Дар шуъбаи Вазорати корҳои дохилии шаҳри Ваҳдат китобхона таъсис ёфт

ДУШАНБЕ, 14.02.2020 /АМИТ «Ховар»/. Баҳри иҷрои  дастуру супуришҳои Президенти мамлакат, Пешвои миллат муҳтарам Эмомалӣ Раҳмон  роҳбарияти  шуъбаи Вазорати корҳои дохилии  шаҳри Ваҳдат  дар бинои шуъбаи мазкур китобхонаи муосир таъсис доданд. Дар  китобхонаи мазкур зиёда аз 1500  адад китобҳои илмӣ, бадеӣ, сиёсӣ, таърихӣ, журналу маҷаллаҳо ва дигар дастуру барномаҳои таълимӣ ҷой дода шудаанд.

Тавре аз маркази матбуоти Вазорати корҳои дохилии Ҷумҳурии Тоҷикистон  ба АМИТ «Ховар» изҳор доштанд, китобхона макони илмӣ-таҳқиқотӣ, фарҳангӣ-иттилоотӣ маҳсуб шуда, ба кормандони милитсия имкон медиҳад, ки барои дарёфти иттилоот аз он пурсамар истифода намоянд.

Роҳбарияти шуъба ба  масъулин дастур доданд, ки барои ҷалби кормандон, махсусан насли ҷавони милитсия, бедор намудани завқи бадеӣ ва эстетикии онҳо дар ин макони  фарҳангӣ  ҳар гуна озмуну маҳфилҳо роҳандозӣ намоянд.

Зимни боздид ва шиносоӣ бо китобхонаи мазкур меҳмонон ва ҳайати шахсии ШВКД дар шаҳри Ваҳдат аз шароити муҳайёгардида дар китобхона ва толори он изҳори қаноатмандӣ намуданд.