Сулаймон Султонзода: «Зиёда аз 370 ҷиноят вобаста ба хариду фурӯши ғайриқонунии замин ошкор гардид»
ДУШАНБЕ, 11.02.2020/АМИТ «Ховар»/. Соли 2019 аз ҷониби кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон 374 ҷинояти коррупсионии вобаста ба хариду фурӯши ғайриқонунии замин ошкор ва ба қайд гирифта шуд. Бештари ҷиноятҳо ба шаҳру ноҳияҳои Ашт, Бобоҷон Ғафуров, Рӯдакӣ, Панҷакент, Кӯшониён, Шаҳритус, Ваҳдат, Қайроққум, Исфара, Турсунзода ва Фархор рост меоянд. Ин нуктаро директори Агентии мазкур Сулаймон Султонзода имрӯз зимни нишасти матбуотӣ баён дошт.
Тибқи маълумоти расмӣ, соли 2018 шумораи чунин ҷиноятҳои бақайдгирифташуда ба 278 адад баробар буда, соли сипаригардида қариб 100 адад кам шудаанд.
Зимнан, тибқи моддаи 13-и Конститутсияи Ҷумҳурии Тоҷикистон замин, сарватҳои зеризаминӣ, об, фазои ҳавоӣ, олами набототу ҳайвонот ва дигар боигарии табиӣ моликияти истисноии давлат мебошанд ва давлат истифодаи самараноки онҳоро ба манфиати халқ кафолат медиҳад.
Кам гардидани ҷиноятҳои коррупсионии марбут ба хариду фурӯши ғайриқонунии замин нишони волои татбиқи ин моддаи Конститутсия ва сиёсати хирадмандонаву дурандешонаи роҳбарияти олии давлату Ҳукумати Ҷумҳурии Тоҷикистон мебошад.
Тавре Президенти Ҷумҳурии Тоҷикистон муҳтарам Эмомалӣ Раҳмон зимни пешниҳоди Паёми худ ба Парлумони мамлакат моҳи декабри соли 2018 баён доштанд: «Дар 27 соли соҳибистиқлолӣ 190 ҳазор гектар заминҳои корам аз гардиши кишоварзӣ бароварда шуда, майдони заминҳои наздиҳавлигӣ дар мамлакат 135 ҳазор гектар, аз ҷумла аз ҳисоби заминҳои обӣ 52 ҳазор гектар зиёд шудааст.
Яъне ба як миллиону 400 ҳазор оила барои бунёди манзилҳои истиқоматӣ замин тақсим карда дода шудааст ва ба ҳисоби миёна беш аз 7 миллион нафар сокинони мамлакат шароити манзилиашонро беҳтар кардаанд».
Ёдовар мешавем, ки мубориза бо коррупсия яке аз самтҳои асосии фаъолияти Ҳукумати Ҷумҳурии Тоҷикистон буда, барои пешгирии амалҳои коррупсионӣ ва мубориза бо ин зуҳурот дар мамлакат Фармони Президенти Ҷумҳурии Тоҷикистон «Дар бораи тадбирҳои иловагии пурзӯр намудани мубориза бар зидди ҷинояткорӣ дар соҳаи иқтисод ва коррупсия (ришвахурӣ)», Қонунҳои Ҷумҳурии Тоҷикистон «Дар бораи мубориза бар зидди коррупсия» ва Стратегияи муқовимат ба коррупсия дар Ҷумҳурии Тоҷикистон барои солҳои 2013-2020 амал мекунанд.
Дар Душанбе ҷаласаи Платформаи миллӣ оид ба паст намудани хавфи офатҳои табиӣ баргузор гардид
Котиби Шурои амнияти Ҷумҳурии Тоҷикистон бо Сафири Русия дар Тоҷикистон мулоқот намуд
Ҷаласаи корӣ бо иштироки роҳбарони мақомоти марказии иҷроияи ҳокимияти давлатии Ҷумҳурии Тоҷикистон доир гардид
ПЕШГИРИИ СӮХТОР. Қоидаҳо бар зидди сӯхторро қатъиян бояд риоя намуд
Милитсияи пойтахт аз шаҳрвандон талаб намуд, ки аз фурӯшу паҳнсозӣ ва истифодаи маводи тарфгарӣ худдорӣ кунанд
Ба муносибати таъсиси Воҳидҳои таъйиноти махсуси милитсия дар вилоятҳои Суғд, Хатлон ва Бадахшон ҷамъомади тантанавӣ доир шуд
РӮЗИ ТАЪСИСИ ВОҲИДҲОИ ТАЪЙИНОТИ МАХСУСИ МИЛИТСИЯ. Кормандони ин ниҳод вазифаҳои душвору масъулиятнок бар зимма доранд
Дар Минск вохӯрии вазирони корҳои дохилии Тоҷикистон ва Беларус баргузор гардид
Изҳороти Маркази матбуоти Қӯшунҳои сарҳадии Кумитаи давлатии амнияти миллии Ҷумҳурии Тоҷикистон
«МУҚОВИМАТ БО КОРРУПСИЯ ДАР СОҲАИ ТИҶОРАТ». Дар Душанбе таҳти ин унвон форуми байналмилалӣ баргузор мешавад
Дар Душанбе оид ба усулҳои нави ҷамъоварии маълумот дар самти муқовимат ба савдои одамон ҷаласа доир шуд
Нақшаи даъвати тирамоҳии шаҳрвандони Тоҷикистон ба сафи Артиши миллӣ пурра иҷро гардид
