Захарова: Хуруҷи низомиёни ИМА аз Афғонистон боиси афзоиши таҳдиди хатар ба Осиёи Марказӣ нахоҳад шуд

Июнь 18, 2020 09:54

ДУШАНБЕ, 18.06.2020 /АМИТ «Ховар»/.  Россия бар ин бовар аст, ки хуруҷи низомиёни амрикоӣ аз Афғонистон наметавонад боиси афзоиши таҳдид ба кишварҳои Осиёи Марказӣ гардад. Дар ин бора рӯзи чоршанбе дар брифинг намояндаи расмии Вазорати корҳои хориҷии Федератсияи Россия Мария  Захарова (дар акс) изҳор намуд, хабар медиҳад АМИТ «Ховар» бо истинод ба ТАСС. 

«Бовар надорем, ки хуруҷи қӯшунҳои амрикоӣ аз Афғонистон боиси афзоиши таҳдид ба кишварҳои Осиёи Марказӣ хоҳад шуд. Баръакс, ҳузури низомиёни амрикоӣ ва НАТО барои мухолифини мусаллаҳ як омили таҳриккунанда ва монеи эътидоли вазъи кишвар аст» — гуфт ӯ.

Ба гуфти дипломат, ҷониби Россия умедвор аст, ки татбиқи созишномаи сулҳ байни ИМА ва Толибон (намояндагони ҷунбиши Толибон, ки дар ФР мамнуъ шудааст), ки 29 феврал дар Доҳа ба имзо расидааст, боиси хуруҷи комили  нерӯҳои хориҷӣ аз Афғонистон хоҳад шуд. «Инчунин ба фикри мо эътидоли авзоъ дар кишвар ба ҳукуматдорони Афғонистон имкон медиҳад, ки ба таҳдидҳои терроризм ва ҷиноятҳои вобаста ба маводи мухаддир, ки ҳоло қаламрави Ҷумҳурии Исломиро фаро гирифтаанд, ба таври самаранок мубориза баранд» – афзуд ӯ.

Намояндаи расмии идораи дипломатӣ қайд кард, ки ФР иқтидори пойгоҳи низомии худро дар Тоҷикистон мустаҳкам хоҳад кард. «Мо ин иқдомотро  шарти муҳими баланд бардоштани бехатарии сарҳадоти ҷанубии Созмони Аҳдномаи амнияти дастаҷамъӣ (СААД) меҳисобем» – иброз намуд Захарова.

Вай ёдовар шуд, ки дар доираи СААД як қатор чорабиниҳо ҷиҳати коҳиши ташаннуҷ дар марзи Тоҷикистону Афғонистон амалӣ карда мешаванд. «Инчунин ҷиҳати пурзӯр намудани фаъолияти иктишофӣ дар самти назорати ҷойивазкунии ҷангиён ва мониторинги самтҳои ниҳоят хатарнок чораҳо андешида мешаванд», — қайд намуд дипломат.

Тавре Захарова таъкид намуд, СААД ба ҳама гуна сенарияи рушди вазъи низомӣ ва сиёсӣ дар Афғонистон омода аст. «Давлатҳои аъзо барои таҳкими марзҳои ҷанубии минтақаи масъулияти СААД муштаракан талош менамоянд,  аз ҷумла таҷрибаи доир намудани машқҳои қисмҳои низомии ин сохторро дар ноҳияҳои бо Афғонистони ҳамсарҳади Тоҷикистон идома медиҳанд», – хулоса намуд вай.

АКС: © РИА Новости/Кирилл Калинников

Июнь 18, 2020 09:54

Хабарҳои дигари ин бахш

Раёсати Шурои ҳамоҳангсозии мақомоти зиддимухаддиротии СААД дар соли 2027 ба Тоҷикистон гузашт
Байни Тоҷикистон ва Амороти Муттаҳидаи Арабӣ Ёддошти тафоҳум оид ба эътирофи мутақобили шаҳодатномаҳои ронандагӣ ба имзо расид
Дар Прокуратураи генералӣ Рӯзи Президентро таҷлил намуданд
Нақшаи даъвати тирамоҳии шаҳрвандони Тоҷикистон ба сафи Артиши миллӣ пурра иҷро шуд
80 корманди мақомоти корҳои дохилӣ бо манзили зист таъмин мешаванд
Соли 2027 Тоҷикистон раёсатро дар Созмони Аҳдномаи амнияти дастҷамъӣ ба уҳда мегирад
Ҳабибулло Воҳидзода бо сафири навтаъйини Беларус дар Тоҷикистон мулоқот намуд
Эмомалӣ Раҳмон: «Ҳар корманди милитсия бояд бо рафтору гуфтор, дониш, самимияту эътимод сазовори боварии шаҳрвандон бошад»
Дар Роғун Рӯзи милитсияи тоҷикро таҷлил намуданд
Дар Суғд Рӯзи милитсияи тоҷикро ботантана таҷлил намуданд
Дар 26 шаҳру ноҳияи Тоҷикистон шуъбаҳои Вазорати корҳои дохилӣ бо биноҳои замонавӣ таъмин шуданд
Рӯзи милитсияи тоҷик дар Вилояти Мухтори Кӯҳистони Бадахшон ботантана таҷлил гардид