Дар муассисаҳои таълимии Душанбе оид ба пешгирии коронавирус чорабиниҳо доир мегарданд

ДУШАНБЕ, 16.04.2020 /АМИТ «Ховар»/. Бо мақсади пурзӯр намудани пешгирии хавфи коронавирус ва таъмини некӯаҳволии санитарӣ –эпидемиологӣ дар байни омӯзгорон ва хонандагони як зумра  мактабҳои миёнаи шаҳри Душанбе, ҳамчунин  дар 5 муассисаи таҳсилоти олии пойтахт аз ҷониби идораи наҷоти мамлакат суҳбатҳои фаҳмондадиҳӣ  гузаронда шуданд. Дар ин бора аз Кумитаи ҳолатҳои фавқулода ва мудофиаи  граждании назди Ҳукумати Ҷумҳурии Тоҷикистон иттилоъ доданд.

Дар ҷараёни вохӯрӣ кормандони Кумита аз видео ва филмҳои аниматсионӣ истифода намуданд. Ба воситаи онҳо риояи чораҳои пешгирӣ, гигиенаи шахсӣ ва эҳтиёҷ ба ёрии аввалини  тиббӣ ҳангоми пайдо шудани  нахустин нишонаҳои коронавирус маълумоти зарурӣ  манзур шуданд. Онҳо ба ин васила таваҷҷуҳи  беш аз 200 нафар донишҷӯёни мактаб ва донишгоҳҳоро ба ин масъалаи муҳим  ҷалб намуданд.

Ба ҷуз ин, кормандони тиббии Кумитаи мазкур дар синфхонаҳо ба мактаббачаҳо тарзи истифодаи дурусти маҳлули антисептикиро нишон дода, зарурати риояи қоидаҳои беҳдоштиро фаҳмониданд.

Дар фарҷоми вохӯрӣ ба иштирокчиён китобчаҳои иттилоотӣ тақсим карда шуданд.

АКС АЗ КҲФ ВА МГ-и Тоҷикистон