Дар Тошканд гуфтушунид оид ба сохтмони муштараки ду НБО дар қаламрави Тоҷикистон идома дорад

ДУШАНБЕ, 29.01.2020 /АМИТ «Ховар»/. Дирӯз, 28 январ дар шаҳри Тошканд гуфтушунид миёни гурӯҳҳои кории Тоҷикистон ва Ӯзбекистон оид ба баррасии масъалаи сохтмони муштараки ду НБО дар қаламрави Тоҷикистон оғоз гардид. Дар ин бора ба  АМИТ  «Ховар»  аз Вазорати энергетика ва захираҳои оби Тоҷикистон хабар доданд.

Лоиҳаи сохтмони ду неругоҳи  барқӣ  552 миллион доллар арзёбӣ мегардад. Дар назар аст, ки  ин неругоҳҳо барои эҳтиёҷоти Ӯзбекистон то 1,4 миллиард киловатт-соат неру истеҳсол намоянд.

Дар марҳилаи аввал сохтмони НБО- и Ёвон  бо иқтидори 140 МВт ва истеҳсоли неруи барқ  дар  ҳаҷми  700- 800 миллион кВт  соат ба нақша гирифта шудааст. Арзиши марҳилаи аввали сохтмон 282 миллион доллар мебошад.

Марҳилаи дуюми сохтмони НБО  дар Фондарё бо иқтидори 135 МВт ва истеҳсоли неруи барқ  дар  ҳаҷми  500- 800 миллион кВт соат шурӯъ мегардад. Барои сохтмони  марҳилаи  дуюми НБО 270 милион доллар сарф мешавад.

Дар ҷараёни сохтмони муштарак ва истифодаи НБО бунёди ҷойҳои иловагии корӣ ба нақша гирифта шудааст. Ҳамчунин «барои интиқоли неруи барқ ба дигар минтақаҳои Ӯзбекистон ва  Тоҷикистон дар асоси баробарӣ»  имконият пайдо мешавад.

Дар гуфтушунид  ҳайати Тоҷикистонро  муовини Вазири энергетика ва захираҳои об Ҷамшед  Шоимзода роҳбарӣ менамояд. Ӯзбекистонро муовини Вазири энергетикаи ҶУ Ҷӯрабек Мирзомаҳмудов намояндагӣ  мекунад.

Дирӯз ҳайатҳо тартиб ва шартҳои иштироки шарикӣ  дар сохтмон ва истифодаи НБО-ҳоро муҳокима намуданд. Гуфтушунид имрӯз, 29 январ низ идома хоҳад ёфт.

Хотирнишон месозем, ки масъалаи сохтмони муштараки неругоҳҳои барқӣ  дар қаламрави Тоҷикистон бо иқтидори 320 МВт дар изҳороти муштараки сарварони ду давлат зимни сафари расмии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ  Раҳмон  ба  Ҷумҳурии  Ӯзбекистон моҳи августи соли 2018 пешбинӣ  шуда буд.