Гурӯҳи идоракунии лоиҳаи «Тақвияти таҳсилоти касбӣ-техникӣ ва омӯзиш» машғулияти дурӯза доир намуд

Январь 30, 2020 11:01

ДУШАНБЕ, 30.01.2020 /АМИТ «Ховар»/.  Дар маркази омӯзишии  Гурӯҳи идоракунии лоиҳаи «Тақвияти таҳсилоти касбӣ-техникӣ ва омӯзиш»-и Вазорати меҳнат, муҳоҷират ва шуғли аҳолии Ҷумҳурии Тоҷикистон  машғулияти дурӯза дар мавзӯи  «Нақши марказҳои таълими калонсолон ва марказҳои захиравӣ дар татбиқи баҳодиҳии салоҳият бо дарназардошти талаботи бозори меҳнати минтақа» барои кормандони марказҳои таълими калонсолон ва марказҳои захиравии лоиҳа баргузор  гардид.

Тавре созмондиҳандагони машғулият  ба АМИТ «Ховар»  иттилоъ доданд, омӯзишро  мушовири байналмилалӣ оид ба таҳияи барнома ва маводи таълимӣ Эрденатуяа Ринчин дар якҷоягӣ бо кормандони Гурӯҳи  мазкур гузарониданд.

Машғулияти  мазкур давоми силсила машғулиятҳои омӯзишӣ дар мавзӯи «Баҳодиҳӣ дар асоси МТАС (методологияи таҳсилот дар асоси салоҳият)» буда, пас аз анҷоми он иштирокчиён соҳиби сертификат  шуданд.

Бояд зикр  кард, ки МТАС баҳогузории салоҳияти касбии донишҷӯёни литсейҳо ва дигар низоми  таҳсилоти касбӣ-техникиро бо иштироки ҳатмии корфармоён талаб мекунад. 70%-и аъзои комиссияи баҳогузориро бояд корфармоён ташкил диҳанд, зеро маҳз онҳо  беҳтар медонанд, ки донишҷӯ (корҷӯ)  бояд кадом салоҳияти касбӣ- дониш, маҳорат, малака ва муносибат дошта бошад.

Ёдовар мешавем, ки аз ҷониби хонум Эрденатуяа Ринчин ва кормандони гурӯҳи идоракунии лоиҳа  23 ва 24 январ низ   машғулияти  ниҳоии омӯзишӣ барои беш аз 25 корфармо  дар мавзӯи «Баҳодиҳӣ дар асоси методологияи таҳсилот дар асоси салоҳият» баргузор шуд.  Мақсади он  омӯзондани корфармоён ва дигар иштирокчиён оид ба баҳодиҳӣ дар асоси салоҳият, воҳидҳои баҳодиҳӣ, таҳияи воситаҳо ва нақшаи баҳодиҳӣ мебошад.

Давоми  машғулият  иштирокчиён ба гурӯҳҳо тақсим шуда, нақша ва воситаҳои баҳодиҳиро барои якчанд касб таҳия намуда, дигар фаъолиятҳо марбут ба баҳодиҳӣ дар асоси МТАС-ро гузаронданд.

«Раванди баҳогузорӣ аз рӯйи МТАС мураккаб буда, хусусиятҳои худро дорад. Масалан, раванди омодагии баҳогузории ниҳоӣ аз аввали соли хониш оғоз ёфта, нақшаи гузаронидани баҳогузории тамоми касбҳо  дар муассисаҳои таълимӣ омода мегардад.  Гузаронидани баҳогузории асосӣ, миёнадаврӣ ва ниҳоӣ ба нақша гирифта  шуда, макони баргузории баҳогузорӣ омода  ва  вазифаю воситаҳои баҳогузорӣ таҳия мегарданд. Ҳамаи инро баҳогузор бояд на танҳо донад, балки гузаронида тавонад. Дар акси ҳол ӯ ҳуқуқи баҳогузорӣ надорад», —  гуфт  роҳбар ва ҳамоҳангсоз оид ба рушди МТАС Мунира Иноятова.

