Дар Донишгоҳи давлатии тиббии Тоҷикистон оид ба рушди инноватсионии илм ва таълим Конфронси байналмилалии илмӣ-амалӣ доир шуд

Ноябрь 27, 2020 15:19

ДУШАНБЕ, 27.11.2020 /АМИТ «Ховар»/. Имрӯз дар Донишгоҳи давлатии тиббии Тоҷикистон ба номи Абӯалӣ ибни Сино бахшида ба Солҳои рушди деҳот, сайёҳӣ ва ҳунарҳои мардумӣ 68-умин Конфронси солонаи байналмилалии илмӣ-амалӣ дар мавзўи «Заминаҳои бунёдии рушди инноватсионии илм ва таълим» баргузор гардид. Дар конфронси мазкур олимон ва ходимони сиёсии ватанӣ, меҳмонон аз Федератсияи Россия, Қазоқистон, Ўзбекистон, Қирғизистон, Беларус, Германия, Озарбойҷон, Украина ва ИМА ба таври онлайн иштирок намуданд.

Ректори Донишгоҳи давлатии тиббии Тоҷикистон ба номи Абӯалӣ ибни Сино, профессор Маҳмадшоҳ Гулзода  зикр намуд, ки Донишгоҳи давлатии тиббии Тоҷикистон дар баробари омода намудани мутахассисони соҳаи тандурустии мамлакат, инчунин дар рушди илми тиб нақши калидӣ мебозад. Ҳамоиши илмии имрӯза баҳри натиҷагирии фаъолияти илмии донишгоҳ, таҳлили амиқи илмии мушкилот ва дар ин замина тарҳрезии тадқиқоти илмӣ нақши муассир мегузорад.

“Ҳукумати Ҷумҳурии Тоҷикистон ба соҳаи илму маориф афзалияти аввалиндараҷа дода, дар Стратегияи миллии рушди мамлакат то соли 2030 сармояи инсонӣ ҳадафи олии стратегӣ ба ҳисоб меравад. Зимни вохӯрӣ бо олимони ҷумҳурӣ Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар назди онҳо вазифаҳои нав гузоштанд, ки инро оғози марҳилаи нави рушди илм донистан мумкин аст. Дар заминаи дастуру супоришҳои Сарвари давлат Академияи илмҳои Ҷумҳурии Тоҷикистон мавқеи миллӣ пайдо намуда, илмҳои тиббӣ яке аз самтҳои афзалиятноки  Академия муайян гардид”,- гуфт ректори Донишгоҳи давлатии тиббии Тоҷикистон.

Ҳамчунин номбурда иброз дошт, ки тибқи таҳлилҳо,  сабабҳои чоп нагардидани мақолаҳои илмии олимон ва муаррифӣ нагардидани илми тоҷик дар арсаи байналмилалӣ маҳз ҷавобгӯ набудани дизайни тадқиқот ва усулҳои таҳлил аст, ки барои бартараф шудани мушкилот имрӯз ба ин масъала таваҷҷуҳи аввалиндараҷа бояд дода шавад.

“Бояд гуфт, ки бе мавҷудияти озмоишгоҳҳои муҷаҳҳазу замонавӣ ва пояи устуавори моддиву техникӣ роҳандозӣ намудани тадқиқоти зарурӣ ғайриимкон аст. Вобаста ба ин роҳбарияти донишгоҳ тасмим гирифтааст, ки таҷҳизоти муосири озмоишӣ дастрас намояд. Яке аз ҳадафҳои стратегии  донишгоҳ  то соли 2025 бунёди Пажӯҳишгоҳи тиббии фундаменталӣ ба ҳисоб меравад”,-гуфт М. Гулзода.

Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода зимни суханронии фосилавӣ зикр намуд, ки “Донишгоҳи давлатии тиббии Тоҷикистон яке аз марказҳои асосии илмии олимону донишмандони соҳаи тандурустӣ ба ҳисоб меравад. Имсол ин ҳамоиши бонуфузи илмӣ дар шароите доир мегардад, ки хурӯҷи пандемияи COVID-19 боиси ташвиши ҷиддии мардуми сайёра гашта, бо мақсади пешгирии паҳншавии минбаъда ва дарёфти ваксинаи мувофиқи он дар машҳуртарин озмоишгоҳу марказҳои эпидемиологии дунё тадқиқоти олимону профессорон идома дорад. Хушбахтона, аз рӯзи нахустини бақайдгирии  ваксинаи аввалин дар Россия ва Амрико маълумот интишор шуданд, ки ин аз қудрату тавоноии илми тибби муосир алайҳи ҳама гуна хавфу хатарҳои эпидемиологӣ гувоҳӣ медиҳад”.

Ҳамчунин дар конфронс дастовардҳои олимони маъруфи Тоҷикистон ва олимони шинохтаи кишварҳои хориҷӣ ба доираи васеи иштирокчиён пешниҳод гардида, масоили таҳқиқоти фундаменталӣ ва амалӣ дар тиб,  дастовардҳои соҳаҳои мухталифи илми тиб, технологияи муосиру инноватсионӣ дар тибби назарӣ ва клиникӣ, татбиқи  дастовардҳои навини илмӣ дар раванди таҳсилоти олии тиббӣ баррасӣ шуданд.

Мавзуъҳои мубрами банақшагирифта дар ҷаласаи  пленарӣ,  симпозиумҳои «ВНМО/БПНМ  ва масъалаҳои мубрами микробиология, иммунология ва вирусология», «Физиологияи нормалӣ» мавриди таҳлилу баррасӣ қарор дода шуданд.

Дар конфронс 188 маърӯзаи илмии олимон баррасӣ гардиданд, ки 71 маърӯза аз кишварҳои хориҷи дуру наздик ворид шудаанд.

Дар хотимаи конфронс резолютсия қабул карда шуд, ки он барои ворид намудани дастовардҳои олимони ватанӣ ва ҷаҳонӣ ба амалияи илми тиб, пешрафти соҳаи тандурустӣ ва солимгардонии ҷомеа мусоидат хоҳад кард.

Холисаи АСОМИДДИН,
АМИТ «Ховар»

Ноябрь 27, 2020 15:19

Хабарҳои дигари ин бахш

Кормандони мақомоти милитсияи шаҳри Душанбе ба тамошои Осорхонаи миллии Тоҷикистон рафтанд
Бахшида ба Рӯзи байналмилалии ҳифзи ёдгориҳои таърихию фарҳангӣ конференсияи илмӣ-назариявӣ доир мешавад
Дар Москва ба муносибати 25-солагии таъсиси Ташкилоти заминавии кор бо забонҳо ва фарҳангҳои кишварҳои ИДМ чорабинӣ баргузор гардид
Дар шаҳри Гулистон Фестивали ҷумҳуриявии «Ҳафтаи китоби кӯдакону наврасони Тоҷикистон» оғоз ёфт
Дар вилояти Хатлон Фестивали ҷумҳуриявии «Ҳафтаи китоби кӯдакону наврасон» оғоз гардид
Имрӯз дар Тоҷикистон Рӯзи байналмилалии китоб таҷлил мегардад
Дар Душанбе Фестивали ҷумҳуриявии «Ҳафтаи китоби кӯдакону наврасони Тоҷикистон» оғоз мегардад
Масъалаи баргузории Рӯзҳои фарҳанги Ҷумҳурии Тоҷикистон дар Ҷумҳурии Қирғизистон баррасӣ шуд
Аъҷубасозӣ як бахши ҳунари кулолӣ ва сохтани бозичаҳо аз гилу сафол мебошад
Дар вилояти Суғд бо иштироки меҳмонон аз Узбекистон ва Қирғизистон ҳамоиши фарҳангӣ баргузор гардид
МУЖДАИ НАВРӮЗӢ. «Ёддоштҳо»-и устод Айнӣ барои ҳамзабонони эронӣ ба нашр расид
Бахшида ба Соли фарҳанги китобхонӣ дар вилояти Хатлон китоби «Наврӯзномаи Хатлон» ба табъ расид