Дар Тоҷикистон 114 ҳодисаи фавқулода ба қайд гирифта шуд
![](https://khovar.tj/wp-content/uploads/2020/04/khf_0134.jpg)
ДУШАНБЕ, 14.04.2020. /АМИТ «Ховар»/. Давоми се моҳи сипаригардида дар қаламрави Тоҷикистон 114 ҳодисаи фавқулода ба қайд гирифта шуд. Аз ин шумора 6 ҳодиса ба аҳолӣ ва иқтисодиёти мамлакат зарар расонидааст, ки маблағи умумии он ҳудуди 1 миллиону 500 ҳазор сомониро ташкил медиҳад. Инчунин дар ин давра бар асари омадани сел 1 нафар ва фаромадани тарма 2 нафар сокинони мамлакат ба ҳалокат расиданд. Дар ин бора АМИТ «Ховар» бо истинод ба Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон хабар медиҳад.
Раиси Кумитаи ҳолатҳои фавқулода ва мудофиаи гражданӣ, генерал-лейтенант Рустам Назарзода 13 апрел зимни баргузории ҷаласаи ҳайати мушовараи ин ниҳод ба масъалаи ҳодисаҳои омадани сел, лағзиши тарма ва резиши санг таваҷҷуҳ зоҳир намуда, масъулинро ҷиҳати андешидани тадбирҳои саривақтӣ вазифадор кард.
«Диққати асосӣ ба тадбирҳои соҳилбандӣ, корҳои ҳаррӯзаи қувваҳои ҳарбӣ, таъмини ақибгоҳ, истифода, ҳифз ва таъмири техника ва силоҳҳо, риояи интизоми ҳарбӣ, фароҳам овардани шароит барои хизмати ҳарбии сарбозон равона гардид»,- омадааст дар иттилоияи Кумита.