Дастаи мунтахаби Тоҷикистон моҳи ноябр ду бозии дӯстона баргузор мекунад

Октябрь 14, 2020 09:18

ДУШАНБЕ, 14.10.2020. /АМИТ «Ховар»/. Дастаи футболи мунтахаби Тоҷикистон моҳи ноябр бо дастаҳои мунтахаби Аморати Муттаҳидаи Араб ва Баҳрайн ду бозии дӯстона баргузор мекунад. Дастаи мунтахаби Тоҷикистон  7  ноябр бо дастаи  мунтахаби  Баҳрайн ва 12 ноябр бо дастаи мунтахаби Аморати Муттаҳидаи Араб бозии рафиқона доир мекунад. Ҳарду рақобати шогирдони Усмон Тошев дар меҳмонӣ дар шаҳри Дубай сурат мегиранд. Дастаи мунтахаби Тоҷикистон барои бозиҳои мазкур охири моҳи октябр ба тамринҳо шурӯъ мекунад. Дар ин бора  шореҳи  варзиши АМИТ «Ховар» Меҳрони  Қурбон бо истинод ба Федератсияи футболи Тоҷикистон иттилоъ медиҳад.

Ёдовар мешавем, ки бинобар сабаби бемории Ковид-19 бозиҳои марҳилаи интихобии Ҷоми ҷаҳон-2022 дар минтақаи Осиё ба соли оянда гузаронида шуданд. Дастаи мунтахаби Тоҷикистон соли оянда бо дастаҳои  мунтахаби Япония, Муғулистон ва Мянма рақобат мекунад.

Бозиҳои дӯстона

7 ноябр (шанбе)

Баҳрайн – Тоҷикистон

Дубай, АМА

12 ноябр (панҷшанбе)

Аморати Муттаҳидаи Араб – Тоҷикистон

Дубай, АМА

Хотиррасон  мешавем, ки  моҳи  сентябри соли равон дастаи футболи мунтахаби  Тоҷикистон дар нахустин бозии расмии худ дар доираи бозии дӯстона дар сафар аз дастаи мунтахаби Ӯзбекистон мағлуб шуд. Вохӯрии ин дастаҳо дар варзишгоҳи «Локомотив»-и шаҳри Тошканди Ҷумҳурии  Ӯзбекистон  дар сатҳи баланд сурат гирифт ва бо ҳисоби 2:1 ба нафъи мизбонон анҷом ёфт. Ҳисоб дар дақиқаи 32-юми бозӣ аз ҷониби ҳамлагари мизбон Шаҳзод Убайдуллоев кушода шуда, қисми аввал бо натиҷаи 1:0 ба поён расид.

Дар оғози қисми дуюми рақобат Зоир Ҷӯрабоев баъди ба майдон баромадан ҳисобро баробар кард, аммо дар дақиқаи 62-юми дидор довари ӯзбек — Аҳрол Ризқуллоев ба дарвозаи дастаи мунтахаби Тоҷикистон   зарбаи пеналтии баҳснок таъйин кард ва онро Мурод Холмуҳаммадов иҷро намуд. Ҳамин тариқ,  дастаи мунтахаби  Тоҷикистон дар бозии нуҳуми хеш ба муқобили дастаи мунтахаби  Ӯзбекистон ба бохт рӯ ба рӯ гардид.

Бозии дӯстона

Ӯзбекистон – ТОҶИКИСТОН – 2:1

Голҳо: Шаҳзод Убайдуллоев, 33 (1:0). Зоир Ҷурабоев, 48 (1:1). Мурод Холмуҳаммадов, 67 – аз пеналти (2:1).

Ҳайати дастаи мунтахаби Тоҷикистон муқобили  дастаи мунтахаби  Ӯзбекистон  чунин буд

Дарвозабонҳо: Рустам Ятимов («Истиқлол»), Шоҳрух Қирғизбоев («Локомотив-Помир»), Қурбоналӣ Бобоев («Кӯктош»);

Ҳимоятгарон: Аҳтам Назаров, Искандар Ҷалилов, Табрези Давлатмир, Зоир Ҷӯрабоев (ҳарчор аз «Истиқлол»), Манучеҳр Сафаров («Локомотив-Помир»), Хуршед Бекназаров, Алишер Баротов (ҳарду аз «Хуҷанд»);

Нимҳимоятгарон: Алишер Ҷалилов, Амирбек Ҷӯрабоев, Эҳсони Панҷшанбе, Муҳаммадҷон Раҳимов (ҳарчор аз «Истиқлол»), Илҳом Баротов («Истаравшан»), Умарҷон Шарипов («Хатлон»), Шарафҷон Солеҳов («Файзканд»), Комрон Турсунов («Моҳун Баган», Ҳиндустон), Хуршед Абдуллоев («Душанбе-83»);

Ҳамлагарон: Манучеҳр Ҷалилов, Шериддин Бобоев (ҳарду аз «Истиқлол»), Ҷаҳонгир Эргашев, Дилшод Бозоров, Тоҳир Малодӯстов (ҳарсе аз «Хуҷанд»)

Сармураббӣ – Усмон Тошев.

Октябрь 14, 2020 09:18

Хабарҳои дигари ин бахш

ҶОМИ ОСИЁ-2025. Имрӯз дастаи наврасони Тоҷикистон (U-17) дар даври аввал бо мунтахаби Уммон бозӣ мекунад
Барои дарёфти «Ҷоми Раиси шаҳри Душанбе» Мусобиқаи байналмилалии гӯштингирӣ баргузор мегардад
ҶОМИ ОСИЁ-2025. Дастаи мунтахаби наврасони Тоҷикистон (U-17) дар Ҷидда тамринҳои навбатӣ баргузор намуд
Дар Чемпионати Осиё оид ба ҷудо Тоҷикистонро 13 варзишгар муаррифӣ менамояд
Ғолибони шоҳҷоизаҳои Мусобиқаи гӯштини миллӣ дар ноҳияи Темурмалик муайян шуданд
Душанбе мизбони Форуми Шурои олимпии Осиё ва ҳамбастагии олимпӣ мегардад
Дар Душанбе Ҷоми ҷаҳон оид ба велосипедронии кӯҳӣ баргузор мегардад
Абдулло Давлатов бозиҳои қисми ниҳоии Ҷоми Осиё-2025-ро доварӣ менамояд
Дастаи мунтахаби наврасони Тоҷикистон (U-17) панҷ бозии санҷишӣ анҷом дод
ЧЕМПИОНАТИ ТОҶИКИСТОН. Бозиҳои даври сеюми дастаҳои Лигаи олӣ оид ба футбол оғоз мегарданд
Рақибони дастаи мунтахаби занонаи Тоҷикистон оид ба футбол дар марҳилаи интихобии Ҷоми Осиё-2026 муайян шуданд
Ғолибони Мусобиқаи байналмилалии гӯштингирӣ дар шаҳри Истаравшан муайян шуданд