Дар ноҳияи Исмоили Сомонӣ бахшида ба Рӯзи баргузории Иҷлосияи XVI Шӯрои Олӣ ва Рӯзи Президент ҳамоиши сиёсӣ доир шуд

ДУШАНБЕ, 11.11.2020 /АМИТ «Ховар»/. Бо ташаббуси Кумитаи иҷроияи Ҳизби Халқии Демократии Тоҷикистон (КИ ҲХДТ) дар ноҳияи Исмоили Сомонӣ 10 ноябр бахшида ба Рӯзи баргузории Иҷлоссияи XVI Шӯрои Олии Ҷумҳурии Тоҷикистон ва Рӯзи Президент таҳти унвони «Ду насл» бо иштироки собиқадорон ва ҷавонон ҳамоиши сиёсӣ баргузор гардид, хабар медиҳад АМИТ «Ховар».

Дар ҳамоиш раиси КИ ҲХДТ дар ноҳияи Исмоили Сомонӣ Насимҷон Расулзода, вакили Иҷлосияи XVI Шӯрои Олӣ Ғайбулло Афзалов, собиқадор ва шахсияти хизматнишондодаи ҷомеа Марҳабо Ҷабборӣ ва донишҷӯёни мактабҳои олӣ иштирок намуданд.

Мақсади баргузории ҳамоиш гиромӣ доштани санаҳои муҳими таърихӣ ва ҳамчун сабақи зиндагӣ ва фаъолият қарор додани шахсиятҳои баруманди миллат мебошад, ки дар он вазъиятҳои бисёр мушкил пуштибони сиёсати хирадмандонаи Пешвои миллат муҳтарам Эмомалӣ Раҳмон буданд. Дар ин баробар баҳри рушди тафаккури ҷавонон ва маърифати сиёсии онҳо чунин чорабиниҳо заминаи мусоид фароҳам меоранд.

Зикр гардид, ки Иҷлосияи таърихии XVI Шўрои Олии Тоҷикистон барои давлату миллати мо нақши сарнавиштсоз дошта, дар пойдории сулҳу субот, мустаҳкам намудани пояҳои ҳуқуқӣ ва сохти конститутсионии мамлакат нақши муҳим бозидааст. Дар рўзҳои даъват ва баргузории Иҷлосияи XVI Шўрои Олӣ мардуми мамлакат  гирифтори кашмакашиҳои ҳалокатбори қувваҳои бадхоҳи сиёсии дохиливу хориҷӣ шуда буданд, ки мақсади асосиашон пароканда намудани миллати тоҷик ва аз байн бурдани давлати ҷавони Тоҷикистон буд.

Дар қисмати ниҳоии ҳамоиш мубодилаи афкор сурат гирифт.