Барномаи «Дармон»-и Радиои «Ховар» ба Рӯзи байналмилалии мубориза бар зидди нашъамандӣ ва гардиши ғайриқонуни маводи мухаддир бахшида мешавад

ДУШАНБЕ, 25.06.2020. /АМИТ «Ховар»/. Соли 1987 Маҷмаи Умумии СММ бо мақсади ноил гардидан ба ташкили ҷомеаи ҷаҳонии озод аз гардиши ғайриқонунии маводи мухаддир ва зоҳир намудани нишонаҳои устуворӣ дар мубориза бо ин падидаи номатлуб қарор қабул кард, ки ҳамасола 26 июн ҳамчун «Рӯзи байналмилалии мубориза бар зидди нашъамандӣ ва гардиши ғайриқонуни маводи мухаддир» ҷашн гирифта шавад.

Ҷумҳурии Тоҷикистон низ чун узви комилҳуқуқи ҷомеаи ҷаҳонӣ дар баробари дигар кишварҳо ин пешниҳодро ҷонибдорӣ намуда, тамоми кӯшишҳоро дар роҳи мубориза бо гардиши ғайриқонунии маводи мухаддир ба харҷ медиҳад, то солимии ҷомеаро  нигоҳ дорад. Зеро, ҷумҳурии мо бо доштани марзи тӯлонии зиёда аз 1400 км бо Ҷумҳурии исломии Афғонистон, ки яке аз кишварҳои бузурги тавлидкунандаи маводи нашъаовар  дар ҷаҳон мебошад,  дар сафи пеши мубориза бо нашъамандӣ, гардиши ғайриқонунӣ ва қочоқи маводи мухаддир қарор дорад. Дар ҳамин ҳол коршиносон аз он бонги изтироб мезананд, ки имрӯзҳо дар баробари пандемияи  СOVID-19 бемории нашъамандӣ низ бо хатарҳои дар пайдоштааш, кулли ҷомеаи ҷаҳонро ба ташвиш овардааст.

Барои дарёфти маълумоти бештар доир ба вазъи гирифторӣ ба ин беморӣ ва роҳҳои ташхису табобати он дар Тоҷикистон,    барномаи навбатии «Дармон»-и Радиои «Ховар»-ро пайгирӣ намоед.

Ин барномаро имрӯз, 25 июн, соати 09:30 (асл) ва такроран соатҳои 17:30 ва 21:30 метавонед аз Радиои «Ховар» дар таҳияи муҳаррири барнома Нарзулло АЛИЗОДА бишнавед.