Аваз Қамчинов ва Раҳматулло Фузайлов — ғолибони моҳи сентябр дар Лигаи якуми Тоҷикистон оид ба футбол

ДУШАНБЕ, 05.10.2020 /АМИТ «Ховар»/. Лигаи футболи Тоҷикистон бозингар ва мураббии беҳтарини чемпионати мамлакатро байни дастаҳои Лигаи аввал дар моҳи гузашта муайян кард.

Бино ба иттилои АМИТ «Ховар» бо истинод ба Федератсияи футболи Тоҷикистон, аз рӯи ҷамъбасти натиҷаҳои моҳи сентябр ҳамлагари дастаи «Ҳулбук» -и Восеъ Аваз Қамчинов беҳтарин бозингари Лигаи якуми Тоҷикистон эътироф шуд, ки дар се вохӯрӣ унвони бозингари беҳтаринро соҳиб шуда буд.

Беҳтарин мураббии моҳи сентябр дар Лигаи якуми мамлакат  мураббии дастаи  «Равшан» -и Зафаробод  — Раҳматулло Фузайлов эътироф шуд. Таҳти роҳбарии ӯ дастаи «Равшан» дар як моҳи охир ҳафт бозӣ анҷом дода, дар 5 — то пирӯз шуд, як вохӯриро мусовӣ кард ва дар як вохӯрӣ шикаст хӯрд.

Лигаи футболи Тоҷикистон ғолибони моҳи сентябрро бо мукофотҳои пулӣ сарфароз хоҳад гардонид.