Пешвои миллат Эмомалӣ Раҳмон Парчам ва Нишони давлатиро дар ноҳияи Шаҳритус ифтитоҳ намуданд

ДУШАНБЕ, 22.09.2020 /АМИТ «Ховар»/. 22 сентябр дар ноҳияи Шаҳритус Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар майдони Исмоили Сомонии ноҳия рамзҳои асосии давлатдорӣ — Парчам ва Нишони давлатиро дар вазъияти тантанавӣ ифтитоҳ карданд.

Баландии Парчам якҷо бо сутунпояаш 53 метрро ташкил дода, дарозӣ ва паҳноии матои он 14 бар 7 метр мебошад.

Пояи Нишони давлатӣ 28 метрро ташкил менамояд.

Корҳои сохтмонӣ дар Майдони Парчам ва Нишони давлатӣ дар муддати кӯтоҳ ва бо сифати баланд ба итмом расонида шуд.

Аснои шиносоӣ Пешвои миллат муҳтарам Эмомалӣ Раҳмон аз сифати корҳои анҷомёфта изҳори қаноатмандӣ намуда, қомат афрохтани Парчам ва Нишони давлатиро дар маркази ноҳия иқдоми нек арзёбӣ карданд.

Мавриди зикр аст, ки иншооти мазкур бо дастгирии Мақомоти иҷроияи ҳокимияти давлатии ноҳияи Шаҳритус ва ҷалби соҳибкорони ватандӯст бахшида ба 30-юмин солгарди Истиқлоли давлатии Ҷумҳурии Тоҷикистон бунёд гардида, дар корҳои сохтмонӣ мутахассисони маҳаллӣ ҷалб гардиданд.

Атрофи майдони Парчам ва Нишони давлатӣ бо гулу дарахтони сояафкану ороишӣ ва фаввораҳо оро дода шуда, ҳамчунин барои истироҳати шаҳрвандон нишастгоҳҳои замонавӣ насб гардидаанд. Тамоми роҳрав ва гузаргоҳҳои назди Майдони Парчам ва Нишони давлатӣ сафолакпӯш гардидааст, ки барои гаштугузори бошандагони ноҳия мусоид мебошад.

Майдони мазкур дар масоҳати умумии 0,87 гектар бунёд гардида, ба симои ноҳия ҳусну таровати тоза зам менамояд. Баъди ба истифода додани рамзҳои давлатдории миллӣ, барои истироҳату фароғати сокинони ноҳияи Шаҳритус низ имконияти хуб фароҳам гардид.

Ҳамин гуна корҳои ободонию бунёдкорӣ дар ноҳияи Шаҳритус идома дошта, дар назар аст, ки то ҷашни 30-юмин солгарди Истиқлоли давлатӣ боз даҳҳо иншооти дигар мавриди баҳрабардорӣ қарор дода шаванд.