕ, 27.01.2020 /АМИТ «Ховар»/. Дастаи мунтахаби Тоҷикистон (U-16) оид ба футбол дар Мусобиқаи байналмилалии «Ҷоми рушд-2020», ки 19-25 январ дар шаҳри Мински Беларус доир гашт, ҷои дуюмро ишғол намуд.

Тавре аз Кумитаи миллии олимпии Тоҷикистон ба АМИТ «Ховар» хабар доданд, дар финал шогирдони Аҳлиддин Турдиев аз дастаи Беларус (U-17) мағлуб шуданд. Вақти асосии дидор мусовӣ (2:2) анҷом ёфта, дар задани силсилазарбаҳои ёздаҳметра бозӣ бо ҳисоби 5:4 ба фоидаи дастаи Беларус (U-17) анҷом ёфт.

Ба иттилои манбаъ, дар мусобиқа 8 дастаи мунтахаб иштирок карданд. Дар бозии ниҳоӣ дастаҳои мунтахаби наврасони Беларус ва Тоҷикистон ба майдон омаданд. Бозӣ ҷолиб доир шуда, дар дақиқаи 9-ум футболбозони навраси тоҷик як комбинатсияи хуб ташкил карданд, ки дар натиҷа Абдулфаттоҳ Худойдодзода ҳисобро кушод. Дар анҷоми нимаи аввали бозӣ Сунатулло Азизов голи дуюми дастаи Тоҷикистонро зад.

Вале футболбозони тоҷик ҳисобро то анҷом натавонистанд нигоҳ доранд. Дастаи  Беларус дар нимаи дуюм тавассути Кунский ва Марчук ҳисобро баробар кард. Бо вуҷуди он ки дастаи мунтахаби мо бозиро 10-нафарӣ ба анҷом расонид, дар дақиқаи 71-ум ба Муҷовид Шовайсиддинов корти сурх нишон дода шуд.

Дар задани силсилазарбаҳои ёздаҳметра дастаи наврасони Беларус ҷои аввалро ишғол намуда, дастаи Тоҷикистон соҳиби медалҳои нуқра гардид.

Ҳамлагари дастаи мунтахаби наврасони Тоҷикистон Сунатулло Азизов, ки дар чор бозӣ ба задани 3 гол даст ёфт, беҳтарин ҳамлагари мусобиқа дониста шуд.

Барои дастаи мунтахаби наврасони Тоҷикистон (U-16) иштирок дар Мусобиқаи байналмилалии «Ҷоми рушд-2020» дар Минск як давраи омодагӣ ба марҳилаи финалии Чемпионати Осиё-2020 маҳсуб меёбад, ки аз 16 сентябр то 3 октябри соли равон дар Баҳрайн доир мегардад.

Мусобиқаи байналмилалии «Ҷоми рушд-2020»
Финал
Беларус (U-17) – ТОҶИКИСТОН (U-16) – 2:2. Пеналтӣ – 5:4
Голҳо: Абдулфаттоҳ Худойдодзода, 9 (0:1). Сунатулло Азизов, 39 (0:2). Кунский, 57 (1:2). Марчук, 80+3 (2:2).

Бозӣ барои ҷои сеюм
Белгия (U-17) – Исроил (U-17) – 5:0

Бозӣ барои ҷои 5-ум
Финланд (U-17) – Гурҷистон (U-17) – 1:0

Бозӣ барои ҷои 7-ум
Ӯзбекистон (U-16) – Исландия (U-17) – 1:2

Январь 27, 2020 10:10

Хабарҳои дигари ин бахш

Ғолиби «Ҷоми Раиси ВМКБ» аз намуди волейбол муайян карда шуд
«Tojiktelecom» сарпарасти расмии мусобиқаи бонуфузи байналмилалии Осиёи Марказӣ ва Ҷанубӣ — CAFA Nations Cup 2025 гардид
ФУТБОЛ. Бозии ниҳоии Ҷоми Тоҷикистон-2025 байни «Регар-ТадАЗ» ва «Эсхата» дар Хуҷанд доир мегардад
Дар Тоҷикистон лоиҳаи «Football For Schools»-и ФИФА амалӣ карда мешавад
ҶОМИ ТОҶИКИСТОН. Дастаҳои футболи «Регар-ТадАЗ» ва «Эсхата» ба финали ин мусобиқа роҳ ёфтанд
Дар вохӯрии дастаҳои Тоҷикистон ва Ҳиндустон автомобили BYD ба бозӣ гузошта мешавад
ФУТБОЛ. Бозии дӯстона байни дастаҳои мунтахаби наврасони Тоҷикистон ва Узбекистон мусовӣ анҷом ёфт
ФУТБОЛ. «Истиқлол»-и Душанбе бо «Ал-Наср»-и Криштиану Роналду дар як гурӯҳ қарор гирифт
ЛИГАИ ЧЕМПИОНҲОИ ДУЮМИ ОСИЁ-2025/26. Имрӯз дастаҳои «Регар-ТадАЗ» ва «Аҳал»-и Туркманистон бо ҳам бозӣ мекунанд
Дастаи мунтахаби наврасони то 17-солаи Тоҷикистон мусобиқаи байналмилалиро дар Индонезия бо мусовӣ оғоз кард
Дар Бохтар ду майдончаи нави футбол мавриди истифода қарор гирифт
«ПЕШВОИ МИЛЛАТ ҲОМИИ ВАРЗИШ ВА ПУШТИБОНИ ҶАВОНОН». Дар Душанбе таҳти ин унвон ба ифтихори Рӯзи варзишгарон чорабинӣ баргузор шуд