Филми тоҷикии «Ман бо духтаре вохӯрдам» дар «Ҳафтаи синамои кишварҳои СҲШ» дар Ӯзбекистон ба намоиш гузошта мешавад

ДУШАНБЕ, 14.01.2020 /АМИТ «Ховар»/. Филми  машҳури Рафаэл Перелштейн «Ман бо духтаре вохӯрдам», ки соли 1957 дар киностудияи «Тоҷикфилм» ба навор гирифта шудааст, дар доираи «Ҳафтаи синамои кишварҳои СҲШ» дар Ӯзбекистон намоиш дода мешавад, хабар медиҳад мухбири АМИТ « Ховар» аз Тошканд.

Маркази дипломатияи  халқии СҲШ дар Ӯзбекистон якҷоя бо Ширкати миллии телевизион ва радиои Ӯзбекистон аз 13 то 20 январ «Ҳафтаи синамои кишварҳои СҲШ»-ро доир мекунанд.

Дар бахши телевизионии «Ретро» дар баробари филми «Ман бо духтаре вохӯрдам», инчунин филмҳои «Роҳ ба сӯи саодат» (Ҳиндустон, 1969), «Гургбача дар байни одамон» (Қазоқистон, 1988), «Охирин иператор» (Чин, 1987), «Себи сурх» (Қирғизистон 1975), «Алвидоъ орузҳои ширин» (Покистон, 1994), «Мо инро нагузаштаем» (Россия, 1957) , «Набарди се шоҳ» (Ӯзбекистон, 1990) намоиш дода мешаванд.

Ҳамаи ин филмҳо,  аз ҷумла  филми машҳури  истеҳсоли «Тоҷикфилм» аз бойгонии Ширкати миллии телевизион ва радиои Ӯзбекистон пешниҳод гардидаанд.

Ёдовар мешавем, «Ман бо духтаре вохӯрдам»  аввалин филми бадеии рангаи тоҷикист, ки дар он ҳунарпешагони машҳури Тоҷикистон ва берун аз он, ҳунарманди халқии ИҶШС Аслӣ Бурҳонов, (Мухтор-ака), Роза Акобирова (Лола), Софя Тӯйбоева (Меҳринисо), Ҷаҳон Саидмуродов (Саид), Абдулхайр Қосимов (Ниёз), ҳамчунин ҳунармандони Театри давлатии опера ва балети Тоҷикистон ва Филармонияи давлатии Тоҷикистон нақш офаридаанд.