Дар Суғд 20-солагии Созмони хонандагонро пуршукӯҳ таҷлил намуданд

ДУШАНБЕ, 27.02.2020 /АМИТ «Ховар»/. 26 феврал дар назди муҷассамаи шоҳ Исмоили Сомонии шаҳри Хуҷанд бо иштироки муовини Раиси вилоят Зайнура Азимӣ маросими расмии қабул ба сафи Созмони хонандагон бо ҷалби беш аз 3 ҳазор нафар хонандагони  муассисаҳои таълимии вилоят  баргузор шуд.

Дар ҷамъомад адибони маъруф, ходимони барҷастаи давлатию сиёсӣ Аҳмадҷони Раҳматзод, Биҳоҷал Раҳимова, Шуҷоат Ҳасанова иштирок намуда, ба 200 нафар хонандагон галстукҳои рамзии Созмонро бастанд.

Пас аз гулчанбаргузорӣ дар пояи муҷассамаи шоҳ Исмоили Сомонӣ ва маросими тантанавии қабули аъзои фаъол ба сафи Созмони хонандагон роҳпаймоии беш аз 10 ҳазорнафараи хонандагони муассисаҳои таълимии вилоят таҳти унвони «Мо пайравони Пешвои миллатем!» баргузор шуд.

Роҳпаймоии мазкур аз назди муҷассамаи шоҳ Исмоили Сомонӣ оғоз шуда, то бинои Маркази ҷавонони ба номи Лоиқ Шералӣ  идома ёфт.  Дар роҳпаймоӣ аъзои фаъоли Созмони хонандагон, ғолибони озмуни ҷумҳуриявии «Ватанпарвар», нозирони навраси Ҳаракат дар роҳ, Академияи хурди илмҳо бо як ҷаҳон ифтихор иштирок ва сиёсати маорифпарваронаи Пешвои миллатро ҷонибдорӣ намуданд.

Дар саҳни Маркази ҷавонон сардори Раёсати маорифи вилоят Осим Каримзода толибилмонро бо ҷашни 20-солагии Созмони хонандагон табрик намуд.

Сипас дар  толори Маркази  ҷавонони ба номи Лоиқ Шералӣ маросими тақдими мукофотҳои Раиси вилоят ба ғолибони озмунҳои мухталифи вилоятию ҷумҳуриявӣ бо иштироки муовини Раиси вилоят Зайнура Азимӣ  баргузор гардид. Дар вазъияти тантанавӣ ба 18 нафар ғолибони озмунҳои расмкашӣ, иншо, мақола ва шеъри беҳтарин дар мавзӯъҳои сулҳу ваҳдат, «Тоҷикистон- кишвари азизи ман», озмуни ҳарбии варзишии «Ватанпарвар» дипломҳо ва туҳфаҳои хотиравии Раиси вилоят тақдим гардиданд.  20 нафар собиқадорон ва фаъолони соҳа сазовори Сипосномаи Раиси вилоят шуданд.

Барномаи  рангини фарҳангӣ, ки аз ҷониби фаъолони Созмони хонандагон пешкаш гардид, хотири аҳли нишастро болида намуд.