Раъно Насриддинова дар Суғд соҳиби «Шоҳҷоиза»-и Озмуни ҷумҳуриявии «Фурӯғи субҳи доноӣ китоб аст» гардид

ДУШАНБЕ, 30.09.2020 /АМИТ «Ховар»/. Дар вилояти Суғд даври вилоятии Озмуни ҷумҳуриявии «Фурӯғи субҳи доноӣ китоб аст» ҷамъбаст гардид. Зимни он хонандаи синфи 11 мактаби таҳсилоти миёнаи умумии №28 шаҳри Панҷакент Раъно Насриддинова «Шоҳҷоиза»-и озмун ва ҷоизаи махсуси раиси вилояти Суғд — 20 ҳазор сомонӣ  ба даст овард. Дар ин бора хабарнигори АМИТ «Ховар» бо истинод ба маркази матбуоти раиси вилояти Суғд иттилоъ медиҳад.

Дар маросими ҷамъбасти озмун 39 нафар ғолибони озмун аз рӯи 5 номинатсия муайян гардида, аз ҷониби Мақомоти иҷроияи ҳокимияти давлатии вилояти Суғд бо Диплом ва маблағҳои пулӣ сарфароз гардонида шуданд.

Озмуни мазкур дар «Мактаби президентӣ барои хонандагони болаёқат»и шаҳри Бӯстони вилояти Суғд доир шуда, дар он 388 нафар ғолибони даври шаҳрию ноҳиявӣ ба  даври вилоятии  озмун роҳхат гирифта, аз рӯи номинатсияҳои аз ёд кардану хондани осори адибони классику муосир ва адабиёти ҷаҳон, қироати ашъори бачагона ва афсонаву ривоятҳои халқӣ байни ҳам қувваозмоӣ намуданд.

Озмун аз чор давр иборат буда, аз моҳи феврал то моҳи декабри соли равон ба таври зайл гузаронида мешавад.

Даври сеюм аз нимаи дуюми моҳи сентябр дар маркази Вилояти Мухтори Кӯҳистони Бадахшон, вилоятҳо ва шаҳри Душанбе доир мегардад.

Даври чоруми озмун – даври ҷумҳуриявӣ  бо иштироки ғолибони даври сеюм то 10 декабр дар Муассисаи давлатии «Китобхонаи миллии Тоҷикистон» баргузор мегардад.