Геологҳои тоҷику ӯзбек ҳамкориро дар соҳаи иктишофи муштараки конҳо тақвият медиҳанд

ДУШАНБЕ, 01.10.2020. /АМИТ «Ховар»/. Тақвияти кор дар самти ҳамкории муштарак дар минтақаҳои наздимарзӣ, табодули таҷриба, ташкили конфронсҳои муштарак ва тренингҳо бо мақсади баланд бардоштани сатҳи тахассуси мутахассисони ҷавони соҳа, мубодилаи ҳуҷҷатҳои меъёрӣ оид ба гузариш ба стандартҳои байналмилалӣ, ҳисоб кардани захираҳои канданиҳои фоиданок аз масъалаҳое мебошанд, ки зимни мулоқоти сардори Саридораи геологияи назди Ҳукумати  Ҷумҳурии Тоҷикистон Илҳомҷон Оймуҳаммадзода ва раиси Кумитаи давлатии Ҷумҳурии Ӯзбекистон оид ба геология ва захираҳои минералӣ Бобир Исломов, ки дар ҳайати намояндагони Ӯзбекистон ба Тоҷикистон омадаанд, мавриди баррасӣ қарор гирифтанд.

 Дар ҷараёни мулоқот масъалаҳои ҳамкории минбаъда дар доираи Созишнома оид ба корҳои илмӣ-тадқиқотӣ дар соҳаи геология байни Саридораи геологияи назди Ҳукумати Ҷумҳурии Тоҷикистон ва Кумитаи давлатии Ҷумҳурии Ӯзбекистон оид ба геология ва захираҳои минералӣ баррасӣ шуданд.

Зимни ҷаласа сардори Саридораи геологияи назди Ҳукумати  Ҷумҳурии Тоҷикистон Илҳомҷон Оймуҳаммадзода зикр кард, ки дар асоси Созишномаи баимзорасида корҳои муайяне анҷом дода шуданд. Аз ҷумла, дар шаҳрҳои Хуҷанд ва Самарқанд ҷаласаҳои кумитаи муштарак баргузор гардиданд, ки дар онҳо якчанд  масъалаҳои мустақим ба нуктаҳои Созишнома дахлдошта ҳал карда шуданд.

Ҷонибҳо дар оянда ташкил кардани курсҳои такмили ихтисоси мутахассисони ҷавонро дар тамоми соҳаҳои геология зарур шумориданд, зеро соҳаи геология дар айни замон ба мутахассисони баландихтисос ниёз дорад.

Ёдовар мешавем, ки 17 августи соли 2018 зимни сафари давлатии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Тошканд байни Саридораи геологияи назди Ҳукумати Ҷумҳурии Тоҷикистон ва Кумитаи давлатии Ҷумҳурии Ӯзбекистон Созишнома оид ба геология ва захираҳои минералӣ барои гузаронидани корҳои муштараки илмӣ -тадқиқотӣ дар соҳаи геология дар минтақаҳои наздисарҳадӣ ба имзо расид.

Тибқи банди 4 созишномаи мазкур аз ҳисоби кормандони Саридораи геологияи назди Ҳукумати Ҷумҳурии Тоҷикистон ва Кумитаи давлатии Ҷумҳурии Ӯзбекистон 11 ва 18 октябри соли 2018 Кумитаи муштарак оид ба геология ва захираҳои минералӣ созмон дода шуд.

Кумитаи давлатии Ҷумҳурии Ӯзбекистон оид ба геология ва захираҳои минералӣ  12 ноябри соли 2018 ба Саридораи геологияи назди Ҳукумати Ҷумҳурии Тоҷикистон барои ҳамкории муштарак пешниҳод иборат аз 7 банд ирсол намуд. Бандҳои пешниҳод аз омӯзиши магматизм ва металлогенияи тилло, нуқра, мис ва дигар металлҳо дар кӯҳи Курама, шароити ташаккул ва қонуниятҳои ҷойгиршавии конҳои бузурги комплексию эндогении металлҳои асил дар мисоли конҳои Оқтеппа ва Кони мансур, омӯзиши геофизики аномалияҳои термикии Адрасмону Чуст бо мақсади муайян намудани ҳудудҳои он, аниқ намудани пайдоиш ва баҳодиҳии имконияти ба даст даровардани неруи геотермалӣ, таҳияи маҷмӯи харитаҳои миқёси 1:1000 000 ва ё 1:500 000 геологӣ, тектоникӣ, минерагенӣ ва канданиҳои фоиданок дар минтақаҳои наздисарҳадии Тоҷикистон ва Ӯзбекистон бо истифода аз технологияҳои «Системаи ахбороти географӣ» (ГИС) таҳлили ҳолати муосири ҳудудҳои байнисарҳадӣ вобаста ба масъалаҳои объектҳои истеҳсолӣ ва партовҳои онҳо, тадқиқоти ярчҳои таҳти таъсири боришоти атмосферӣ ва зилзилаҳои минтақаи Помиру Ҳимолой алоқаманданд, мубодилаи таҷрибаҳо оид ба омӯзиши минтақаҳои тилло ва металлҳои нодирдошта дар кӯҳҳои Чақали Калон, Оқата ва минтақаҳои тиллодори кӯҳи Мачитлии қаторкӯҳи Ҳисор иборат мебошанд.