Покистон барои омода намудани мутахассисони худ дар Донишгоҳи давлатии тиббии Тоҷикистон ба номи Абӯалӣ ибни Сино ҳавасманд аст

ДУШАНБЕ, 13.01.2020 /АМИТ «Ховар»/. Покистон барои омода намудани  мутахассисони худ дар Донишгоҳи давлатии тиббии Тоҷикистон ба номи Абӯалӣ ибни Сино ҳавасманд аст. Дар ин бора 10 январ зимни мулоқоти ректори Донишгоҳи давлатии тиббии Тоҷикистон ба номи Абӯалӣ ибни Сино Маҳмадшоҳ Гулзода бо Сафири фавқулода ва мухтори Покистон дар Тоҷикистон Имрон Ҳайдар зикр гардид.

Тавре ба АМИТ « Ховар» аз маркази матбуоти Вазорати тандурустӣ  ва ҳифзи иҷтимоии аҳолии Ҷумҳурии Тоҷикистон хабар доданд, ҷонибҳо дурнамои ҳамкории мутақобилан судмандро  мавриди баррасӣ қарор доданд.

Имрон Ҳайдар ҳавасмандии ҷониби Покистонро барои таҳсил намудани  шаҳрвандони ин кишвар дар Донишгоҳи давлатии тиббии Тоҷикистон ба номи Абӯалӣ ибни Сино иброз намуд. «Таваҷҷуҳи шаҳрвандони  Покистон ҷиҳати таҳсил дар ин донишгоҳи тиббӣ сол аз сол меафзояд», — зикр намуд Сафири Покистон дар Тоҷикистон.

Маҳмадшоҳ Гулзода иброз дошт, ки дар донишгоҳ барои таҳсил ва зисти шаҳрвандони хориҷӣ тамоми шароитҳо фароҳам оварда шудаанд.