ДУШАНБЕ, 31.01.2020 /АМИТ «Ховар»/.  Кормандони Раёсати кадрҳо ва кор бо ҳайати шахсии Вазорати корҳои дохилии Ҷумҳурии Тоҷикистон ба  Осорхонаи ВКД рафта, бо ёдгориҳои таърихие, ки фаъолияти милитсияи тоҷикро инъикос мекунанд, шинос шуданд. Дар ин бора аз маркази матбуоти Вазорати корҳои дохилии Ҷумҳурии Тоҷикистон ба АМИТ «Ховар» хабар доданд.

Тавре манбаъ иттилоъ медиҳад, майори милитсия Маҳбуба Комилова зимни муаррифии ёдгориҳои таърихӣ иброз намуд, ки Осорхона яке аз ҷойҳои фарҳангии мақомоти корҳои дохилӣ маҳсуб шуда, аз ин макон метавон  маълумоти зиёд дар бораи милитсияи тоҷик пайдо кард.

Осорхонаи ВКД  дорои гӯшаҳои «Таъсиси милитсия дар Тоҷикистони Шӯравӣ», «Таъмини тартибот дар Тоҷикистони тошӯравӣ», «Таъсиси милитсияи Шӯравӣ», «Қарори тақдирсоз дар таърихи милитсияи Тоҷикистон», «Милитсияи Тоҷикистон дар солҳои 1926-1940», «Милитсияи Тоҷикистон дар солҳои Истиқлолият» буда, ҳамчунин  ёдгориҳо аз фаъолияти кормандони Хадамоти давлатии оташнишонӣ гирд оварда шудаанд.

Бояд зикр намуд, ки дар гӯшаи «Туҳфаҳои хотиравии Вазири корҳои дохилии Ҷумҳурии Тоҷикистон»  туҳфаҳое, ки ба унвони Вазири корҳои дохилӣ аз тарафи роҳбарону вазирони корҳои дохилии дигар давлатҳо ва меҳмонони олиқадри ВКД тақдим гардидаанд, ҷойгир карда шудаанд.

Дар Осорхонаи ВКД аз замони таъсис то ба имрӯз чандин гӯшаҳои нав  манзури тамошобинон гардонида  шудаанд.