«Амонатбонк» касбияти кормандонашро такмил медиҳад

ДУШАНБЕ, 15.04.2020. /АМИТ «Ховар»/. Бонки давлатии амонатгузории Ҷумҳурии Тоҷикистон «Амонатбонк» бо мақсади баланд бардоштани савияи дониш ва  касбияти мутахассисони намояндагиҳояш дар шаҳру ноҳияҳои мамлакат дар мавзӯи «Таҳлил ва пешниҳоди қарзҳои хурд» тӯли панҷ рӯз машғулияти омӯзишӣ гузаронид.  

Ба кормандони филиалҳои «Амонатбонк» мутахассисони идораи методология ва бозомӯзии кормандон, идораи қарздиҳии Департаменти қарздиҳӣ ва Раёсат оид ба масъалаҳои ҳуқуқӣ  доир ба масъалаҳои таҳлили молиявӣ, ҷалби мизоҷон ва пешниҳоди қарз,

таҳияи  ҳисоботи молиявӣ, хавфҳои қарзӣ ва пешгирии он, гарав ва баҳодиҳии амволи гарав, мониторинг, истифодаи мақсадноки қарз машғулияти омӯзишӣ гузаронида, ба саволҳои кормандони филиалҳои «Амонатбонк» дар шаҳри Душанбе ва ноҳияҳои тобеи марказ посух доданд.

Бо мақсади баланд бардоштани савияи дониш, малака ва  касбияти кормандони бонк бо дастури раиси Раёсати «Амонатбонк» Сироҷидин Икромӣ дар бонк Идораи методология ва бозомӯзии кормандон таъсис дода шудааст. Инчунин дар бинои нави «Амонатбонк» барои омӯзиш ва такмили ихтисоси кормандон  шароити мусоид фароҳам оварда шуда, толорҳои омӯзишӣ ва утоқи тарҷумаи  синхронӣ бо технологияҳои муосири иттилоотиву дафтардорӣ муҷаҳҳаз гардонида шудаанд.