ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Бо саҳми оилаи Соҳибовҳо беш аз 13 км роҳҳои деҳаи Зағертути шаҳри Леваканд мумфарш мегарданд

ДУШАНБЕ, 25.08.2020. /АМИТ «Ховар»/. Бахшида ба ҷашни 30-солагии Истиқлолияти давлатии Ҷумҳурии Тоҷикистон  дар шаҳри Леваканти вилояти Хатлон аз ҷониби соҳибкорони ватанӣ- оилаи Соҳибовҳо беш аз 13 км роҳҳои деҳаи Зағертут мумфарш мегарданд. Дар ин бора аз шуъбаи иттилоотию таҳлилии дастгоҳи раиси вилояти Хатлон ба мухбири АМИТ «Ховар» хабар доданд.

Ҳоло дар деҳаи Зағертут корҳои роҳсозӣ босуръат идома дошта, сохтмончиён талош доранд, ки роҳи мазкурро   дар кӯтоҳтарин фурсат  бо сифати баланд мумфарш намуда, ба истифода диҳанд.

Ҳамчунин барои дар муддати кӯтоҳтарин ба итмом расидани сохтмон ва ҳамворнамоии роҳҳо ба кумаки соҳибкорон Муассисаи давлатии нигаҳдории роҳҳои автомобилгарди шаҳри Левакант бо кормандон ва техникаҳои  роҳсозӣ сафарбар гардида, корҳо авҷи бештар ёфтаанд.

То имрӯз  дар деҳоти Леваканд аз ҷониби соҳибкорон беш аз 6 км роҳ мумфарш гардидааст.

Ёдовар мешавем, ки имрӯзҳо бо ҳиммати соҳибкорони бонангу номус ва фарзандони ватандӯсти деҳоту ноҳия бунёду мумфаршкунии боз садҳо км роҳҳо идома дошта,  ин ҳама бунёдкорию созандагӣ ба хотири ба шаҳр наздик сохтани симои деҳот ва таъмини инфрасохтори зарурӣ дар он мебошад.