Тамоми нозукиҳои баҳогузорӣ  зимни силсила машғулиятҳо  омӯзонда шуда, дар интиҳо ба иштирокчиён сертификатҳо супурда шуданд.  Акнун  корфармоёне, ки аз омӯзиш гузаштаанд,  метавонанд дар баҳогузории кадрҳои коргарӣ  иштирок намоянд.

Бояд тазаккур дод,  ки дар доираи Лоиҳа стандартҳои салоҳияти 17 касби коргарӣ таҳия гашта,  пурра аз экспертизаи корфармоён ва вазорату кумитаҳои соҳавӣ гузаронида шудаанд. Айни замон ҷараёни тарҷумаи 17 стандарти салоҳият ба забони давлатӣ оғоз гардида, пас аз анҷом онҳо  ба Вазорати меҳнат, муҳоҷират ва шуғли аҳолии Ҷумҳурии Тоҷикистон барои тасдиқ пешниҳод мегарданд.

Ёдовар мешавем, ки Лоиҳаи «Тақвияти таҳсилоти касбӣ-техникӣ ва омӯзиш» дар асоси созишномаҳо байни Ҷумҳурии Тоҷикистон ва Бонки Осиёии Рушд дар Тоҷикистон аз соли 2016 амалӣ  мешавад. Ҳадафи асосии лоиҳа  ворид  намудани навоварӣ  дар методологияи тайёр намудани мутахассисони барои истеҳсолоти миллии Ҷумҳурии Тоҷикистон мебошад. Ғайр аз ин,  лоиҳа барои мусоидат дар мустаҳкам намудани заминаҳои моддӣ-теникӣ ва барқарорсозии инфрасохторҳои литсейҳои касбии техникӣ ва   марказҳои таълими калонсолони Вазорати меҳнат, муҳоҷират ва шуғли аҳолии Ҷумҳурии Тоҷикистон ва ба ин восита  омода намудани мутахассисони баландихтисоси ҷавобгӯ ба талаботи бозори меҳнат равона гардидааст.

Амалигардонии Лоиҳаро  Вазорати меҳнат, муҳоҷират ва шуғли аҳолии Ҷумҳурии Тоҷикистон  ба уҳда дошта,  дар назди вазорат Гурӯҳи идоракунии Лоиҳа фаъолият дорад.

Январь 30, 2020 11:01

Хабарҳои дигари ин бахш

Дар Женева ҳамкорӣ байни Тоҷикистон ва Созмони байналмилалии меҳнат баррасӣ гардид
То соли 2028 ба ҳама шаклҳои бадтарини меҳнати кӯдакон дар Тоҷикистон хотима дода мешавад
Муовини Сарвазир бо рафти корҳои сохтмонии манзилҳои зист барои оилаҳои аз заминҷунбӣ зарардидаи ноҳияи Рашт шинос шуд
Барои дар тобистон ба бемории дарунравӣ гирифтор нашудани кӯдакон чӣ бояд кард?
Даври сеюми Озмуни ҷумҳуриявии «Тараннуми Ватан» баргузор мегардад
Беш аз 190 ҳазор нафар наврасони вилояти Хатлон ба истироҳатгоҳҳо фаро гирифта мешаванд
«ТОБИСТОН-2025». Дар Тоҷикистон беш аз 250 ҳазор кӯдакону наврасон ба истироҳат фаро гирифта мешаванд
РӮЗИ ҶАҲОНИИ ЯХМОС. Чаро ин ширинии яхбастаро аз ҳама зиёд кӯдакон дӯст медоранд?
ҒИЗОИ СОЛИМ. Ҷаҳон Азонов: «Истеъмоли нодуруст ва аз меъёр зиёди ғизо давомнокии умрро кӯтоҳ мекунад»
Дар Бохтар бинои нави Беморхонаи бемориҳои дил ва маркази эндокринология сохта мешавад
САРФАКОРӢ — БАРАКАТИ ЗИНДАГӢ. Ба миқдори сари сӯзан сарфа кардани зан баракатро дар хонадон дучанд меафзояд
ҚОНУНИ ТАНЗИМ — НАМУНА БАРОИ КИШВАРҲОИ МИНТАҚА. Дар давраи амали ин қонуни миллӣ беш аз 12 миллиард сомонӣ сарфа шудааст