Қонун «Дар бораи ниҳолпарварӣ» ба имзо расид. Дастовардҳои назарраси Тоҷикистон дар парвариши ниҳолҳои ороишию мевадиҳанда

Январь 6, 2020 08:20

ДУШАНБЕ, 06.01.2020 /АМИТ «Ховар»/. Ҷумҳурии Тоҷикистон дар масъалаи парвариш ва ба фурӯш баровардани ниҳолҳои мевадиҳанда, ороишӣ ва ҳамешасабз дар доираи татбиқи Барномаи рушди соҳаи боғу токпарварӣ барои солҳои 2016-2020 қадамҳои устувор гузошта, ба дастовардҳои чашмрас  ноил мегардад. Ин дар ҳолест, ки 2 январ аз ҷониби Асосгузори сулҳу ваҳдати миллӣ-  Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Қонуни Ҷумҳурии Тоҷикистон «Дар бораи ниҳолпарварӣ» ба имзо расид.

Муқаррар намудани асосҳои ҳуқуқӣ, ташкилӣ ва иқтисодии ташаккули низоми ниҳолпарварӣ дар истеҳсол ва фурӯши ниҳолҳои мевадиҳанда, ҳамешасабз ва ороишӣ, ҳуқуқ ва уҳдадориҳои истеҳсолкунандагони маводи киштшаванда ва ниҳолҳо, бамеъёрдарории фаъолияти шаклҳои гуногуни хоҷагидорӣ, идоракунии давлатӣ ва мутобиқгардонии муносибатҳо вобаста ба пешбурди соҳа ба талаботи  қонунгузории Ҷумҳурии Тоҷикистон-  ҳадафҳои асосии қонун мебошанд.

Қонуни Ҷумҳурии  Тоҷикистон «Дар бораи ниҳолпарварӣ»  аз 5 боб ва 20 модда иборат буда, масъалаҳо роҷеъ ба идоракунии давлатии соҳаи ниҳолпарварӣ, аз қабили танзим ва дастгирии давлатии соҳаи ниҳолпарварӣ, салоҳияти Ҳукумати Ҷумҳурии Тоҷикистон, ваколатҳои мақоми ваколатдори  давлатӣ ва мақомоти иҷроияи маҳаллии ҳокимияти давлатӣ дар соҳаи ниҳолпарварӣ, ҳуқуқ ва уҳдадориҳои субъектҳои фаъолияти хоҷагидории соҳаи ниҳолпарварӣ, инчунин суғуртаи субъектҳои фаъолияти хоҷагидории соҳаи ниҳолпарвариро ба танзим медарорад.  Боби 3 ташкили низоми ниҳолпарварӣ, парвариш, назорату фурӯши онҳо, баҳисобгирӣ, воридоту содирот ва сертификатсияи лавозимоти киштшаванда ва ниҳолҳо, боби 4 бунёди боғҳо, мониторинг, гузаронидани кадастр ва аз ҳисоб баровардану решакан кардани онҳоро дар бар мегиранд.

Бояд зикр кард, ки танзими ҳуқуқии фаъолият дар соҳаи ниҳолпарварӣ имконият медиҳад, ки дар мамлакат баробари истифодаи оқилонаи фонди генетикии навъҳо барои ба вуҷуд овардани навъҳои дорои хусусиятҳои хуби биологию хоҷагидорӣ нигоҳдории гуногунии биологии ниҳолҳо, аломату хусусиятҳои беҳтарини навъҳои маҳаллӣ ва ояндадор ҳифз карда шавад.

