Мулоқоти Вазири корҳои хориҷии Тоҷикистон бо муовини вазири корҳои хориҷии Афғонистон

ДУШАНБЕ, 29.01.2020 /АМИТ «Ховар»/. Дар ҳошияи баргузории Конфронси «Осиёи Марказии сабз» мулоқоти Вазири корҳои хориҷии Ҷумҳурии Тоҷикистон Сироҷиддин Муҳриддин бо Муовини вазири корҳои хориҷии Ҷумҳурии Исломии Афғонистон Мирвайс Ноб баргузор гардид.

Тавре АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад, дар мулоқот ҷонибҳо сатҳи ҳамкории ду кишварро қаноатбахш арзёбӣ намуда, роҷеъ ба вазъи амниятӣ дар минтақа мубодилаи афкор анҷом доданд.

Сироҷиддин Муҳриддин изҳор дошт, ки иншооти гидроэнергетикӣ ва корхонаҳои маҳсулоти сохтмонӣ дар Тоҷикистон заминаҳои хуби тавсеаи ҳамкории иқтисодиву тиҷоратӣ миёни кишварҳои ҳамсоя ба ҳисоб мераванд.

Бояд  тазаккур дод, ки дар ташаббуси «Раванди Берлин. Осиёи Марказии сабз» дар баробари кишварҳои Осиёи Марказӣ ва Олмон Афғонистон низ иштирок мекунад.

Акс аз ҷараёни Конфронси «Осиёи Марказии сабз»дар Берлин. Акс аз ВКХ ҶТ