Дар шаҳри Хоруғ Мусобиқаи варзишӣ оид ба намуди волейбол байни донишҷӯён оғоз гардид

ДУШАНБЕ, 29.10.2020 /АМИТ «Ховар»/. Бахшида ба Рӯзи Конститутсияи Ҷумҳурии Тоҷикистон дар маҷмааи варзишии шаҳри Хоруғ байни 13 дастаи донишҷӯёни Донишгоҳи давлатии Хоруғ ба номи Моёншо Назаршоев мусобиқаи волейбол оғоз гардид.  Дар ин бора аз Кумитаи кор бо ҷавонон ва варзиши назди Ҳукумати  Ҷумҳурии Тоҷикистон  ба АМИТ «Ховар» хабар доданд.

Мусобиқаи мазкур бо ширкати ҳафт дастаи ҷавонписарону шаш дастаи донишҷӯдухтарон то 5 ноябр идома ёфта, ғолибонро Ҷоми ректор ва медалу ифтихорномаҳои донишгоҳ интизор аст.

Ҳадафи асосии мусобиқа тарғиби тарзи ҳаёти солим, ҷалб намудани ҷавонон ба машғулияти мунтазами тарбияи ҷисмонӣ, рушди варзиши касбӣ байни донишҷӯёни муассисаҳои таҳсилоти олӣ ва миёнаи касбии ҷумҳурӣ, баланд бардоштани маҳорати касбии варзишгарон, муайян намудани узви дастаи мунтахаби Ҷумҳурии Тоҷикистон миёни муассисаҳои болозикр ва амалигардонии «Барномаи маҷмӯии рушди тарбияи ҷисмонӣ ва варзиш дар Ҷумҳурии Тоҷикистон барои солҳои 2017 – 2021» мебошад.