Ғолибони Мусобиқаи ҷумҳуриявӣ оид ба таэквондо (WTF) миёни наврасон муайян гардиданд

ДУШАНБЕ, 15.04.2020. /АМИТ «Ховар»/. 11-12 апрел дар шаҳри Турсунзода Мусобиқаи ҷумҳуриявӣ оид ба таэквондо (WTF) миёни наврасон баргузор шуд. Варзишгарони навраси дастаи Душанбе-1 бо ба даст овардани бештари медалҳо ҷои аввалро сазовор шуданд. Варзишгарони шаҳру навоҳии тобеи марказ ҷои дуюм ва дастаи ВМКБ ҷои сеюмро ишғол карданд.  

Дар ин бора аз Федератсияи таэквондо (WTF)-и Тоҷикистон  ба мухбири АМИТ «Ховар» хабар доданд.

Дар мусобиқаи мазкур беш аз 126 нафар варзишгарон дар ҳайати дастаҳои Душанбе-1, Душанбе-2, Хатлон-1, Хатлон-2, ВМКБ, Суғд ва шаҳру навоҳии тобеи марказ иштирок карданд. Мусобиқа миёни духтарону писарон тибқи қоидаҳои Ташкилоти таэквондои ҷаҳонӣ (WTF) дар се равия – пумсе, ТК-5 ва инфиродӣ сурат гирифт.

Мусобиқаи мазкур бо мақсади тарғиби тарзи ҳаёти солим, ҷалби наврасон ба намуди олимпии таэквондо ва муайян кардани беҳтаринҳо дар ин намуди варзиш доир гардид.