Дар 448 гармхонаҳои вилояти Суғд 393,6 тонна сабзавоти тару тоза истеҳсол гардид

ДУШАНБЕ, 17.04.2020 /АМИТ «Ховар»/. Аз аввали сол то имрӯз дар гармхонаҳои шаҳру ноҳияҳои вилояти Суғд 393,6 тонна сабзавоти тару тоза истеҳсол карда шуд. Дар 272 гармхона парвариши сабзавот ва дар 176 гармхона парвариши лимӯ ва гулҳо ба роҳ монда шудааст.

Дар ин бора аз мақомоти иҷроияи ҳокимияти давлатии вилояти Суғд ба АМИТ «Ховар» хабар доданд.

Ин дар ҳолест, ки дар ин шабу рӯзе, ки ҷаҳонро бемории ҳамагири коронавирус фаро гирифтааст, бадани мо беш аз пеш ба сабзавоту меваҳои босифат ниёз дорад ва тавассути истеъмоли онҳо масуният баланд мегардад.

Тибқи иттилои масъулини бахши кишоварзии мақомоти иҷроияи ҳокимияти давлатии вилоят, имрӯзҳо дар корхонаҳои кишоварзию хоҷагиҳои деҳқонӣ 448 гармхона фаъолият дошта, аз ин миқдор 280 адад гармхонаи навъи чинӣ мебошанд.

Майдони умумии кишти сабзавот дар гармхонаҳои хоҷагиҳои ҷамоавӣ ва деҳқонии вилоят ба 25,64 гектар баробар аст.