Тавре дар суҳбат бо хабарнигори АМИТ «Ховар» сармутахассиси Корхонаи воҳиди давлатии ҷумҳуриявии «Тоҷикниҳолпарвар»-и Вазорати кишоварзии Ҷумҳурии Тоҷикистон Эраҷи Талаб гуфт, алҳол дар ҷумҳурӣ 13 хоҷагии давлатии ниҳолпарварӣ фаъолияти густурда доранд. Мавсуф афзуд, ки хоҷагии  ниҳолпарварии ба номи Мирзо Турсунзодаи ноҳияи Шаҳринав, хоҷагии ниҳолпарварии «Искич»-и шаҳри Ҳисор,  хоҷагии ниҳолпарварии шаҳри Панҷакент, ноҳияи Мир Сайид Алии Ҳамадонӣ,  хоҷагии ниҳолпарварии  ба номи Ғайбулло  Масаидови ноҳияи Бобоҷон Ғафуров ва хоҷагии ниҳолпарварии «Бӯстонқалъа»-и ноҳияи Кӯшониён аз хоҷагиҳои  давлатии  ниҳолпарварии фаъол ва муваффақ дар масъалаи парвариш ва ба фурӯш баровардани ниҳолҳои мевадиҳанда, ороишӣ ва  ҳамешасабз  дар ҷумҳурӣ маҳсуб мешаванд.

Бояд тазаккур дод, ки татбиқи як зумра барномаҳои рушди боғу токпарварӣ дар Ҷумҳурии Тоҷикистон имконият дод, ки ин бахш ба соҳаи пуриқтидори кишоварзӣ табдил ёфта, барои афзун намудани иқтидори содиротии мамлакат ва ҳалли масъалаҳои иҷтимоию иқтисодии деҳот саҳми калон гузоранд.

Ин дар ҳолест, ки дар  тамоми минтақаҳои ҷумҳурӣ бо истифода аз ниҳолҳои мевадиҳанда, ҳамешасабзу ороишӣ корҳои сабзазоркунӣ ва хуррамсозӣ, ҳусусан ниҳолшинонӣ дар партави омодагӣ ба таҷлили сазовори ҷашни 30-солагии Истиқлолияти давлатии Ҷумҳурии Тоҷикистон амалӣ гардида истодаанд.

Январь 6, 2020 08:20

Хабарҳои дигари ин бахш

НИШАСТИ МАТБУОТӢ. Ҳаҷми истеҳсоли неруи барқ дар Тоҷикистон беш аз 8,9 миллиард кВт-соатро ташкил дод
Тоҷикистон ва Беларус густариши ҳамкории тиҷоратию иқтисодӣ ва кишоварзиро баррасӣ намуданд
200 нафар занони соҳибкор аз грантҳои Президенти Ҷумҳурии Тоҷикистон бархурдор мегарданд
Дар беш аз 500 гектар замини хоҷагиҳои ҷамоавӣ ва деҳқонии Тоҷикистон боғу токзори нав бунёд гардидааст
Фарҳод Раҳимӣ: «Иқдоми стратегии Президенти Тоҷикистон доир ба зеҳни сунъӣ дар сатҳи ҷаҳонӣ хеле саривақтӣ аст»
Корхонаҳои саноатии Хуҷанд ба маблағи 214,7 миллион сомонӣ маҳсулот содирот намудаанд
Гурӯҳи кории Бонки рушди Осиё бо имконоти сармоягузорӣ ва инфрасохтори Минтақаи озоди иқтисодии «Данғара» шинос шуд
Дар Пекин дафтари намояндагии Палатаи савдо ва саноати Ҷумҳурии Тоҷикистон ифтитоҳ гардид
НИШАСТИ МАТБУОТӢ. Агентии «Тоҷикстандарт» ба зиёда аз 21 ҳазор миқдор молу маҳсулот сертификати мутобиқат дод
Бахшида ба ворид шудани дараи Алмосӣ ба Низоми мероси кишоварзии дорои аҳамияти ҷаҳонӣ дар Ҳисор ҳамоиши ҷумҳуриявӣ доир шуд
Сармоягузорони Чин бо фаъолияти Минтақаи озоди иқтисодии «Кӯлоб» шинос шуданд
Дар хоҷагиҳои моҳипарварии Тоҷикистон 1906 тонна моҳӣ истеҳсол карда шуд