Дар дарёи Ғунди шаҳри Хоруғ пули дарозтарини мошингузар бунёд мегардад

Июнь 19, 2020 13:32

ДУШАНБЕ, 19.06.2020 /АМИТ «Ховар»/. Раиси Вилояти Мухтори Кӯҳистони Бадахшон Ёдгор Файзов ва ҳайати кории муҳандисону мутахасисони Раёсати сохтмон ва хоҷагии роҳҳои Вазорати нақлиёти Ҷумҳурии Тоҷикистон ба мақсади ҳар чӣ зудтар оғоз бахшидан ба сохтмони пули калонтарин ва дарозтарин дар болои дарёи Ғунд дар маҳаллаи Шарифободи шаҳри Хоруғ аз маҳали иншооти бунёдшаванда боздид намуданд. Лоиҳаи пули сохташаванда аз ҷониби бузургтарин ширкати лоиҳакашию купруксозии «Темелсу Интернешнли давлати Туркия» таҳия гардида, бо паҳноии 15 метр ва бо дарозии 100 метр бо иқтидори борбардории 100 тонна сохта хоҳад шуд.

Раиси вилоят Ёдгор Файзов  зимни шиносоӣ аз  лоиҳаи пул қайд намуд, ки кӯчонидани бинову иншооти зери сохтмон қарордошта бояд, дар доираи талаботи мавҷуда сурат гирифта, маблағи сокинон пардохт карда шаванд. Пули мошингузар  бо тарҳи байналмилалӣ сохта шуда, аз 7 сутунпоя ва ду хатти ҳаракати нақлиёт иборат мебошад. Аз ҳарду тарафи ин пул роҳи пиёдагард сохта мешавад.  Сардори Ҷамъияти дорои масъулияташ маҳдуди «Автострада» Усмон Сидиқов ба роҳбарияти вилоят ва аъзоёни ҳайати корӣ ду намуди тарҳи лоиҳаро муаррифӣ намуда изҳор дошт, ки ҳар таклифу пешниҳодҳои дар ин ҷо ироашуда, ҳангоми бунёди пул ҳатман ба инобат гирифта мешаванд.

Лоиҳаи пули мошингузар аз ҷониби Ҳукумати Ҷумҳурии Тоҷикистон ва маблағгузории Бонки умумиҷаҳонӣ татбиқ гардида, ҷавобгў ба талаботи сатҳи ҷаҳонӣ мебошад. Дар асоси тарҳи мазкур панҷ хона, як мағозаю нуқтаи фурўши сӯзишворӣ ва дигар биноҳое, ки дар зери сохтмони роҳ қарор доранд аз ҷониби мутахассисони соҳа ҳисоб шуда, маблағи ин биноҳо пурра  ҷуброн карда мешаванд.

Аз тарҳи ин иншоот бар меояд, ки баъди пайваст шудани ду тарафи соҳил бо дарозии 100 метр ҳамчунин роҳҳои ба пул пайвастшаванда низ таҷдиду навсозӣ ва чароғон карда мешаванд. Мутахассисон изҳор намуданд, ки бо бунёд гардидани ин пул танбашавии нақлиёт дар хиёбони Шириншоҳ Шоҳтемур аз байн меравад.

Раиси вилоят Ёдгор Файзов  миннатдории амиқи худро аз номи бошандагони вилоят ба Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон  Эмомалӣ Раҳмон  баён дошт ва афзуд, ки маҳз бо сиёсати бунёдкоронаи Ҳукумати Ҷумҳурии Тоҷикистон дар замони соҳибистиқлолии кишвар маркази маъмурии вилоят-шаҳри Хоруғ боз ҳам ободу зебо гардида, ба як макони дўстдоштаи сайёҳону меҳмонони дохилию хориҷӣ табдил ёфтааст.

Июнь 19, 2020 13:32

Хабарҳои дигари ин бахш

Дар Эстония Хонаи савдои Тоҷикистон таъсис дода мешавад
Намояндагони Тоҷикистон дар «Аirspace world 2024» дар Женева иштирок намуданд
Роҳбари хоҷагии деҳқонии «Бобои Носир»: «Истифодаи оқилонаи 7,5 гектар замин ва даромад аз он дар баланд гардидани сатҳи зиндагии 5 оила мусоидат намуд»
Деҳқонони ноҳияи Мастчоҳ имсол дар майдони зиёда аз 23 ҳазор гектар кишту парвариши зироати кишоварзиро ба нақша гирифтаанд
Дар шаҳри Хуҷанд Намоишгоҳи X байналмилалии савдо «Суғд-2024» доир мегардад
«РОҲ БА СӮИ ТИЁНШОН». Душанбе охири моҳи май мизбони конфронси байналмилалӣ мегардад
Соли 2023 ба буҷети шаҳри Гулистон аз ҳисоби хизматрасонии сайёҳӣ ва табобатӣ зиёда аз 40 миллион сомонӣ ворид шуд
Ҳоҷагидорони Кооперативи истеҳсолии «Сомон-Бохтар»-и ноҳияи Кӯшониён майдони парвариши лимӯро васеъ менамоянд
Сардхонаи муосири деҳоти «Файзи Истиқлол»-и ноҳияи Кӯшониён ба аҳолӣ хизмат мерасонад
«ТОҶИКИСТОН-2024». Дар Душанбе Намоишгоҳи байналмилалии универсалӣ доир мешавад
120 гектар замини канори деҳаи Ғӯсари шаҳри Панҷакент бо оби полезӣ таъмин мегардад
Масъалаи тезонидани корҳо оид ба тармим ва навсозии нақби «Истиқлол» дар Душанбе баррасӣ гардид